Vho Nicolas na Vho Céline vho ṱangana na iṅwe thaidzo. Vho ṱanganedza mushumo we vha u ṋewa nga davhi ḽa Fura nahone vha pfulutshela kha tshivhidzo tshiswa. Vha ri: “Mathomoni ro vha ro takala vhukuma, fhedzi nga murahu ra thoma u ṱuvha khonani dzashu. Ro vha ri sa athu ḓowela vhahashu vha tshivhidzoni tshiswa.” a Nga nṱhani ha uri a zwo ngo leluwa, ndi mini zwine zwa ḓo ni thusa uri ni takale musi ni tshi pfulutshela kha tshivhidzo tshiswa? Vhaṅwe vha nga ni thusa hani? Nahone inwi ni nga ṱuṱuwedza hani vhaṅwe kha tshivhidzo tshaṋu tshiswa na u tenda vha tshi ni ṱuṱuwedza?

ZWITHU ZWIṊA ZWINE ZWA NGA NI THUSA URI NI ḒOWELE TSHIVHIDZO TSHISWA

1. Ḓitikeni nga Yehova. (Ps. 37:5) Muṅwe wahashu wa tshifumakadzini ane a pfi Kazumi ane a dzula Dzhapani o pfulutshela kha tshivhidzo tshiswa musi munna wawe a tshi humbelwa mushumoni uri a pfulutshele huṅwe. O vha o fhedza miṅwaha ya 20 e kha tshivhidzo tshawe tsha kale. O ‘kumedzela hani nḓila yawe kha Yehova’? U ri: “Ndo vhudza Yehova nḓila ye nda vha ndi tshi khou ḓipfa ngayo. Ndo mu vhudza nga ha zwe zwa vha zwi tshi khou ntshuwisa, uri zwi khou ita uri ndi ḓipfe ndi ndoṱhe na nḓila ine zwa khou mmbilaedzisa ngayo. Tshifhinga tshoṱhe musi ndi tshi mu vhudza, o nṋea maanḓa e nda vha ndi tshi a ṱoḓa.”

Ni nga ḓitika hani nga Yehova nga ho engedzeaho? Samusi tshimela tshi tshi ṱoḓa maḓi na pfushi dzine dza vha kha mavu uri tshi kone u aluwa, na lutendo lwashu lu ṱoḓa maḓi a lwa pfanyisedzo na pfushi uri lu kone u khwaṱha. Vho Nicolas vhe ra amba nga havho, vho elekanya nga ha tsumbo ya Abrahamu, Yesu na ya Paulo vhe na vhone vha ḓidzima zwiṅwe zwithu uri vha kone u ita zwine Mudzimu a zwi funa. U ita nga u ralo zwo vha thusa uri vha fhulufhele Yehova nga ho engedzeaho uri u ḓo vha thusa. U guda Bivhili tshifhinga tshoṱhe zwi ḓo ni thusa uri ni kone u ḓowelana na tshanduko dzine dza vha hone,  na u ni thusa uri ni kone u guda zwithu zwine na nga zwi shumisa u itela u ṱuṱuwedza vhaṅwe tshivhidzoni tshiswa.

2. Ni songo vhambedza tshivhidzo tshaṋu tshiswa na tsha kale. (Muh. 7:10) Jules o tea u ḓowela mvelele yo fhambanaho tshoṱhe na yawe musi a tshi pfulutshela Amerika a tshi bva Benin. O ri: “Ndo vha ndi tshi pfa u nga ndi tea u vhudza muthu muṅwe na muṅwe ane nda ṱangana nae nga ha vhutshilo hanga.” Nga nṱhani ha uri kha mvelele yawe zwithu zwo vha zwi sa itiwi nga yeneyi nḓila, o mbo ḓi thoma u ḓisendedza kule na vhaṅwe tshivhidzoni. Fhedzi musi a tshi vho ḓivha vhahashu khwine, o mbo ḓi shandula mavhonele awe. O ri: “Ndo zwi ṱhogomela uri hu sa londwi uri ni nga vha ni ngafhi kha ḽifhasi, roṱhe ri a fana. Ho tou fhambana nḓila ine ra ita ngayo zwithu na nḓila ine ra amba ngayo. Ndi zwa ndeme u ṱanganedza vhathu nga nḓila ine vha vha ngayo.” Nga zwenezwo, ni songo vhambedza tshivhidzo tshaṋu tshiswa na tsha kale. Muṅwe wahashu wa tshifumakadzini a re muvulanḓila ane a pfi Anne-Lise o zwi vhea nga heyi nḓila, o ri: “Ndo pfuluwa ngauri ndo vha ndi tshi khou ṱoḓa u guda zwithu zwiswa, hu si nga nṱhani ha uri ndo vha ndi tshi khou ṱoḓa uri ndi wane zwithu zwa he nda pfulutshela hone zwi tsha fana na zwa he nda vha ndi hone.”

