Ndo bebwa ngei Mulhouse, devhula-vhubvaḓuvha ha Fura, ḓoroboni ye ya vha i tshi ḓivhelwa vhuvemu. Zwine nda zwi humbula musi ndi tshee muṱuku ndi musi miṱa i tshi lwa. Muṱani wa hashu, vhafumakadzi vho vha vha tshi dzhielwa fhasi nahone kanzhi vhanna vho vha vhe si na tshifhinga tsha vhafumakadzi. Ndo vha ndo gudiswa uri tsha vhafumakadzi ndi mishumo ya hayani, u ṱhogomela vhanna na u lela vhana.

Ndo aluwa nga nḓila i vhavhaho. Musi ndi na miṅwaha ya fumi, khotsi anga vho vhulahwa nga halwa. Nga murahu ha miṅwaha miṱanu, muṅwe wa vhakomana vhanga o ḓivhulaha. Nga wonoyo ṅwaha, ndo vhona muthu a tshi vhulahwa kha dzikhakhathi dza muṱa nahone zwo ntshuwisa vhukuma. Miraḓo ya muṱa wanga yo ngudisa u shumisa phanga, zwigidi na u lwa musi zwi tshi ṱoḓea. Sa muṱhannga o ḓaḓaho, ndo thoma u ḓiola muvhili na u nwa.

Musi ndi na miṅwaha ya 16, ndo thoma u nwa maboḓelo a 10 u ya kha 15 a halwa ḓuvha ḽiṅwe na ḽiṅwe nahone hu si kale nda thoma u shumisa zwidzidzivhadzi. U itela u renga zwenezwi zwithu, ndo vha ndi tshi rengisa tsimbi dza kale nahone nda thoma u tswa. Musi ndi na miṅwaha ya 17 ndo vha ndo no ya dzhele. Ndo no farwa lwa 18 nga nṱhani ha u tswa na vhuvemu.

Musi ndi miṅwahani ya vhu-20, vhuimo hanga ho ṋaṋa vhu tshi ya. Nga ḓuvha ndo vha ndi tshi daha zolo dza 20 na tshidzidzivhadzi tshine tsha vhidzwa heroin na zwiṅwe zwinzhi. Zwifhinga zwinzhi ndo ṱoḓa u fa nga u shumisesa zwidzidzivhadzi. Ndo thoma u rengisa zwidzidzivhadzi nahone ndo vha ndi tshi dzula ndi na phanga na zwigidi. Ḽiṅwe ḓuvha ndo lingedza u thuntsha muṅwe munna, fhedzi gulu ya rwa tsimbi ya bannda ḽawe! Musi ndi na miṅwaha ya 24, mme anga vho fa nahone nda ṋaṋa u sinyuwa. Musi vhathu vha tshi mmbona vho vha vha tshi pfuka bada vho tshuwa. Nga ṅwambo wa dzinndwa, kanzhi ndo vha ndi tshi fhedza mafhelo a vhege mapholisani kana vhuongeloni ndi tshi khou rungwa mbonzhe.

Ndo vhinga ndi na miṅwaha ya 28. Samusi ni tshi nga zwi lavhelela, ndo vha ndi tshi nyadza mufumakadzi wanga. Ndo vha ndi tshi mu sema na u mu rwa. Ro vha ri sa shumisani sa vhavhingani. Ndo vha ndi tshi vhona u nga zwo eḓana u mu ṋea dzhuwele dzo tswiwaho. Nga zwenezwo, ho itea zwithu zwe nda vha ndi songo zwi lavhelela. Mufumakadzi wanga o thoma u guda Bivhili na Ṱhanzi dza Yehova. Nga murahu ha ngudo yawe ya u thoma, o litsha u daha, a si tsha ṱanganedza tshelede yo tswiwaho nahone a nṋea murahu dzhuwele dze nda mu ṋea. Ndo vha ndo sinyuwa vhukuma. Ndo vha ndi sa tendi a tshi guda Bivhili nahone  ndi tshi mu vhudzulela vhutsi ha fola khofheni. Ndo vha ndi tshi mu kolela phanḓa ha vhathu.

Vhuṅwe vhusiku musi ndo kambiwa vhukuma, ndo fhisa fhethu he ra vha ri tshi dzula hone. Mufumakadzi wanga o mphulusa na ṅwananyana washu a re na miṅwaha miṱanu muliloni. Musi ndo no dzivhuluwa, ndo ḓisola vhukuma. Ndo vha ndi tshi vhona u nga Mudzimu a nga si vhuye a nkhangwela. Ndi humbula ḽiṅwe ḓuvha ndi tshi pfa mufunzi a tshi amba uri vhavhi vha ḓo ya heleni. Na dokotela wanga wa muhumbulo o mmbudza uri: “No bala! A ni tsha ḓo dovha na shanduka.”

