Anga hẽ Suku o Kasi Kovitumãlo Viosi Vepuluvi Limuamue?

SIKA

Etambululo Liembimbiliya

Suku o pondola oku mola cosi. Eye o pondolavo ku linga cosi a seya kovitumãlo viosi. (Olosapo 15:3; Va Heveru 4:13) Pole, Embimbiliya ka li longisa okuti Suku o kasi kovina viosi kuenda kovitumãlo viosi vepuluvi limuamue. Embimbiliya li longisa okuti, Suku omunu umosi kuenda o kasi pocitumãlo cimue ca sokiyiwa.

Ndomo Suku a tuwa: Suku espiritu. (Yoano 4:24) Eye ka muiwa lomanu. (Yoano 1:18) Ovinjonde viosi viatiamẽla ku Suku vi sangiwa Vembimbiliya, olonjanja viosi vi lekisa okuti, eye o kasi kocitumãlo cimue ca sokiyiwa. Eye lalimue eteke a tukuiwile okuti, o kasi kovitumãlo viosi.—Isaya 6:1, 2; Esituluilo 4:2, 3, 8.
Kocitumãlo Suku a kasi: Suku o kasi voluali lumue luespiritu okuti, ocitumãlo cimue ca litepa lilu lieve muna tu kasi. Voluali luaco luespiritu, omo Suku a kuete ‘ocitumãlo cimue a kasi, ovailu.’ (1 Olosoma 8:30) Embimbiliya li tukula epuluvi limue okuti, ovangelo “va iñila loku talama kovaso a Yehova,” a eci ci lekisa okuti Suku o kasi kocitumãlo cimue.—Yovi 1:6.

Nda Suku ka kasi kovitumãlo viosi, o ka tẽla hẽ oku ndi tata?

Oco. Suku wa kapako calua omunu lomunu. Ndaño okuti o kasi kilu, eye o kuatisa vosi va yongola oku u sanjuisa. Suku o kuatisa omanu vaco. (1 Olosoma 8:39; 2 Asapulo 16:9) Kũlĩhĩsa ndomo Yehova a lekisa okuti, wa kapako afendeli vaye vakuekolelo:

Ceci o likutilila: Yehova o yevelela ohutililo yove vepuluvi o likutilila.—2 Asapulo 18:31.
Ceci o sumua: “Yehova o kasi ocipepi la vakuavitima via teka; eye o popela vana va sumua.”—Olosamo 34:18.
Ceci o sukila olonumbi: Yehova o ka ‘eca kokuove olondunge kuenda o ka ku pindisa’ pocakati Condaka yaye, Embimbiliya.—Olosamo 32:8.

Ovohembi okuti Suku o kasi kovitumãlo viosi

Uhembi: Suku o kasi kovina viosi a lulika.

Ocili: Suku ka kasi palo posi, ndaño muẽle kocitumãlo cikuavo coluali u letiwe. (1 Olosoma 8:27) Ocili okuti, olombungululu loviluvo vikuavo vi “sapula ulamba wa Suku.” (Olosamo 19:1) Ndeci ci pita lukuakupindala vavaya okuti, ka kasi vevaya a pindala, Yehova ka kasi kovina a lulika. Ocili okuti, evaya li situlula calua catiamẽla komunu wa li pindala. Cimuamue haico okuti, ovina via lulikiwa via tu ñuala, vi sitululavo vimue pokati ‘kovituwa ka vi muiwa’ Viululiki ndeci: unene waye, olondunge kuenda ocisola.—Va Roma 1:20.

Uhembi: Suku o pondola lika oku kala ukuonene wosi loku kũlĩha cosi, nda o kasi kovitumãlo viosi.

Ocili: Espiritu sandu, ale ongusu ya pama ya Suku, unene u kuatisa oku talavaya. Pocakati cespiritu sandu, Suku o tẽla oku mola kuenda oku linga cosi valivala osi kuenda kovitumãlo viosi okuti, ka sukila oku kalako.—Olosamo 139:7.

Uhembi: Olosamo 139:8, vi popia okuti Suku o kasi kovitumãlo viosi, momo ovio viti: “Nda nda lamanele kilu, ove nda haiko o kasi, kuenda nda nda lokele Vonjembo, ove nda haimo o kasi.”

Ocili: Ocinimbu eci ka ci popi okuti Suku o kasi kovitumãlo viosi. Ocinimbu ci kasi oku vangula vupopi wocindekaise okuti, Yehova o pondola oku tu kuatisa kuosi tu sangiwa.

a Embimbiliya li lekisa okuti, Yehova onduko ya Suku.