Mea rahi aita e haere faahou ra i te pureraa, aita hoi ratou i ite i te tamahanahanaraa aore ra te pahonoraa i te mau uiraa faufaa roa o te oraraa. Mea taa ê râ ia haere oe i te mau putuputuraa Kerisetiano a te mau Ite no Iehova. No te aha? Eaha ta oe e ite i reira?

Te oaoa e amui e te mau taata hamani maitai î i te here. Mea faanahohia te mau Kerisetiano matamua ei amuiraa no te haamori i te Atua, no te haapii i te mau Papai e no te faaitoito te tahi i te tahi. (Hebera 10:24, 25) E taeae, e tuahine Kerisetiano e e hoa mau anaˈe ratou i putuputu na ma te here. (Tesalonia 2, 1:3; Ioane 3, 14) Te na reira atoa nei matou ma te oaoa.

Te maitai ia faaohipa i te mau aratairaa Bibilia. E tane, vahine e tamarii atoa te amui nei mai i tahito ra. Te faaohipa nei te mau taeae aravihi i te Bibilia no te faataa e nafea ia ora ia au i te mau aratairaa Bibilia. (Deuteronomi 31:12; Nehemia 8:8) E nehenehe te taatoaraa e pahono ia uihia mai na mua mai e e himene, ei faaiteraa i te tiaturiraa Kerisetiano.—Hebera 10:23.

Te maitai ia puai to oe faaroo i te Atua. Ua parau te aposetolo Paulo i te hoê amuiraa o to ˈna ra tau: “Te hinaaro roa nei hoi au e ite atu ia outou . . . ia nehenehe outou e faaitoito mai ia ˈu i to outou faaroo e ia nehenehe atoa vau e faaitoito ia outou i to ˈu faaroo.” (Roma 1:11, 12) E puai to tatou faaroo i te amuimuiraa e te mau taeae e tuahine i te mau putuputuraa, a faaoti papu roa ˈi e faaohipa i te mau aratairaa Bibilia.

Te titau manihini nei matou ia oe ia haere i ta matou putuputuraa i mua nei, e ite ïa oe i tei faahitihia mai nei. E farii-popou-hia oe. Mea tamoni ore te mau putuputuraa atoa e aita e titauraa moni.

• Te putuputu nei matou ia au i te hiˈoraa o vai ma?

• Eaha te noaa mai ia haere i te mau putuputuraa?