Vhahulwane na vhone a vho ngo tea u vhambedza tshivhidzo tshavho tshiswa na tsha kale. Ngauri vhahashu vha tshivhidzoni tshiswa vha ita zwithu nga nḓila yo fhambanaho na tshivhidzoni tshaṋu tsha kale, a zwi ambi uri vha khou zwi ita nga nḓila i si yone. Zwi vha vhuṱali uri ni thome ni ḓivhe vhuimo ha tshivhidzo tshaṋu tshiswa musi ni sa athu u amba mavhonele aṋu. (Muh. 3:1, 7b) Zwi vha zwavhuḓi uri ni vhetshele vhahaṋu tsumbo, nṱhani ha u vha kombetshedza uri vha ite zwithu nga nḓila ine inwi na vhona u nga zwi tea u itwa ngayo.​—2 Vhakor. 1:24.

3. Dzulani no farakanea kha tshivhidzo tshaṋu tshiswa. (Vhafil. 1:27) Ndi zwa ndeme nga maanḓa uri ni ṱavhanye ni ye miṱanganoni nga tsha vhukoma kha tshivhidzo tshaṋu tshiswa naho u pfulutshela huṅwe zwi mushumo nahone zwi tshi nga ni dzhiela tshifhinga tshinzhi. Vhahaṋu vha re kha tshivhidzo tshiswa vha ḓo ṱoḓa uri vha ni vhone tshifhinga tshoṱhe uri vha kone u vha khonani dzaṋu na uri vha kone u ni thusa. Vho Lucinda vhane vha vha na vhana vhavhili vhane vha dzula fhano Afurika Tshipembe, vhe vha pfulutshela ḓoroboni khulwane vho ri: “Khonani dzanga dzo nṋea nyeletshedzo ya uri ndi livhise ṱhogomelo kha u sendela tsini na vhahashu tshivhidzoni tshanga tshiswa, u shuma navho tsimuni na u fhindula miṱanganoni. Ndo dovha nda vhudza vhahashu uri ri nga kona u farela muṱangano wa tsimu muḓini wanga.”

Musi ni tshi lwela u shuma “nga vhuthihi” na vhahaṋu kha mishumo ine ya itwa tshivhidzoni tshaṋu tshiswa, zwi ḓo ni thusa uri vha ni ṱuṱuwedze na u ri na inwi ni vha ṱuṱuwedze. Anne-Lise we ra amba nga hae, o ri vhahulwane vho mu ṱuṱuwedza uri a shume na muthu muṅwe na muṅwe kha tshivhidzo tshawe tshiswa. Ho vha na mvelelo dzifhio? U ri: “Zwenezwi zwi ita uri ndi ḓipfe ndi tshipiḓa tsha tshenetshi tshivhidzo.” Zwiṅwe hafhu, musi ni tshi shela mulenzhe kha mishumo i ngaho u kunakisa na u ṱhogomela Holo, zwi ḓo sumbedza vhahaṋu uri na inwi ni ḓidzhia ni tshipiḓa tsha tshenetsho tshivhidzo. U shela mulenzhe nga yeneyo nḓila zwi ḓo ita uri vhahaṋu vha ṱavhanye vha ni ḓowele na uri ni ḓipfe ni tshipiḓa tsha wonoyo muṱa.

4. Itani khonani ntswa. (2 Vhakor. 6:11-13) Zwi a  leluwa uri vhathu vha vhe khonani dzaṋu arali vha tshi ḓivha uri ni na ndavha navho. Nga zwenezwo, itani vhungoho ha uri ni ya Holoni musi miṱangano i sa athu thoma na uri ni a thoma na imanyana musi miṱangano yo no fhela, uri ni kone u wana tshifhinga tshinzhi tsha u amba na vhahaṋu uri ni kone u vha ḓivha khwiṋe. Ni lingedze nga nungo dzoṱhe uri ni ḓivhe madzina avho. Musi ni tshi humbula madzina avho, ni tshi vha fara zwavhuḓi na u amba navho nga nḓila yavhuḓi, zwi ḓo ita uri vha ṱoḓe u ni ḓivha nga ho engedzeaho.

Nṱhani ha u ḓiita muthu ane na si vhe ene u itela uri vhahaṋu vha ni ṱanganedze, zwi vha khwiṋe uri ni tendele vhahaṋu vha tshi ḓivha zwine na vha zwone. Ni gude kha Vho Lucinda vhe vha ri: “Zwino ri na khonani nnzhi nge ra ita vhuḓidini ha u ramba vhahashu.”

