Ua fanauhia vau i Moundsville, te hoê oire iti tapiri i te anavai Ohio i te pae apatoerau tooa o te râ o Virginie, i Marite. E maha tamarii matou, o vau te piti. E toru matou tamaroa, e ere iho â ïa to matou oraraa i te mea haumani. Mea itoito e mea maitai to ˈu na metua e mea here i te taata. E ere matou i te mea moni, aita râ matou i ere noa ˈˈe i te tahi mea. Ei Ite no Iehova, ua rave to ˈu na metua i ta raua i nehenehe no te haapii mai i te mau faaueraa tumu Bibilia i to matou apî-roa-raa ra.

I to ˈu taurearearaa mai, aita vau i haapao faahou i tei haapiihia mai. Ua haavare-ê-na-hia ïa to ˈu aau. I uiui noa na vau, e auraa e mea oaoa anei te oraraa ia pee i te mau faaueraa tumu Bibilia. Ua manaˈo vau e o te tiamâ-roa-raa te ravea e oaoa roa ˈi. Aita i maoro, ua faaea vau i te haere i te mau putuputuraa Kerisetiano. Ua na reira atoa to ˈu tuaana e to ˈu tuahine iti. Ua rave to matou na metua i tei nehenehe no te tauturu mai, aita râ matou i haafaufaa i ta raua mau tutavaraa.

Aita vau i manaˈo noa ˈˈe e e aratai te tiamâraa ta ˈu i hinaaro noa i roto roa i te peu ino. I te tahi mahana, a hoˈi mai ai au na te fare haapiiraa mai, ua pûpû mai te hoê hoa i te tahi avaava. Ua farii au. Mai reira mai, ua rahi atu â ta ˈu peu iino mai te raveraa i te peu morare ore e te raau taero e te inu-hua-raa i te ava. I te mau matahiti i muri aˈe, ua rave au i te mau raau taero puai atu â a riro roa mai ai ei tîtî. No tera mau peu, haamata ˈtura vau i te hoo i te raau taero ei imiraa moni.

Ua faahapa noa mai to ˈu manaˈo haava no to ˈu oraraa ino, e tautooraa ïa no ˈu ia tâuˈa ore i te reira. Ua manaˈo vau, ‘Ua oti, aita e ravea faahou!’ Noa ˈtu e mea rahi te taata na pihai ia ˈu i te vahi arearearaa e himeneraa, mea pinepine au i te moemoe e te ahoaho. I te tahi taime, ia feruri au i te maitai o to ˈu na metua, e uiui au, ‘No te aha vau i haere ê ai?’

Noa ˈtu e aita e haapaoraa to ˈu oraraa, aita vau i faaruehia. I 2000, ua titau manihini to ˈu na metua ia ˈu ia haere i te tairururaa mataeinaa a te mau Ite no Iehova. Ua haere au ma te faatia ture noa. Ua oaoa râ vau, ua tae atoa mai to ˈu tuaana e to ˈu tuahine iti tei haere ê.

I te tairururaa, ua haamanaˈo aˈera vau e ua haere mai au i teie vahi no te hoê faataˈiraa upaupa rock i te matahiti i mairi. I taua taime ra, ua î tera vahi i te pehu e te auauahi avaava. E ere te rahiraa o te taata i te mea farii maitai e mea au ore hoi te upaupa. I te tairururaa râ, mea oaoa te taata e haaati ra ia ˈu e ua farii popou mai noa ˈtu e aita vau i ite ia ratou ahia ˈtura matahiti. Mea mâ tera vahi e ua riro te poroi i horoahia mai ei tiaturiraa. Ua putapû roa vau no te taa-ê-raa. A ite ai au i ta te parau mau Bibilia e faatupu ra, ua manaˈo vau e ahani iho â vau i faaroo!—Isaia 48:17, 18.

I muri noa iti aˈe i te tairururaa, ua opua vau e hoˈi i te amuiraa. Ua na reira atoa to ˈu tuaana e to ˈu tuahine iti. Ua farii matou tootoru atoa ra i te hoê haapiiraa Bibilia.

Ua putapû roa to ˈu aau i te Iakobo 4:8 o te na ô ra: “E haafatata ˈtu i te Atua, e na ˈna e haafatata mai ia outou na.” Ua ite au e no te haafatata ˈtu i te Atua, mea titauhia ia rave au i te mau tauiraa mai te faaearaa i te inu e te puhipuhi i te avaava e i te rave i te raau taero.—Korinetia 2, 7:1.

Aita vau i amui faahou i to ˈu mau hoa tahito, e hoa apî râ to ˈu no roto mai i te feia haamori ia Iehova. O te matahiapo i faatere i ta ˈu haapiiraa Bibilia tei tauturu rahi mai ia ˈu. Ua taniuniu e ua haere pinepine mai oia e hiˈo ia ˈu. I teie mahana, o ˈna hoê o to ˈu mau hoa piri roa ˈˈe.

I 2001, ua bapetizohia vau e ua na reira atoa to ˈu tuaana e to ˈu tuahine iti. A feruri na i te oaoa o to ˈu na metua e o to ˈu teina taiva ore a tahoê ai to matou utuafare i roto i te haamoriraa ia Iehova.

I manaˈo na vau e mea etaeta roa te mau faaueraa tumu Bibilia, i teie nei râ ua riro te reira ei parururaa. Ua faaitoito mai te Bibilia ia ˈu ia faaea i te rave e i te hoo i te raau taero e ia riro ei taata maitai.

E fanaˈoraa taa ê ta ˈu e apiti i te huitaeae i te ao nei, te feia haamori ia Iehova. Te here mau nei ratou ia ratou e te tahoê nei no te haamori i te Atua. (Ioane 13:34, 35) Ua itea ia ˈu te hoê haamaitairaa taa ê no roto mai i tera huitaeae, ta ˈu ïa vahine o Adrianne ta ˈu e here e poihere mau nei. Te oaoa rahi nei mâua i te tavini amui i to tatou Atua Poiete.

Aita vau e tapi faahou ra i te hoê oraraa miimii. Ei tavini taime taatoa, te tauturu nei au i te taata ia haafaufaa i te Parau a te Atua. Ua oaoa roa vau no teie ohipa. E nehenehe au e haapapu e ua taui te Bibilia i to ˈu oraraa. Ua itea ia ˈu te tiamâraa mau!