Ne fanau au i se kogā koga telā e se ‵lasi malosi a ‵togi o tino i Bilbao, i te feitu ki mātū o Sepania. Au ko te tokolua o tamaliki i a matou tokofa. A te motou kāiga e ma‵losi ‵ki i te Lotu Katolika, kae ne kau atu au ki te Mass i aso katoa. I te taimi ko 23 ei oku tausaga, ne fai au mo fai se faiakoga​—se taleni telā ne fiafia malosi au ki ei kae ne aofia au i ei i se 40 tausaga. E aofia i nisi mataupu, ne fakamatamata malosi au ke akoako atu te lotu Katolika, kae ne galue au e pelā me se faiakoga o te lotu Katolika​—ke akoako atu a tama‵liki fafine kolā ko ‵kau atu ki te ‵kaiga a te Aliki mō te taimi muamua.

Mai tua o se 12 o tausaga o te ma olaga fakatauavaga fia‵fia, ne tiaki mai fua au mo tamaliki fafine e toko fa ke tausi atu ki a latou. Ko 33 fua oku tausaga i te taimi tenā! Ne taumafai au o ‵sala atu ki fakamafanafanaga i taku lotu Katolika, kae ne fakafoki‵foki atu faeloa ne au a fesili. Ne mafaufau au penei: ‘Kaia e tumau ei a tino i te ‵mate māfai ko oti ne fakasaoloto ne Keliso a tatou? Kaia e ‵talo atu ei tatou mō te Malo o te Atua ke oko mai māfai e olo atu a tino ‵lei ki te lagi?’ Kae e sili atu i mea katoa, ne mafaufau au penei: ‘Kafai e fakamasino ne te Atua a tatou māfai ko ‵mate, kaia e ‵tau o tiaki fakamuli ei ne tatou a te lagi, pekatuli, io me ko te afi i seoli mō te ‵toe fakamasinoga?’

Ne fai atu ne au a fesili konā ki nisi faifeau Katolika ne fetaui mo au. Ne tali mai se tino e tokotasi i a latou: “E se iloa ne au. Fesili atu ki te Bishop. Kaia e ‵tāua te mea tenā? E talitonu koe ki te Atua, ne? Tuku atu fua i ei penā!” Kae ne tumau eiloa au i te ‵sala atu ki tali. Fakamuli ifo, ne kau atu au ki lāuga ne fai ne te lotu Jesuits, Penitekoso, mo Tino sē Talitonu ki te Atua. Kae e seai eiloa se tino e maua ne ia a tali fakama‵lie loto ki aku fesili.

I te taimi ko 60 ei oku tausaga, ne ‵kami au ne se tamaliki fafine ko fitu ana tausaga ke kau atu ki se fakatasiga a Molimau a Ieova. Ne fiafia au ki mea ne lavea kae lagona ne au, kae ona ko te fakalavelave o toku olaga, ne seki toe fesokotaki au mo Molimau i te taimi tenā. I te lua tausaga mai tua ifo, ne tukituki mai i toku mataloa se tauavaga Molimau e igoa ki a Juan mo Maite. Ne ‵loto eiloa motou sau‵talaga ki te faiga o fesili mo tali mō se tolu masina, telā ne iku fakamuli atu ki se akoga faka-te-Tusi Tapu.

 Ko oko eiloa i toku olioli malosi ki sukesukega takitasi! Ne iloilo faka‵lei eiloa ne au a mea katoa, mai te fakaaoga o ‵fuliga e tolu o te Tusi Tapu ke fakamautinoa aka me e akoako eiloa ne Molimau a Ieova a te munatonu. E seki leva kae ne iloa aka ne au a toku ‵numi muamua i akoakoga fakalotu i te fia o tausaga. Ne loto mafatia au i te lasi o te ‵kese i te va o oku talitonuga muamua mo mea ko tauloto ne au mai te Tusi Tapu. Ne poi malosi au e pelā eiloa mo te fai o oku talitonuga mo fai se lakau malosi telā ne unu keatea mai te laukele.

Ne masaki malosi kae mate atu foki taku avaga i te lua. I te vaitaimi foki eiloa tenā, ne litaea au mai taku galuega kae ne tiakina ei ne au a Bilbao mō se vaitaimi leva. Ne olo atu foki keatea a Juan mo Maite. Ne fanoanoa au me ne taofi aka taku akoga faka-te-Tusi Tapu. Kae i toku ‵kanoloto tonu eiloa, ne iloa ne au me ko oti ne maua ne au se koloa. Ne seki puli eiloa i a au.

I se 20 tausaga mai tua ifo i ei, i te taimi ko 82 ei oku tausaga, ne ