Te faahohoˈa ra “te mau taviri o te Faatereraa arii” i te ravea no te iriti i te uputa no te feia e ‘ô i roto i te Faatereraa arii a te Atua.’ (Mataio 16:19; Ohipa 14:22) a Ua horoa Iesu ia Petero “te mau taviri o te Faatereraa arii o te raˈi.” Te auraa ïa ua horoahia teie hopoia ia Petero no te faaite atu i te feia haapao maitai e nehenehe ratou e ô i roto i te Faatereraa arii i te raˈi ia faatavaihia ratou i te varua moa.

No vai ma teie mau taviri?

 Ua horoa te Atua ia Petero ra te hopoia no te iriti i te uputa o te Faatereraa arii no e toru pǔpǔ taata:

1.   Te mau ati Iuda e te feia tei riro mai ei ati Iuda. I muri iti noa mai i to Iesu poheraa, ua faaitoito Petero i te ati Iuda ia farii o Iesu ta te Atua i maiti no te faatere i roto i te Faatereraa arii. Ua faaite Petero ia ratou eaha te titauhia no te ora. Iriti atura ia ratou te uputa no te ô i roto i te Faatereraa arii e e tau tausani taata ‘tei farii i ta ˈna parau.’—Ohipa 2:38-41.

2.   To Samaria. I muri iho tonohia ˈtu ra Petero i Samaria. b Ua faaohipa o ˈna i te piti o te taviri o te Faatereraa arii e pure atura raua te aposetolo Ioane ia fanaˈo ratou i te varua moa. (Ohipa 8:14-17) Matara ˈtura te uputa no to Samaria no te ô atu i roto i te Faatereraa arii.

3.   Te feia o te mau nunaa ěê. Toru matahiti e te afa i muri mai i to Iesu poheraa, ua faaite te Atua ia Petero e ô atoa te feia o te mau nunaa ěê i roto i te Faatereraa arii. Faaohipa atura Petero te toru o te taviri ma te poro ia ratou e fanaˈo atoa ˈtura ratou i te varua moa, riro mai nei ei Kerisetiano e e mero o te Faatereraa arii.—Ohipa 10:30-35, 44, 45.

Eaha te auraa e “ô i roto i te Faatereraa arii”?

 E riro te feia e tomo i roto i te Faatereraa arii ei arii apiti i pihai iho ia Iesu i te raˈi. Ua tohu te Bibilia ‘e parahi ratou i nia i te mau terono’ e ‘e faatere mai ratou ei arii i te fenua e tia ˈi.’—Luka 22:29, 30; Apokalupo 5:9, 10.

Manaˈo hape no nia i te mau taviri o te Faatereraa arii

 Manaˈo hape: Na Petero e faaoti afea e faaohipa ˈi i te mau taviri o te Faatereraa arii.

 Tupuraa mau: Ua parau Iesu ia Petero no nia i te mau taviri o te Faatereraa arii, “o ta oe e taamu i te fenua nei, ua taamu aˈena-hia ïa i nia i te raˈi, e o ta oe e tatara i te fenua nei, ua tatara aˈena-hia ïa i nia i te raˈi.” (Mataio 16:19) Noa ˈtu ua manaˈo te tahi pae na Petero e faaoti te ohipa e tupu i te raˈi, te haapapu râ ra te mau Papai Heleni ta Petero e faaoti ua faaoti aˈena-hia ïa i te raˈi.

 Te faaite atoa ra te Bibilia e auraro Petero i to te raˈi no te faaohipa i te mau taviri o te Faatereraa arii. Ei hiˈoraa, ua auraro o ˈna i te mau faaueraa a te Atua ia ˈna i faaohipa i te toru o te taviri.—Ohipa 10:19, 20.