Mai te aha te huru o Iesu?

FAAROO NA ROTO TE REO

Te pahonoraa a te Bibilia

Aita te taata i taa maitai mai te aha te huru o Iesu. Aita te Bibilia e faataa roa ra te huru o to ˈna tino. E ere ïa te reira i te mea faufaa. Ua faataa râ te Bibilia i te tahi tuhaa o to Iesu huru mau, to ˈna huru rapaeau.

To ˈna hohoˈa: Ua hohoˈa roa Iesu i to ˈna metua vahine ati Iuda. (Hebera 7:14) Aita hoê taa-ê-raa e itehia i nia ia ˈna. Ei hiˈoraa, i te hoê mahana, ua haere oia i Galilea ma te ore te taata e ite o vai o ˈna. (Ioane 7:10, 11) I rotopu atoa i ta ˈna mau pǐpǐ, aita atoa te taata i ite o Iesu tera. A haamanaˈo na i ta Iuda Isakariota i rave no te faaite o vai Iesu a haruhia ˈi ai oia.—Mataio 26:47-49.
To ˈna rouru: Aita e faataahia ra e rouru roa to Iesu, no te mea te parau ra te Bibilia “mea haama roa no te tane te rouru roroa.”—Korinetia 1, 11:14.
To ˈna huruhuru taa: E huruhuru taa to Iesu. Te faatura ra oia i te ture ati Iuda, oia hoi, eiaha roa te hoê taata ‘e tâpû i te hiti o to ratou huruhuru taa.’ (Levitiko 19:27; Galatia 4:4) Te faahiti atoa râ te Bibilia i to Iesu huruhuru taa i roto i te hoê parau tohu i to ˈna hamani-ino-raahia.—Isaia 50:6.
To ˈna tino: E taata pautuutu Iesu. Ua haere oia ehia kilometera te atea. (Mataio 9:35) Ua tamâ oia i te hiero e piti taime ma te tiahi i te feia e hoohoo ra i reira. (Luka 19:45, 46; Ioane 2:14, 15) Te na ô ra te hoê buka maimiraa: “I roto i te mau evanelia, te faataahia ra Iesu mai te hoê taata itoito e te ea maitai.”—Cyclopedia a McClintock e Strong, buka IV, api 884.
To ˈna hohoˈa mata: E itehia te tamahanahanaraa e te hamani maitai o Iesu i nia i to ˈna hohoˈa mata. (Mataio 11:28, 29) Ua rau te taata o te imi ra i ta ˈna tamahanahanaraa e ta ˈna tauturu. (Luka 5:12, 13; 7:37, 38) Oia atoa te mau tamarii, mea au roa na ratou ia ˈna.—Mataio 19:13-15; Mareko 9:35-37.

Manaˈo hape no nia i to Iesu huru rapaeau

Manaˈo hape: Te parau nei vetahi e taata Afirika Iesu, no te mea te faaau ra te buka Apokalupo i to ˈna rouru, mai te huruhuru mamoe uouo e to ˈna avae mai te “veo anaana.”—Apokalupo 1:14, 15.

Tupuraa mau: E buka “taipe” te Apokalupo. (Apokalupo 1:1) Te faataaraa e horoahia ra no nia i to ˈna rouru e te avae, e taipe te reira. Te faaite te reira i to ˈna mau huru maitatai, eiaha râ to ˈna mau huru rapaeau. Ma te parau ‘mea uouo to Iesu upoo e to ˈna rouru, mai te huruhuru mamoe uouo e mai te hiona,’ te faaohipa ra te Apokalupo 1:14 i te û o te rouru, eiaha râ te meumeu o te rouru. Ua faaauhia te reira i te paari i noaa mai ia ˈna. (Apokalupo 3:14) Aita teie irava i faaau roa ra i te rouru o Iesu i te huruhuru mamoe uouo aore ra i te hiona.

E au to Iesu avae “mai te veo anaana i roto i te umu.” (Apokalupo 1:15) E to ˈna hohoˈa mata “mai te mahana ïa te anaana i te avatea.” (Apokalupo 1:16) No te mea aita e taata tera aˈe te û o to ˈna iri, e taipe ïa teie faataaraa o te faaite ra ia Iesu o tei faatiahia mai “mai te mahana ïa te anaana i te avatea.”—Timoteo 1, 6:16.

Manaˈo hape: E taata paruparu o Iesu.

Tupuraa mau: E taata mǎtaˈu ore Iesu. Ei hiˈoraa, aita Iesu i mǎtaˈu i te faaite ia ˈna i te nahoa i haere mai e haru ia ˈna. (Ioane 18:4-8) E taata itoito Iesu, no te mea i rave na oia i te ohipa tamuta.—Mareko 6:3.

Tera râ, no te aha i hinaaro ai Iesu i te tauturu no te amo i te pou haamauiuiraa? No te aha o ˈna tei pohe na mua ˈˈe i na e piti taata i nia i te pou? (Luka 23:26; Ioane 19:31-33) Hou oia a haapohehia ˈi, ua rohirohi roa Iesu no te mea aita o ˈna i taoto noa ˈˈe, no te ahoaho rahi. (Luka 22:42-44) Ua hamani-ino-hia oia tera po e ao noa ˈtu. (Mataio 26:67, 68; Ioane 19:1-3) No tera paha mau tupuraa i pohe oioi ai oia.

Manaˈo hape: E mata pohepohe to ˈna e te peapea.

Tupuraa mau: Ua faaite Iesu ma te tia roa i te mau huru maitatai o to ˈna metua ra o Iehova o ta te Bibilia e parau ra “te Atua oaoa.” (Timoteo 1, 1:11; Ioane 14:9) Ua haapii Iesu i te taata e nafea ia oaoa. (Mataio 5:3-9; Luka 11:28) Te haapapu ra teie mau faataaraa, e pinepine e itehia te oaoa o Iesu i nia i to ˈna hohoˈa mata.