MATAUPU I TE ‵KAVA
Ko oi a Molimau a Ieova?
“Ko leva ne iloa ne au a Mike i te fia o tausaga. A ia se tokotasi o Molimau a Ieova. Kae ne ‵numi faeloa au i tena lotu. Ko oi a Ieova? Kaia e se fakamanatu ei ne Molimau a aso malō‵lo? E mata, ne aofia a Mike i se tamā potukau fakalotu fakamataku?”—Becky, California, Amelika.
“I te taimi ne kamata ei o sukesuke oku tuakoi ki te Tusi Tapu mo Molimau a Ieova, ne mafaufau au penei: ‘Se a te uiga o te igoa tenā, ko Molimau a Ieova? Ko oko eiloa i te fai fakaatea o te igoa tenei ke fakaigoa ki ei se lotu!’”—Zenon, Ontario, Kanata.
“Ne mafau‵fau eiloa māua mo taku avaga me ne āsi mai a Molimau a Ieova ke fakaaoga faka‵lei ne latou te avanoaga ona ko te ma‵sei o ma lagonaga me ne seki toe olo atu māua ki lotu. Kae ne fakaiku aka ne māua me kafai e se maua i lotu lauiloa a mea kolā ne salasala māua ki ei, e se mafai foki o maua a mea konā i se tamā potukau fakalotu ‵teke e pelā mo Molimau a Ieova.”—Kent, Washington, Amelika.
“E seai eiloa saku mea e iloa e uiga ki a latou mo te uiga o te lotou igoa.”—Cecilie, Esbjerg, Tenimaka.
Kāti ko oti eiloa ne lavea ne koe latou e talai atu mai fale ki fale io me se koga e tokouke i ei a tino, tufatufa atu ne latou a tusi faka-te-Tusi Tapu, kae ofo atu ne latou a akoga faka-te-Tusi Tapu sē ‵togi. Ko oti foki ne maua ne koe a te mekesini tenei mai i se tino i a latou, kae koi mafaufau eiloa koe me ko oi a Molimau a Ieova. E tai ‵pau ou mafaufauga mo latou kolā ne taku mai luga.
Kafai e isi ne au fesili mo mafaufauga penā, tefea te koga e mafai ei o maua ne koe a tali? E mafai pefea o iloa ne koe a mea kolā e tali‵tonu ki ei a Molimau a Ieova, te auala e maua ei olotou tupe ke ‵lago atu ki te lotou galuega mo olotou koga tapuaki, mo te pogai e āsi atu ei latou ki tou fale kae olo atu foki ki a koe i koga e tokouke a tino i ei?
“E faitau au ki mea e uke e uiga ki Molimau a Ieova i te Itaneti,” ko muna a Cecilie, telā ne taku atu mua. “Ne lagona ne au a nisi tala sē ‵tonu, kae ne fakalogologo au ki pati sē ‵tau e uke. Ona ko te mea tenā, ne maua ei ne au se kilokiloga masei ‵ki e uiga ki Molimau a Ieova.” Kae fakamuli ifo, ne faipati ‵tonu atu tou fafine ki Molimau a Ieova kae ne maua ne ia a tali fakama‵lie loto ki ana fesili.
E mata, e fia maua ne koe a tali ‵tonu ki au fesili e uiga ki Molimau a Ieova? E fakamalosi atu matou ki a koe ke ‵sala atu ki te koga telā e maua ei a toe fakamatalaga ‵tonu—ko Molimau a Ieova, kolā e ‵lomi ne latou te mekesini tenei. (Faataoto 14:15) E fakamoe‵moe matou me ka fesoasoani atu a mataupu konei e ‵soko mai ke iloa ne koe a mea e uiga ki a matou, mea e tali‵tonu matou ki ei, kae ke malamalama foki i te galuega e fai ne matou.