“NI ṰANGANEDZANE”

Vhunzhi ha vhathu vha a ofha musi vha tshi ya tshivhidzoni tshiswa hune ha vha na vhathu vha sa vha ḓivhi. Nga zwenezwo, ni nga ita hani uri vha ḓipfe vho ṱanganedzea musi vha tshi ḓa tshivhidzoni tshaṋu? Paulo o ri: “Ni ṱanganedzane vhunga na Kristo o ni ṱanganedza.” (Vharoma 15:7) Vhahulwane vha nga edzisa Kristo nga u thusa vhathu vhaswa uri vha pfe vho ṱanganedzea. (Sedzani bogisi “ Ndi Mini Zwine Zwa Nga Ni Thusa Musi Ni Tshi Khou Pfulutshela Kha Tshiṅwe Tshivhidzo?”) Naho zwo ralo, roṱhe tshivhidzoni, u katela na vhana, ri nga shela mulenzhe kha u ita uri vhathu vhaswa vha pfe vho ṱanganedzea.

U ṱanganedza vhaeni zwi katela u ṱanganedza vhahashu miḓini yashu, na u wana nḓila dza u vha thusa. Sa tsumbo, muṅwe wahashu wa tshifumakadzini o ḓiṋea tshifhinga uri a kone u sumbedza muṅwe wahashu we a pfulutshela henefho ḓoroboni na u mu sumbedza nḓila ine zwiendedzi zwa henefho zwa shuma ngayo. Zwenezwo zwo kwama mbilu ya onoyo wahashu we a pfulutshela henefho nahone zwa mu thusa uri a kone u ḓowelana na fhethu huswa.

ZWI DZHIENI SA TSHIBULI TSHA U GUDA ZWITHU ZWISWA

Musi nzie i tshi khou aluwa, i a ḓuvhudza lukanda lwayo lwo vhalaho musi i sa athu u lugela u fhufha.  Nga nḓila i fanaho, musi ni tshi pfulutshela kha tshivhidzo tshiswa, ni tea u litsha tshithu tshiṅwe na tshiṅwe tshine tsha nga ni thivhela uri ni ite zwoṱhe zwine na nga kona tshumeloni ya Yehova. Vho Nicolas na Vho Céline vha ri: “Ni a guda zwithu zwinzhi musi ni tshi pfulutshela kha tshiṅwe tshivhidzo. Ro vha ri tshi tea u khwinisa zwine ra vha zwone uri ri kone u ḓowelana na vhathu vhaswa na fhethu huswa.” Vho Jean-Charles vhe ra amba nga havho, vha ri u pfulutshela kha tshivhidzo tshiswa zwo thusa muṱa wavho, vho ri: “U pfulutshela kha tshiṅwe tshivhidzo zwo thusa vhana vhashu uri vha vhe na vhushaka ho khwaṱhaho na Yehova kha tshivhidzo tshashu tshiswa. Nga murahu ha miṅwedzinyana, ṅwana washu wa musidzana o thoma u ita dzinyambo kha miṱangano ya vhukati ha vhege nahone wa mutukana a vha muhuweleli a songo lovhedzwaho.”

Ni nga ita mini arali vhuimo haṋu vhu sa ni tendeli uri ni pfulutshele huṅwe fhethu, khamusi hune ha vha na ṱhoḓea? Khamusi ni nga shumisa zwo ambiwaho kha ino thero kha tshivhidzo tshine na vha khatsho. Ḓitikeni nga Yehova, ni dzule no farakanea tshivhidzoni nga u shuma na vhaṅwe musi ni tsimuni, ni ite khonani ntswa nahone ni khwinise vhukonani vhune na vha naho na vhaṅwe vha re khonani dzaṋu. Khamusi ni nga ita na vhuḓidini ha u thusa vhane vha shaya tshivhidzoni kana vhane vha kha ḓi vha vhaswa. Samusi lufuno lu lwone lune lwa ri ṱalusa sa Vhakriste vha vhukuma, u thusa vhaṅwe zwi ḓo ni thusa uri ni sendele tsini-tsini na Yehova. (Yoh. 13:35) Ni nga vha na vhungoho ha uri “Mudzimu u takadzwa nga zwenezwo zwiṱhavhelo.”​—Vhahev. 13:16.

Vhakriste vhanzhi vho vhuyelwa nge vha pfulutshela kha tshivhidzo tshiswa, naho vho vha vha tshi khou ṱangana na dzithaidzo, na kha inwi zwi nga tou ralo. Anne-Lise u ri: “U pfulutshela kha tshiṅwe tshivhidzo zwo nthusa uri ndi vhe na khonani nnzhi.” Zwa zwino Kazumi u a tenda uri musi ni tshi pfulutshela kha tshivhidzo tshiswa, “Yehova u a ni thusa nga nḓila ine na sa athu i tshenzhela.” Jules u ḓipfa hani? U ri: “Khonani dzanga ntswa dzo nthusa uri ndi pfe ndo vhofholowa kha tshivhidzo tshanga tshiswa. Zwa zwino ndi vho ḓipfa ndi tshipiḓa tsha tshivhidzo nahone ndi vhona u nga zwi ḓo nkonḓela u pfuluwa.”