E faahiti-pinepine-hia “te parau a te Atua” no te hoê aore ra e rave rahi poroi no ǒ mai i te Atua. (Luka 11:28) I roto i te tahi mau irava, e tiaraa ïa “te Parau a te Atua” aore ra “te Parau.”—Apokalupo 19:13; Ioane 1:14.

 Te hoê poroi no ǒ mai i te Atua. Pinepine te mau peropheta i te parau e no ǒ mai i te Atua ra te mau poroi ta ratou i poro. Ei hiˈoraa, ua haamata Ieremia i te mau parau tohu ta ˈna i faaite ma te parau: “Tae maira te parau a Iehova ia ˈu.” (Ieremia 1:4, 11, 13; 2:1) Hou a faaite ai ia Saula e ua maiti te Atua ia ˈna ei arii, ua parau te peropheta Samuela: “A tia noa mai i reira, ia faaite atu vau ia oe te parau a te Atua.”—Samuela 1, 9:27.

 Te hoê tiaraa. E ite-atoa-hia te taˈo “te Parau” i roto i te Bibilia ei tiaraa no Iesu Mesia, ta ˈna i amo ei varua i nia i te raˈi e ei taata i nia i te fenua. E hiˈo anaˈe no te aha.

•   Ua ora te Parau hou a poietehia ˈi te mau mea atoa. “I vai na te Parau i te haamataraa . . . Tei te Atua na oia i te haamataraa.” (Ioane 1:1, 2) O Iesu “te matahiapo o te mau mea atoa i poietehia . . . Ua na mua oia i te mau mea atoa nei.”—Kolosa 1:13-15, 17.

•   Ua haere mai te Parau i nia i te fenua ei taata. “Riro maira te Parau ei taata e parahi maira i rotopu ia tatou.” (Ioane 1:14) “Ua haapae [Iesu Mesia] ia ˈna iho e ua riro mai te hoê tavini ra te huru e ua fanauhia mai oia ei taata.”—Philipi 2:5-7.

•   Te Parau, o te Tamaiti ïa a te Atua. I muri aˈe i to te aposetolo Ioane parauraa e ua “riro maira te Parau ei taata” mai tei faahitihia i nia ˈtu, ua na ô o ˈna: “Ua ite matou i to ˈna hanahana, te hanahana o te hoê tamaiti otahi no ǒ mai i to ˈna metua.” (Ioane 1:14) Ua parau atoa o Ioane: “E Tamaiti Iesu na te Atua.”—Ioane 1, 4:15.

•   Mai te Atua ra te huru o te Parau. “E atua na te Parau” aore ra e huru atua to ˈna. (Ioane 1:1) “O [Iesu] te anaana o to te Atua hanahana e te hohoˈa o to te Atua huru mau.”—Hebera 1:2, 3.

•   Te faatere ra te Parau ei arii. Te na ô ra te Bibilia e i nia i te upoo o te Parau a te Atua, “mea rahi te hei arii.” (Apokalupo 19:12, 13, nota) E pii-atoa-hia te Parau mai teie: “Arii o te mau arii e Fatu o te mau fatu.” (Apokalupo 19:16) O Iesu hoi “te Arii o te feia e faatere ra ei arii, e te Fatu o te feia e faatere ra ei fatu.”—Timoteo 1, 6:14, 15.

•   Te tavini ra te Parau ei auvaha na te Atua. E au ra e “te Parau,” o te hoê ïa ta te Atua e faaohipa ra no te faaite atu i ta ˈna mau poroi e aratairaa. Ua parau Iesu e ua amo o ˈna i tera hopoia, a na ô ai: “Ua horoa mai râ te Metua tei tono mai ia ˈu i te hoê faaueraa no nia i ta ˈu e parau e ta ˈu e haapii i te taata. . . . No reira te mau mea ta ˈu e parau, mai ta te Metua i faaue mai, e parau ïa vau.”—Ioane 12:49, 50.