Onduko ya Suku helie? Suku wa popia hati: “Ame Yehova, oyo onduko yange.” (Isaya 42:8) Vembimbiliya onduko ya Suku, yi molẽha eci ci pitahãla 7.000 kolonjanja. Pole, Vambimbiliya alua onduko yaco ya piñanyiwa londuko yokuti, “Ñala.” Suku o yongola okuti, o kala ekamba liaye kuenda oku vetiya oku ‘vilikiya onduko yaye.’—Osamo 105:1.

Yehova o Kuete Olonduko Vialua Viesumbilo. Embimbiliya li tukula Yehova lolonduko viaco hati: “Suku,” “Tõlo,” “Ululiki,” “Isia” “Ñala” kuenda “Ukuonene.” Volohutililo vialua vi sangiwa Vembimbiliya, omanu va tukula Yehova lolonduko viesumbilo kuenda londuko yaye muẽle okuti, Yehova.—Daniele 9:4.

 Etimba lia Suku. Suku espiritu okuti ka muiwa. (Yoano 4:24) Embimbiliya li popia okuti, “lomue wa la mola Suku.” (Yoano 1:18) Embimbiliya li situlula ovisimĩlo viaye. Omanu va pondola oku u sumuisa ale oku ‘u sanjuisa.’—Olosapo 11:20; Osamo 78:40, 41.

Ovituwa vi Komõhisa Via Suku. Suku hokuacameko pole, o tava omanu vosi. (Ovilinga 10:34, 35) Eye “Suku yohenda, ukuacali, ukuakulivala konyeño, ukuacisola calua haeye ukuacili.” (Etundilo 34:6, 7) Pole, pokati kovituwa viosi via Suku, pali vikuãla vi vetiya calua.

Unene. Omo okuti eye “Suku Ukuonenewosi,” o kuete unene woku tẽlise olohuminyo viosi.—Efetikilo 17:1.

Olondunge. Olondunge via Suku via velapo viomanu vosi. Eli olio esunga lieci Embimbiliya li popela okuti, “eye lika ukualondunge.”—Va Roma 16:27.

Esunga. Suku olonjanja viosi o linga eci ca sunguluka. Ovilinga viaye via “lipua” kuenda eye “ka kuete etime.”—Esinumuĩlo 32:4.

Ocisola. Embimbiliya li popia okuti, “Suku eye ocisola.” (1 Yoano 4:8) Eci ci lomboloka okuti, Suku ka lekisa lika ocisola, pole, eye ocisola. Ocisola caye ca velapo, cu vetiya kovina viosi eye a linga kuenda ci tu kuatisa volonjila vialua.

Ukamba wa Suku Lomanu. Suku eye Isietu ukuacisola o kasi kilu. (Mateo 6:9) Nda tu lekisa ekolelo kokuaye, tu pondola oku kala akamba vaye. (Osamo 25:14) Ocili okuti, Suku o ku laleka oku amẽla kokuaye lohutililo kuenda oku ‘yeka kokuaye ovilemo viove viosi, momo eye o ku tata.’—1 Petulu 5:7; Tiago 4:8.

Yesu Haeyeko Suku. Yesu olikasi. Eye lika wa lulikiwa la Suku okuti lomue wo kuatisa. Eli olio esunga lieci Embimbiliya li u tukuila okuti Omõla a Suku. (Yoano 1:14) Noke yoku lulika Yesu, Omõlaye uveli, Yehova wa talavaya laye “ndomesele,” oco a lulike omanu vosi lovina viosi.—Olosapo 8:30, 31; Va Kolosai 1:15, 16.

 Yesu lalimue eteke a popele okuti eye Suku. Pole, eye wa popia hati: “Ndinumiwa ya [Suku] kuenda Eye wa numa.” (Yoano 7:29) Yesu eci a vangula la umue pokati kolondonge viaye, wa tukula Yehova hati: “Isiange okuti Isiene,” kuenda “Suku yange okuti haeye Suku yene.” (Yoano 20:17) Noke liolofa via Yesu, Yehova wo pindula oco a ende kilu kuenda wa eca kokuaye Unene walua woku tumãla kondio Yaye.—Mateo 28:18; Ovilinga 2:32, 33.

Yesu Kristu o Pondola Oku ku Kuatisa Oku Kuata Ukamba la Suku

Yesu weya palo posi oco a tu longise eci catiamẽla ku Isiaye. Catiamẽla ku Yesu, Yehova wa popia hati: “U Omõlange wa soliwa. U yeveleli.” (Marko 9:7) Yesu wa kũlĩha ciwa Suku okuti omunu ukuavo ci sule. Eye wa popia hati: “Lomue wa kũlĩha Isia, te Omõla kuenda una Omõla a panga oku u situluila.”—Luka 10:22.

Yesu wa situlula ciwa ovituwa via Suku. Yesu wa setukula ciwa ovituwa via Isiaye kuenje wa popia hati: “Wosi o mola ame, o molavo Isia.” (Yoano 14:9) Yesu wa kokela omanu ku Suku poku setukula lonjila ya lipua ocisola ca Isiaye kolondaka kuenda kovilinga. Eye wa popia hati: “Ame ndinjila, haime ndicili, haime ndimuenyo. Lomue iya ku Isia, te lame.” (Yoano 14:6) Eye wa popiavo hati: “Afendeli vocili va fendela Isia lespiritu kuenda ocili, momo Isia wo sandiliya omanu va soka ndava oco vo fendele.” (Yoano 4:23) Ci sokolola! Yehova o kasi oku sandiliya omanu ndove va yongola oku kũlĩha ocili catiamẽla kokuaye.