E ere te Faatereraa arii a te Atua i te hoê mea i roto i te aau o te mau Kerisetiano. a I roto i te Bibilia, e parauhia te reira “te basileia [aore ra faatereraa arii] o te raˈi.” Tei reira ïa to ˈna vairaa mau. (Mataio 4:17, Te Bibilia Moˈa V.C.J.S., 1976) E hiˈopoa anaˈe no te aha, ia au i te Bibilia, e nehenehe ai e parau e faatereraa mau teie o te faatere nei mai te raˈi mai.

•   I roto i te Faatereraa arii a te Atua, te vai ra te mau tia faatere, te hoê huiraatira, te mau ture, e oia atoa te opuaraa e faatupu i te hinaaro o te Atua i te raˈi e te fenua nei.—Mataio 6:10; Apokalupo 5:10.

•   E faatere te Faatereraa arii a te Atua i te taatoaraa o “te feia no te mau nunaa e reo ê” na te ao nei. (Daniela 7:13, 14) No ǒ mai i te Atua te mana o tera faatereraa, e ere tei te huiraatira ra.—Salamo 2:4-6; Isaia 9:7.

•   Ua parau Iesu i ta ˈna mau aposetolo taiva ore e apiti ratou ia ˈna i roto i te Faatereraa arii i te raˈi no te “parahi i nia i te mau terono.”—Luka 22:28, 30.

•   E enemi to te Faatereraa arii. E haamou râ teie faatereraa ia ratou paatoa.—Salamo 2:1, 2, 8, 9; 110:1, 2; Korinetia 1, 15:25, 26.

 Aita te Bibilia e haapii ra e tei roto i to oe aau te Faatereraa arii o te raˈi, mai te mea ra e te faatere ra te reira mai roto mai i te aau o te hoê taata. Tera râ, te faaite mai ra te Bibilia e nehenehe “te poroi o te Faatereraa arii,” aore ra “te parau apî oaoa o te Faatereraa arii,” e ohipa i nia to tatou aau.—Mataio 13:19; 24:14.

Eaha te auraa o te parau “te basileia o te Atua tei roto ïa ia outou nei”?

 Aita te taata i ite papu teihea te Faatereraa arii a te Atua no te huriraa o te Luka 17:21 i roto i te tahi mau Bibilia. Ei hiˈoraa, teie te huriraa a Te Bibilia Moˈa ra: “Te basileia o te Atua tei roto ïa ia outou nei.” No te taa maitai i teie irava, mea faufaa roa ia hiˈopoa i roto i teihea tupuraa Iesu i faahiti ai i teie parau.

 Te paraparau ra Iesu i te mau Pharisea, te hoê pǔpǔ aratai haapaoraa o tei patoitoi noa ia ˈna e o tei hinaaro e haapohe ia ˈna. (Mataio 12:14; Luka 17:20) E tano anei ia parau e tei roto te Faatereraa arii i to ratou aau etaeta? Ua parau Iesu ia ratou: “To outou . . . aau, mea haavarevare roa ïa e te ofati ture.”—Mataio 23:27, 28.

 I roto râ i te tahi mau huriraa, mea tano maitai ïa te huriraa o te Luka 17:21. Ei hiˈoraa, teie te huriraa a Te Faufaa Apî: “Tei rotopu te Basileia o te Atua ia outou na.” Ta te Huriraa o te ao apî, teie ïa: “Tei rotopu te Faatereraa arii a te Atua ia outou nei.” Tei “rotopu” te Faatereraa arii o te raˈi i te mau Pharisea, oia hoi o Iesu, o ta te Atua i faatoroa ei Arii. Te tia noa ra o ˈna i mua ia ratou.—Luka 1:32, 33.