ARALI inwi kana mufunwa waṋu ni tshi khou lwala vhulwadze vhune ha vhulaya, ni nga kona u pfesesa nḓila ine zwa tsikeledza ngayo. Musi ni khou sedzana na vhulwadze, ni dovha na sedzana na u tsikeledzea. Nyofho na mbilaelo zwi nga dovha zwa engedzwa nga u dzulela u vhidzwa sibadela, u kundelwa u wana mishonga kana u badela ngalafho kana masiandoitwa a si avhuḓi a u shumisa mishonga. U humbula nga ha vhulwadze vhu vhavhaho zwi nga ni tsikeledza.

Ri nga wana ngafhi thuso? Vhanzhi vho khuthadzwa nga u rabela Mudzimu na u vhala mafhungo  a khuthadzaho Bivhili. Ni nga dovha na wana thuso kha miṱa na khonani vha re na lufuno.

Robert a re na miṅwaha ya 58 o ri: “Lwisanani na vhulwadze haṋu ni na lutendo kha Mudzimu nahone u ḓo ni thusa uri ni konḓelele. Rabelani Yehova. Mu vhudzeni nḓila ine na ḓipfa ngayo. Mu humbeleni muya mukhethwa. Humbelani uri a ni thuse uri ni vhe na mavhonele avhuḓi na uri ni kone u ṱuṱuwedza muṱa uri u si vhilaele musi ni tshi khou konḓelela honoho vhulwadze.”

“Zwi a thusa vhukuma musi muṱa waṋu u tshi ni ṱuṱuwedza. Ḓuvha na ḓuvha ndi founelwa nga muthu muthihi kana vhavhili vha mmbudzisa uri ‘Ni khou ḓipfa hani?’ Ndi ṱuṱuwedzwa nga khonani dzi bvaho fhethu ho fhamba fhambanaho. Vha nthusa uri ndi ḓipfe ndi khwine nahone zwi nthusa uri ndi konḓelele.”

Arali ni khou ya u ṱolela mulwadze, ṱhogomelani zwe Linda a amba: “Mulwadze u ṱoḓa u tshila vhutshilo ho ḓoweleaho nahone a nga si ṱoḓe u amba nga ha vhulwadze hawe tshifhinga tshoṱhe. Nga zwenezwo, ambani nga ha zwithu zwine na dzulela u amba nga hazwo.”

Nga thuso ya Yehova, ṱhuṱhuwedzo i bvaho Maṅwaloni na thikhedzo ya muṱa na dzikhonani ri nga vha na vhungoho ha uri vhutshilo ndi ha ndeme naho ri tshi khou lwala vhukuma.