Инмарлэн Эксэйлыкез — со кивалтэт, кудӥз инмысен кивалтэ. Со вань адями кивалтэтъёсты воштоз но Инмарлэсь эриксэ быдэстоз музъем вылын но инмын кадь ик. Инмарлэн Эксэйлыкез сярысь ивор — со ӟеч ивор. Ӝоген Инмарлэн Эксэйлыкез умой кивалтэт пуктоз, сыӵезэ, кыӵезэ адямиос кемалась возьмало ини. Со огазеялоз музъем вылысь вань адямиосты. (Лыдӟе Данииллэсь 2:44; Матфейлэсь 6:9, 10; 24:14.)

Котькуд эксэйлыклэн эксэез, яке кивалтӥсез, вань. Иегова инмысь Эксэйлыкын Эксэй луыны аслэсьтыз Пизэ, Иисус Христосэз, бырйиз. (Лыдӟе Усьтӥськонэз 11:15.)

Учке «Мар со сыӵе Инмарлэн Эксэйлыкез?» видеороликез.

Инмарлэн Пиез — самой умой Эксэй, малы ке шуоно со ӟеч но шонерлыкез яратӥсь (Матфей 11:28—30). Со сяна, солэн адямиослы юрттыны кужымез тырмыт, малы ке шуоно со инмысен быдэс музъемен кивалтоз. Улӟемез бере Иисус инме ӝутскиз но Иеговалэн бурпалаз пуксиз (Еврейёслы 10:12, 13). Куке дыр вуиз, Инмар солы кивалтыны право сётӥз но, Иисус кивалтыны кутскиз. (Лыдӟе Данииллэсь 7:13, 14.)

Иисусэн ӵош инмын кивалтозы адямиос, кудъёсыз Библиын «дун-сьӧлыктэм калык» шуыса нимамын (Даниил 7:27). Со Инмарлы оскымон пиосмуртъёс но кышномуртъёс, кудъёссэ ачиз Иегова быръе. Нырысетӥосыз, кинъёс со калык пӧлы пыризы, со Иисуслэн апостолъёсыз вал. «Дун-сьӧлыктэм калыкез» люкан уж али ке но мынэ. Иисус сямен, со адямиос  улӟо но, соослэн мугорзы кылчинъёслэн кадь адскисьтэм луэ. (Лыдӟе Иоаннлэсь 14:1—3; 1 Коринфъёслы 15:42—44.)

Кӧня адями инме тубоз? Иисус соосты «пичи уллё» шуыса нимаз (Лука 12:32). Соослэн лыдзы 144 000 луоз. Соос Иисусэн ӵош музъемен кивалтозы. (Лыдӟе Усьтӥськонэз 14:1.)

Инмарлэн Эксэйлыкез 1914-тӥ арысен кивалтэ *. Кивалтыны кутскемез бере ик Иисус Шайтанэз но солэсь периоссэ музъем вылэ сэрпалтӥз. Шайтан вожомиз но адямиос вылэ одӥгез бӧрсьы мукет курадӟон лэзьыны кутскиз (Усьтӥськон 12:7—10, 12). Со дырысен адямиос трос курадӟонъёсын пумисько. Ожъёс, сютэм улон, висёнъёс но музъем зурканъёс — ваньмыз со пыре «тодмет» пӧлы, кудӥз вера, Инмарлэн Эксэйлыкез матын ини шуыса. (Лыдӟе Лукалэсь 21:7, 10, 11, 31.)

Али быдэс музъем вылын тодытон уж ортчытӥське. Солы луыса Инмарлэн Эксэйлыкез вань калыкъёсысь туж-туж трос адямиосты огазея. Трос миллион зӥбыт-востэм адямиос Иисуслэсь кылзӥськыны кутско но солэн Эксэйлыкез пала карисько. Та лек дуннеез быдтыку, Инмарлэн Эксэйлыкез со адямиосты утёз. Соин ик котькудӥзлы, кинлэн Инмарлэн Эксэйлыкезлэн кивалтэмез улсын улэмез потэ, дышетсконо Иисуслэсь кылзӥськыны. (Лыдӟе Усьтӥськонэз 7:9, 14, 16, 17.)

Христос сюрс ар ӵоже кивалтыку, Эксэйлык быдэстоз сое, мар карыны Инмар кутсконаз ик малпаз вал. Быдэс музъем рай луоз. Собере Иисус Эксэйлыкез аслаз Атаезлы сётоз (1 Коринфъёслы 15:24—26). Кинлы тӥ Инмарлэн Эксэйлыкез сярысь верасалды? (Лыдӟе Псалтирез 36:10, 11, 29.)