Manji Nicolas kuenda Céline, va liyaka locitangi cimue ca litepa. O Betele yo ko Fransa ya va tuma vekongelo limue liokaliye. Ovo va popia vati: “Kefetikilo tua sanjukile calua, pole, noke tua fetika oku kuatela ongeva akamba vetu. Handi vali, ka tua kuatele akamba valua vekongelo liokaliye.” a Anga hẽ o sanjukila oku pita locitangi cimuamue? O pondola oku kuata ndati esanju kuenda oku sola epongoloko lioku kala vekongelo liokaliye? Nye omanu vakuavo va sukila oku linga oco va ece ekuatiso? Asumũlũho api konepa yespiritu ove o pondola oku tambula kuenda oku eca ku vakuene vekongelo liokaliye?

OVINA VIKUÃLA VI PONDOLA OKU KU KUATISA OKU LIKISA

1. Kolela ku Yehova. (Osa. 37:5) Manji umue ukãi wo ko Japão o tukuiwa Kazumi, okuti wa kala ale eci cisoka 20 kanyamo vekongelo liaye, wa sukilile oku iluka momo ulume waye wa tambula upange kocitumãlo cikuavo. Eye wa ‘ecelela ndati okuti Yehova o songuila onjila yaye’? Eye wa popia hati: “Ame nda likutilila calua ku Yehova loku u sapuila ndomo ndi liyevite. Nda kuata usumba, loku liyeva ulika kuenda nda yeva esakalalo lialua. Pole, olonjanja viosi nda likutilila ku Yehova, eye wa nyĩha ongusu nda sukilile.”

Nye o sukila oku linga oco o vokiye ekolelo liove ku Yehova? Ndeci ocikũla cimue ci sukila ovava kuenda otulumu oco ci kule, cimuamue haico okuti, ekolelo lietu li sukila oku pamisiwa oco liamameko oku pama. Manji Nicolas okuti wa tukuiwa ale, wa pamisa ekolelo liaye kekuatiso lia Yehova poku sokolola kovolandu a Avirahama, a Yesu kuenda wupostolo Paulu okuti, va likolisilako calua oku linga ocipango ca Suku. Esokiyo liwa lielilongiso lio  pokolika, ka li ka ku kuatisa lika oku liyaka loloseteko viomuenyo, pole, ove o ka lilongisavo ovina o ka talavaya lavio oco o pamise vakuene vekongelo liokaliye o kasi.

2. Yuvula oku sokisa. (Uku. 7:10) Manji Jules wa tunda ko Benin, poku ilukila ko Estadus Unidus wa limbuka okuti ovituwa vio kofeka via litepa calua. Eye wa popia hati: “Nda kuatele ocisimĩlo cokuti, nda sukilile oku lombolola ulandu womuenyo wange komanu vosi ndi sanga.” Omo lioku litepa kuaco kuovituwa, eye wa fetika oku liamũha la vamanji vo vekongelo liaco. Pole, noke lioku kũlĩha ciwa vamanji eye wa pongolola ovisimĩlo viaye. Eye wa popia hati: “Ame ndi tava okuti kuosi tu sangiwa kilu lieve, vosi tu vamuamue, elaka olio lika lia litepa. Ca velapo oku tava ndomo omanu va tuwa.” Omo liaco, ci kuete esilivilo oku yuvula oku sokisa ekongelo liokaliye leli liosimbu. Ukundi umue wotembo yosi o tukuiwa Anne-Lise wa popia hati: “Ame sia ilukilile vekongelo oco ndi sokise leli nda sia, pole, nda ilukilamo oco ndi limbuke ovina viokaliye.”

Akulu vekongelo va sukila oku yuvula oku sokisa ekongelo liosimbu leli liokaliye. Ndaño okuti vamanji va linga ovina lonjila ya litepa, eci ka ci lekisa okuti ovo va kasi oku linga ovina ka via sungulukile. Ci kuete esilivilo cilo oku kũlĩha ciwa ekalo lio pocitumãlo osimbu handi ka tua ecele ocisimĩlo cimue. (Uku. 3:1, 7b) Ca sungulukavo oku longisa vamanji pocakati congangu yiwa okuti, ka tu va kisika oku sokolola ndomo etu tu sokolola.—2 Va Kor. 1:24.

3. Tiamisila utima kovopange ekongelo. (Va Fil. 1:27) Oku iluka kuambata otembo yalua kuenda ku kavisa. Pole, ci kuete esilivilo oku kala kolohongele vekongelo lietu liokaliye, ca pĩala enene polo la polo. Momo nda vamanji vekongelo liokaliye ka va siatele oku tu mola olonjanja vialua Vonjango Yusoma ka va ka tẽla ndomo va tu kuatisa. Manji umue ukãi o tukuiwa Lucinda okuti o kasi ko Afrika do Sul, wa ilukila kolupale lumue lunene kumue lomãla vaye vakãi. Eye hati: “Akamba vange va mbetiya oco ndi tiamisile utima koku linga ukamba la vamanji vekongelo liokaliye, poku talavaya lavo kupange woku kunda loku kala lavo kolohongele. Tua liecavo olumue oco olohongele vioku kunda vi lingiwe konjo yetu.”

“Ocina cimue ci ka ku pamisa kuenda oku pamisavo vakuene,” oku likolisilako oku “panga onepa kovopange ekongelo.” Akulu vekongelo va manji Anne-Lise una wa tukuiwa ale, vo vetiya oku talavaya kupange woku kunda la vamanji vosi vekongelo. Onima yipi yeyililako? Eye wa popia ndoco: “Kamue kamue, nda limbuka okuti oku ci linga oyo onjila ya velapo yoku panga onepa kekongelo liokaliye.” Handi vali, nda wa kuata ocituwa coku panga onepa koku yelisa Onjango Yusoma, ci ka kuatisa oku likisa lonjanga vekongelo liove liokaliye. Nda ove wa likolisilako oku panga onepa kovopange aco, vamanji vekongelo va ka lianja lonjanga yalua love. Kuenje ove o ka liyeva okuti o panga onepa kepata liaco liokaliye konepa yespiritu.