Nga murahu ha mulilo ro pfulutshela muḓini wa vhabebi vha mufumakadzi wanga. Musi Ṱhanzi dzi tshi ḓa u dalela mufumakadzi wanga, ndo vha vhudzisa uri, “Naa Mudzimu a nga nkhangwela zwivhi zwanga zwoṱhe?” Vho ntsumbedza luṅwalo lwa 1 Vhakorinta 6:9-11 Bivhilini. Lwonolwo luṅwalo lwo vha lu tshi amba nga ha zwithu zwine Mudzimu a sa zwi takalele, fhedzi yo dovha ya ri: “Vhaṅwe vhaṋu vho vha vha tshi ita zwenezwo.” Eneo maipfi o nkhwaṱhisedza uri zwi a konadzea u shanduka. Nga zwenezwo, Ṱhanzi dzo nkhwaṱhisedza uri Mudzimu u a mpfuna nga u ntsumbedza 1 Yohane 4:8. Zwenezwo zwo nṱuṱuwedza nahone nda humbela Ṱhanzi uri dzi gude na nṋe Bivhili luvhili nga vhege nahone nda thoma u ya miṱanganoni yavho ya Vhukriste. Ndo dzula ndi tshi rabela Yehova.

Musi hu sa athu u fhela ṅwedzi, ndo litsha zwidzidzivhadzi na halwa. Nga u ṱavhanya ndo pfa muvhili wanga wo ṱanganana! Ndo vha ndi na miloro mivhi, u reṅwa nga ṱhoho, zwiṱhavhi na dziṅwe tsumbadwadze dza u litsha zwidzidzivhadzi. Naho zwo ralo, nga tshenetsho tshifhinga ndo pfa u nga Yehova o mpfara nga tshanḓa nahone a nkhwaṱhisa. Ndo ḓipfa nga nḓila ye muapostola Paulo a ḓipfa ngayo. U ya nga thuso ye Mudzimu a mu ṋea yone, Paulo o ri: “Ngauri zwithu zwoṱhe ndi zwi koniswa nga ane a nṋea maanḓa.” (Vhafilipi 4:13) Nga u ya ha tshifhinga, ndo kona u litsha u daha fola.—2 Vhakorinta 7:1.

Bivhili a yo ngo nthusa fhedzi uri ndi kone u langa vhutshilo hanga, fhedzi yo dovha ya nthusa u khwinisa vhutshilo ha muṱa washu. Nḓila ye nda vha ndi tshi fara ngayo mufumakadzi wanga yo shanduka. Ndo thoma u mu ṱhonifha nga ho engedzeaho nahone ndo vha ndi tshi vho kona uri “ndi khou humbela” na uri “ndo livhuha.” Ndo dovha nda vha khotsi wa vhukuma kha ṅwananyana washu. Nga murahu ha u guda Bivhili lwa ṅwaha muthihi, ndo ṋekedzela vhutshilo hanga kha Yehova nahone nda lovhedzwa ndi tshi khou tevhela tsumbo ya mufumakadzi wanga.

Ndi na vhungoho ha uri maitele a Bivhili o tshidza vhutshilo hanga. Na miraḓo ya muṱa wa hashu ine ya si vhe Dziṱhanzi i amba uri khamusi ndo vha ndi tshi ḓo vha ndo no fa nga u shumisa luvhi zwidzidzivhadzi kana ndo vha ndi tshi ḓo vha ndo vhulahwa ndi tshi khou lwa.

Pfunzo dza Bivhili dzo shandula muṱa wanga lwa tshoṱhe nga u ntsumbedza vhuḓifhinduleli hanga sa munna na khotsi. (Vhaefesa 5:25; 6:4) Ro thoma u shumisana sa muṱa. Zwino, nṱhani ha u mu vhudza uri tsha mufumakadzi ndi mishumo ya hayani, ndi takalela u mu tikedza kha mushumo wa vhuevangeli wa tshifhinga tsho ḓalaho. Nahone u takalela u ntikedza kha mushumo wanga sa muhulwane wa tshivhidzo.

Lufuno na tshilidzi zwa Yehova Mudzimu zwo kwama vhukuma vhutshilo hanga. Ndi na lutamo luhulwane lwa u amba nga ha pfaneleo dzawe na vhane vha vhonala u nga vha nga si tsha shanduka, ngauri vhanzhi vho vha vha tshi ndzhia nga yeneyo nḓila. Ndi a zwi ḓivha uri Bivhili i na maanḓa a u thusa muṅwe na muṅwe uri a kune na u vha na vhutshilo vhu re na ndivho. Bivhili a yo ngo ngudisa fhedzi u funa na u ṱhonifha vhaṅwe, u katela vhanna na vhafumakadzi, fhedzi yo dovha ya nthusa u ḓiṱhonifha.