“Ta te hara hoi e aufau mai i te taata, o te pohe ïa. Area te ô ta te Atua e horoa mai, o te ora mure ore ïa na roto i te Mesia ra o Iesu, to tatou Fatu.”—Roma 6:23, Huriraa o te ao apî.

 “E utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.”—Roma 6:23, Te Bibilia Moˈa ra.

 Na roto i teie mau parau, te faataa ra te aposetolo Paulo e pohe te taata no te mea e taata hara ratou. Tera râ, te horoa ra te Atua i ta ˈna mau tavini haapao maitai i te hoê tiaturiraa faahiahia, oia hoi te ô o te ora mure ore.

 “Ta te hara hoi e aufau mai i te taata, o te pohe ïa.” Pauroa te taata ua fanauhia i roto i te hara, no reira ratou e hara ˈi. a (Salamo 51:5; Koheleta 7:20) No to ratou tiaraa taata hara, e ruau e e pohe te mau taata atoa.—Roma 5:12.

 Te faaau ra Paulo i te hara i te hoê fatu o te aufau i ta ˈna mau rave ohipa. Mai te hoê rave ohipa o tei ite e aufauhia o ˈna no ta ˈna ohipa, ua ite atoa te taata e pohe iho â ratou no te mea e taata hara ratou.

 Tera râ, te faataa atoa ra Paulo ia pohe te tahi taata, “ua matara ïa oia i ta ˈna hara.” (Roma 6:7) I to ˈna poheraa, e faatiamâhia te hoê taata i te mau hara ta ˈna i rave. No reira, e ere i te mea tano ia manaˈo e tamau noa te feia pohe i te mauiui i te hoê vahi no te mau hape ta ratou i rave na. Te haapapu mai ra te Bibilia eita te feia pohe e nehenehe e feruri, e ohipa aore ra e mauiui.—Koheleta 9:5.

 “Area te ô ta te Atua e horoa mai, o te ora mure ore ïa na roto i te Mesia ra o Iesu.” O te pohe ta te hara e “aufau” mai, area te Atua e horoa mai ïa i te ô o te ora mure ore. Na roto i te reo tumu, e nehenehe atoa e hurihia te taˈo “ô” ei “ô horoa noa” aore ra ei “ô horoa-noa-hia.” Te tanoraa mau, eita e au ia fanaˈo tatou i tera ô, ua horoa-noa-hia mai râ te reira! E ere atoa na nia i ta tatou ohipa e faaora aore ra e fanaˈo ai tatou i te ora mure ore! (Salamo 49:7, 8) E ô râ te reira ta te Atua e horoa i tei faatupu i te faaroo ia Iesu.—Ioane 3:16; Roma 5:15, 18.

 Ua papai Paulo i teie rata i te mau Kerisetiano i Roma i te area matahiti 56. I tera ra tau, ua faatupu vetahi o te mau Kerisetiano i te manaˈo hape no nia i te aroha hamani maitai o te Atua. Ia au i te tahi mau haapiiraa a te Heleni, ua manaˈo te tahi mau Kerisetiano rahi atu â ratou i te hara, rahi atu â ïa ratou i te fanaˈo i to te Atua aroha hamani maitai. (Roma 6:1) Area vetahi, ua manaˈo eita ratou e faautuahia no ta ratou mau hara no te mea aita faahou ratou i raro aˈe i te Ture a Mose. (Roma 6:15) I roto i ta ˈna rata, te faataa maitai ra Paulo eita te mau Kerisetiano e nehenehe e fanaˈo i te aroha hamani maitai o te Atua mai te peu e vaiiho ratou na te hara e aratai ia ratou.—Roma 6:12-14, 16.

 Mea mahanahana te mau parau a Paulo no te mau tavini a te Atua i teie mahana. Noa ˈtu ua fanauhia ratou i roto i te hara, e tiaturiraa to ratou. Mai te peu e auraro ratou i te mau faaueraa a te Atua e eita atoa e vaiiho i to ratou mau hinaaro tia ore ia aratai ia ratou, ua fafau te Atua i te horoa ˈtu i te ora mure ore.—Roma 6:22.

 A mataitai i teie video poto o te faaite mai i te tahi mau tuhaa o te buka Roma.