صحارا کے صحرا میں پائی جانے والی سلیٹی رنگ کی چیونٹی خشکی پر رہنے والے اُن جانوروں میں سے ایک ہے جو سخت گرمی کو برداشت کر سکتے ہیں۔‏ صحارا میں دوپہر کے وقت سورج کی تپش بہت زیادہ ہوتی ہے جس کی وجہ سے اِس چیونٹی کے شکا‌ری سائے میں پناہ لیتے ہیں۔‏ اِسی دوران یہ چیونٹی تھوڑی دیر کے لیے خوراک کی تلا‌ش میں اپنے بِل سے باہر نکلتی ہے۔‏ اِس کی خوراک میں وہ کیڑے مکوڑے شامل ہوتے ہیں جو شدید گرمی کی وجہ سے مر جاتے ہیں۔‏

غور کریں:‏ صحارا میں رہنے والی اِس چیونٹی کے جسم کی اُوپر والی سطح خاص قسم کے بالوں سے ڈھکی ہوتی ہے جبکہ نیچے والی سطح پر بال نہیں ہوتے۔‏ اِن بالوں کی وجہ سے یہ چیونٹی چمک‌دار لگتی ہے۔‏ یہ بال دراصل مثلث کی شکل والی چھوٹی چھوٹی نالیاں ہوتے ہیں۔‏ اِن نالیوں کی اُوپر والی دو سطحوں پر چھوٹی چھوٹی سلوٹیں ہوتی ہیں جنہیں صرف خوردبین سے دیکھا جا سکتا ہے جبکہ نیچے والی سطح ہموار ہوتی ہے۔‏ بالوں کے اِس ڈیزائن کے دو فائدے ہوتے ہیں۔‏ پہلا یہ کہ اِس کی وجہ سے چیونٹی کے بال سورج کی اُن شعاعوں کو منعکس کر پاتے ہیں جو نظر نہیں آتیں۔‏ اور دوسرا یہ کہ یہ بال اُس حرارت کو خارج کر پاتے ہیں جو چیونٹی کے اِردگِرد کے ماحول سے اُس کے جسم میں داخل ہوتی ہے۔‏ اِسی دوران چیونٹی کے جسم کی نچلی سطح حرارت کی اُن شعاعوں کو منعکس کرتی ہے جو ریت سے نکلتی ہیں اور نظر نہیں آتیں۔‏ *

صحارا میں رہنے والی یہ چیونٹی زیادہ سے زیادہ 6.‏53 ڈگری سینٹی‌گریڈ (‏5.‏128 ڈگری فارن‌ہائیٹ)‏ درجۂ‌حرارت برداشت کر سکتی ہے۔‏ اور اِس کے جسم کی بناوٹ کی وجہ سے اِس کا درجۂ‌حرارت 6.‏53 ڈگری سینٹی‌گریڈ سے کم رہتا ہے۔‏ اِس ننھے سے جان‌دار سے متاثر ہو کر سائنس‌دان ایسی پرتیں بنانے کی کوشش کر رہے ہیں جو پنکھوں یا دوسری مشینوں کے بغیر ٹھنڈک فراہم کر سکیں۔‏

آپ کا کیا خیال ہے؟‏ کیا صحارا میں رہنے والی سلیٹی رنگ کی چیونٹی کے جسم میں سخت گرمی کو برداشت کرنے کی صلا‌حیت خودبخود وجود میں آئی ہے؟‏ یا کیا یہ خالق کی کاریگری ہے؟‏