 4. Linga akamba vokaliye. (2 Va Kor. 6:11-13) Onjila yiwa yoku linga ukamba oku lekisa okuti wa kapako omanu. Omo liaco, likolisilako oku pitĩla selo Konjango Yusoma kuenda noke liohongele ku ka tunde lonjanga, likolisilako oku sapela la vamanji loku va kũlĩha ciwa. Likolisilakovo oku kũlĩha olonduko viavo. Oku patekela olonduko via vamanji, loku kala omunu uwa haeye wa sunguluka, ci ka vetiya vakuene oku lianja love kuenda ci ka leluka oku linga akamba vokaliye.

Ku ka sakalale calua konjila ndomo vamanji va ka ku tenda. Pole, ecelela okuti ovo va kũlĩha ndomo ove wa tuwa. Linga ndeci manji Lucinda a popia, eye hati: “Tu kuete ukamba uwa la vamanji momo tua nõlapo oku va laleka konjo yetu.”

“LITAMBULI POKATI”

Ku vamue ka ca lelukile kokuavo oku iñila Vonjango yimue Yusoma muli omanu valua eye ka kũlĩhĩle. Oco hẽ o kuatisa ndati vana veya ndopo vekongelo oco va likise? Upostolo Paulu wa popia hati: “Litambuli pokati ndeci Kristu o tambuli.” (Va Rom. 15:7) Akulu vekongelo va sukila oku kuatisa vana veya ndopo vekongelo oku likisa, momo nda va ci linga va kasi oku setukula Yesu. (Tala okakasia losapi hati, “ Ceci ci Kuatisa Oku Kuata Onima Yiwa Poku Ilukila Kekongelo Limue Liokaliye.”) Vamanji vosi vekongelo oku kongelamo omãla, va pondola oku kuatisa vana veya ndopo oku likisa vekongelo liokaliye.

Voku yolela vakuetu ka mua kongelele lika oku va yekisa, mua kongelavo oku va ĩha ekuatiso va sukila. Ndeci, manji umue ukãi wa kuatisa manji ukuavo wa ilukila ndopo vekongelo liavo, poku u lekisa olupale kuenda oku u lekisa ndomo a kuata okalela. Manji wa pitĩlile ndopo vekongelo, wa komõha calua konjila ndomo manji ukuavo o kuatisa oku likisa vekongelo liokaliye.

EPULUVI LIMUE LIOKU KULA KONEPA YESPIRITU

Oco ekundumba li tẽle oku yikula avava aye kuenda oku palãla, li sukila oku pongolola ekova liayo olonjanja vialua. Cimuamue haico okuti, nda wa ilukila vekongelo liokaliye, ove o sukila oku yuvula  usumba wosi o kuete, una u ku tateka oku yikula avava ove vupopi wocindekaise kupange wa Yehova. Manji Nicolas kuenda Céline okuti va tukuiwa ale kefetikilo, va popia ndoco: “Oku ilukila vekongelo likuavo epindiso limue liwa. Oco tu tẽle oku likisa kocitumãlo cokaliye kuenda la vamanji va litepa, tua sukilile oku kuata ovituwa viokaliye.” Manji Jean-Charles okuti wa tukuiwa ale kefetikilo, wa lombolola ndomo eye kumue lepata liaye va kuatisiwa poku ilukila kekongelo likuavo. Eye hati: “Ekongelo lietu liokaliye lia kuatisa omãla vetu oku kula konepa yespiritu kuenda oku pamisa ukamba wavo la Yehova. Noke liolosãi vimue omõletu ufeko wa fetika oku linga olonepa kohongele yo vokati kosemana kuenda omõletu ulume wa linga ohundi ka ya papatisiwile.”

Oco hẽ nye ci popiwa nda ove o yongola oku ilukila kocitumãlo kuli esukila liakundi? O pondola oku kapako olonumbi viocipama cilo vekongelo liove liokaliye. Nda wa ci linga ku ka liyeva okuti wa ilukila vekongelo liokaliye. Omo liaco, kolela ku Yehova, pitisa kovaso ovopange ekongelo poku talavaya kupange woku kunda la vamanji kuenda oku linga akamba vokaliye, loku pamisa ukamba o kuete ale. O pondolavo oku eca ekuatiso li sukiliwa ku vana veya ndopo, ale ku vana va sukila ekuatiso. Oku ci linga ci ka ku kuatisa oku pama konepa yespiritu, momo ocisola ocituwa cimue ci situlula Akristão vocili. (Yoa. 13:35) Kolela okuti “Suku o sanjukila ovilumba viaco.”—Va Hev. 13:16.

Vamanji valua ndaño lovitangi, va tẽla oku likisa vekongelo liokaliye kuenje ove o ka ci tẽlavo! Manji Anne-Lise wa popia hati: “Oku ilukila vekongelo likuavo ca ñuatisa oku linga akamba vokaliye.” Manji Kazumi wa limbuka okuti, oku ilukila vekongelo likuavo “co kuatisa oku mola ekuatiso lia Yehova lonjila yimue ka lavokaile.” Nye ci popiwa catiamẽla ku manji Jules? Eye wa popia hati: “Ukamba nda linga la vamanji wa ñuatisa oku likisa lonjanga vekongelo liokaliye. Cilo ndi liyevite okuti nda tiamẽla kekongelo liokaliye kuenje ci tĩla calua kokuange oku tunda vekongelo liaco.”