Te poro ra Osman, ta ˈna vahine e ta raua tamahine e te vairaa papai afaifai i rapae mai i te hoê menema i Chili. Faaroo taue atura ratou i te tahi pǔpǔ taata o te faataˈi ra i te upaupa. Ua hape vetahi o ratou o Osman to ratou orometua. Tapiri atura ratou, tauahi maira ia ˈna e na ô ihora: “Mauruuru orometua i te taeraa mai i te hora tia, te tiai noa ra iho â matou ia oe!”

 Ua tamata Osman i te faataa e ere o ˈna to ratou orometua. No te maniania râ, aita ratou i faaroo i ta ˈna i parau. Tau minuti i muri aˈe to te pǔpǔ tomoraa i roto i te menema, ua hoˈi mai vetahi o ratou no te parau: “Orometua, te tiai ra matou ia oe.”

 I te mǎrûraa mai te maniania, ua faataa Osman o vai o ˈna e no te aha ratou i farerei ai ia ˈna i tera vahi. I muri aˈe i to ratou faaiteraa i to ratou inoino i to ratou orometua o tei ore i tae mai, ua ani ratou ia Osman: “E nehenehe anei oe e haere mai e faahiti i te tahi mau parau no roto mai i te Bibilia?” Farii ihora Osman.

 A haere ai ratou i te vahi e hunahia ˈi te taata, ua aniani Osman no nia i te vahine i pohe e ua feruri oia i muri iho eaha te tahi mau irava ta ˈna e nehenehe e faaohipa. I te taeraa ˈtu ratou, faaite atura o ˈna i te nahoa o vai o ˈna e ua faataa atoa e Ite no Iehova o ˈna o te apiti ra i te ohipa pororaa i te parau apî oaoa i te taata.

 Ua faaohipa oia i te Apokalupo 21:3, 4 e te Ioane 5:28, 29. I muri iho, ua faataa oia aita roa ˈtu te Atua i opua ia pohe te taata. Ua parau oia, no reira te Atua e fatata ˈi i te faatia mai i te feia pohe e e nehenehe ratou e ora i nia i te fenua e a muri noa ˈtu. I te hoperaa ta Osman mau parau, e rave rahi tei haere mai e tauahi e e haamauruuru ia ˈna no teie parau apî oaoa a Iehova. I muri iho, hoˈi atura oia i te vairaa papai.

 I muri aˈe i te hunaraa, ua haere mai vetahi i te vairaa papai e ua uiui ratou ia Osman e to ˈna utuafare no nia i te Bibilia. Ua paraparau maoro ratou, e i to ratou faarueraa, fatata pauroa te mau papai ta ratou i rave i nia i te vairaa papai!