Ohutililo ya Ñala yi tu ĩha olonumbi viatiamẽla konjila ndomo tu likutilila kuenda ovina tu sukila oku pinga. Yesu wa tambulula olondonge viaye eci vio sapuila hati: “A Ñala, tu longise ndomo tu likutilila.” (Luka 11:1) Omo liaco, Ohutililo ya Ñala, ale Ohutililo ya Isietu, hayoko lika Suku a tava. a Pole, Yesu wa linga ohutililo yaco ndocindekaise colohutililo vi yeviwa la Suku.

Vocipama cilo

•  Ohutililo ya Ñala yi popia nye?

•  Ohutililo ya Ñala yi lomboloka nye?

•  Oku pitolola Ohutililo ya Ñala oyo lika hẽ onjila yoku likutilila?

•  Tu sukila oku likutilila ndati?

•  Olohutililo vikuavo vi sangiwa Vembimbiliya

 Ohutililo ya Ñala yi sangiwa kelivulu lia Mateo 6:9-13, ya pongoluiwa lonjila ya litepa Vambimbiliya alua. Ovindekaise vimue vivali vievi

 Embimbiliya li Kola—Epongoluilo Lioluali Luokaliye: “A Isietu o kasi kovailu, onduko yove yi sumbiwe. Usoma wove wiye. Ocipango cove ci lingiwe palo posi, ndeci ci lingiwa kilu. Tu ĩhe okulia tu sukila etaili; kuenda tu ecele akandu etu, ndeci tu ecaila ava va tu lueyela. Ku ka ecelele okuti tu yonjiwa, puãi tu popele kondingaĩvi.”

 Embimbiliya de Nova Jerusalém: “A Isietu o kasi kovailu, Onduko yove yi sumbiwe, Usoma wove wiye, ocipango cove ci lingiwe posi, ndeci kilu. Ombolo yetu yeteke leteke yi tu ĩhe etaili. Kuenda tu ecele olofuka vietu ndeci tu ecaila vakuakutulevala. Kuenda ku ka tu kape veyonjo, puãi tu popele Kondingãivi.”

 Omo okuti alongiso a Yesu a likuata Lovisonehua vikuavo, tu lavoka okuti, olonepa vikuavo Viembimbiliya, vi situlula elomboloko Liohutililo ya Ñala.

“A Isietu o kasi kovailu”

 Ca sunguluka oku tukula Suku okuti “Isietu,” omo okuti eye wa tu lulika kuenda wa tu ĩha omuenyo.—Isaya 64:8.

“Onduko yove yi sumbiwe”

 Onduko ya Suku, Yehova, yi sukila oku sumbiwa kuenda oku tatiwa lonjila yi kola. Omanu va kuatisa koku sivayiwa kuonduko ya Suku eci va sapuilako vakuavo catiamẽla kovituwa viaye kuenda kocipango caye.—Olosamo 83:18; Isaya 6:3.

“Usoma wove wiye”

 Usoma wa Suku uviali umue u kasi kilu okuti, Yesu eye Soma yaco. Yesu wa tu longisa oku likutilila oco uviali waco u viale ongongo yosi.—Daniele 2:44; Esituluilo 11:15.

“Ocipango cove ci lingiwe posi, ndeci kilu”

 Omo okuti kilu ka kuli evĩho kuenda olofa, ocipango ca Suku catiamẽla kongongo ceci okuti, omanu va kalamo lombembua kuenda oku kolapo otembo ka yi pui.—Olosamo 37:11, 29.

“Ombolo yetu yeteke leteke yi tu ĩhe etaili”

 Koloneke via Yesu, ombolo ya kala okulia kumue ku kuete esilivilo lialua. Tu sukila oku ivaluka okuti, omuenyo wetu wa tamba kovina tu tambula ku Suku.—Ovilinga 17:24, 25.

“Tu ecele olofuka vietu ndeci tu ecaila vakuakutulevala”

 Ndomo ulandu waco u lekisa, ondaka “olofuka,” vondaka yikuavo yi tiamisiwila kakandu. (Luka 11:4) Omanu vosi vakuakulueya kuenda va sukila ongecelo. Pole, nda tu yongola ongecelo ya Suku, tu sukilavo oku ecela vana va tu lueyela.—Mateo 6:14, 15.

“Ku ka tu kape veyonjo, puãi tu popele Kondingãivi”

 Yehova Suku lalimue eteke a tu seteka oco tu linge cimue ka ca sungulukile. (Tiago 1:13) Pole, tua siata oku setekiwa “londingaĩvi” Satana Eliapu—una o tukuiwavo okuti, “Uyonji.” (1 Yoano 5:19; Mateo 4:1-4) Tu pinga ku Yehova oco a tu kuatise oku amamako oku pokola kokuaye poku setekiwa oku linga cimue ka ca sungulukile.

 Yesu wa longisa ño Ohutililo ya Ñala ndocindekaise. Ka tu sukila oku yi pitolola ondaka londaka. Yesu osimbu ka lingile ocindekaise cohutililo yaco wa eca elungulo liokuti: “Poku likutilila ku ka tukole ovina vimuamue olonjanja viosi.” (Mateo 6:7) Kepuluvi likuavo eci a linga ohutililo yikuavo yocindekaise, eye wa tukula olondaka vikuavo.—Luka 11:2-4.

 Onjila ya velapo yoku likutilila, oku tukula olondaka vietu muẽle vina vi tunda vutima wetu.—Olosamo 62:8.

 Ohutililo ya Ñala yi tu ĩha ongangu yiwa yoku likutilila lonjila yi taviwa la Suku. Limbuka ndomo eci ci likuata ciwa lovinimbu vikuavo Viembimbiliya catiamẽla kohutililo.

•   Likutilila lika ku Suku

   Ocisonehua: “Kovina viosi lolohutililo kuenda apingilo kumue loku eca olopandu, apingilo ene a kũlĩhĩwe la Suku.”—Va Filipoi 4:6.

   Elomboloko liaco: Olohutililo vietu, ka vi ka tiamisiwile ku Yesu, ku Maria, ale kolosandu. Ovio vi sukila oku tiamisiwila lika ku Suku. Olondaka vioku fetika Viohutililo ya Ñala, vi tu longisa oku likutilila lika ku Yehova Suku.

•   Oku pinga vohutililo ovina vi likuata locipango ca Suku

   Ocisonehua: “Nda tu pinga ovina viosi vi likuata locipango caye, eye o tu yeva.”—1 Yoano 5:14.

   Elomboloko liaco: Oco olohutililo vietu vi yeviwe, tu sukila oku pinga cosi ci likuata locipango ca Suku. Yesu poku kongela Vohutililo ya Ñala olondaka viokuti “ocipango cove ci lingiwe,” wa tu longisa okuti, ci kuete esilivilo lialua oku tẽlisiwa kuocipango ca Suku. Tu pondola oku kũlĩha ocipango ca Suku catiamẽla komanu kuenda kongongo poku lilongisa Embimbiliya.

•   Oku likutilila kueci catiamẽla kasakalalo etu

   Ocisonehua: “Imba ocilemo cove ku Yehova kuenda eye o ka ku kuatisa.”—Olosamo 55:22.

   Elomboloko liaco: Suku wa kapako asakalalo etu. Omo okuti Yesu wa kongela Vohutililo ya Ñala asakalalo etu, tu pondola oku pinga ovina vio ketimba tu sukila eteke leteke, olonumbi tu kuama poku nõla onjila yimue yi kuete esilivilo, ekuatiso poku liyaka lovitangi kuenda oku pinga ongecelo yakandu etu. b