E MATA, e mafai ne se tino o tumau i te fakamaoni ki te Atua māfai ko tofotofogina malosi a ia kae seai ne mea aoga faka-te-foitino e maua mai tena fakalogo? Ne sae aka te fesili tenā—kae ko oti foki ne tali aka—e auala i te tagata e igoa ki a Iopu.

I te taimi ne ‵nofo ei a tino Isalaelu i Aikupito, kae ko Iopu, se kāiga o Apelaamo, ne nofo i te koga telā ko taku i aso nei ki a Alapi. I te taimi tenā, ne maopoopo a agelu o te lagi i mua o te Atua, kae ne aofia foki i ei a te agelu ‵teke, ko Satani. Ne fakaasi atu ne Ieova i mua o te maopoopoga faka-te-lagi, a tena loto talitonu ki tena tavini fakamaoni ko Iopu. A te ‵tonuga loa, ne fai atu a Ieova me e seai aka foki se tino e ‵pau tena fakamaoni mo Iopu. Kae ne fai atu a Satani me i a Iopu e tavini fua ki te Atua me ne fakamanuia kae puipui a ia ne te Atua. Ne ‵losi atu a Satani me kafai e ave keatea a mea katoa a Iopu, ka pati masei atu tou tagata ki te Atua.

Ne talia ne te Atua ke ave keatea ne Satani a koloa mo tama‵liki, mo te ola ‵lei o Iopu. E aunoa mo te iloa atu a te aofia o Satani i mea katoa konei, ne seki malamalama a Iopu i te pogai ne talia ne te Atua ke oko atu ki a ia a tofotofoga konei. Kae ko Iopu ne seki ‵teke atu eiloa ki te Atua.

Ne olo atu ki a Iopu a taugasoa ‵loi e tokotolu. E auala i olotou sau‵talaga kolā ne fakamau i te tusi o Iopu, ne taumafai a tāgata konei o fakatalitonu atu ki a Iopu, a te manatu ‵se me ko fakasala a ia ne te Atua, ona ko ana agasala ‵funa. Ne ‵losi atu foki latou me e se fia saga mai kae se talitonu foki te Atua ki ana tavini. Ne ‵teke atu a Iopu ki olotou manatu sē ‵tonu konā. Ne fai ‵tonu atu a Iopu mo te loto talitonu me ka tumau a ia i te fakamaoni ke oko ki tena mate!

Kae ne fai ne Iopu se mea ‵se, mai te manavase malosi ki te taumafaiga o ‵pulu tena amiotonu. Ne faipati aka se tamataene e igoa ki a Eliu, telā ne fakalogologo ki te sau‵talaga kātoa tenā. Ne polopoloki ne Eliu a Iopu ona ko tena fakatamala ke iloa me e sili atu i te tāua a te fakamaluga aka o te pulega sili a Ieova te Atua i lō so se isi tino. Ne polopoloki ‵mafa foki ne Eliu a taugasoa ‵loi o Iopu.

Tenā ne faipati atu ei a Ieova ki a Iopu o faka‵tonu aka ana mafaufauga. Mai te fakasino atu ki mea fakaofoofogia ne faite, ne akoako ne Ieova a Iopu, ke lavea ne ia a te foliki o te tagata māfai e fakatusa ki te maluga o te Atua. Ne talia ne Iopu mo te loto maulalo a pati fakatonutonu mai te Atua. A Ieova telā ne lasi ‵ki tena “alofa atafai mo te alofa fakamagalo” ne faka‵lei ne ia te masaki o Iopu, ne tapolo atu ne ia a te uke o ana mea ne maua i lō ana mea muamua, kae toe fakamanuia ne ia tou tagata ki tama‵liki e toko sefulu. (Iakopo 5:11) Mai te tumau i te fakamaoni ki a Ieova, faitalia a tofotofoga faiga‵ta, ne mafai ei ne Iopu o tali atu a fakamaseiga a Satani ne fai me ka se mafai ne tino o tumau i te fakamaoni ki te Atua māfai ko tofotofogina.

​—Mai te tusi o Iopu.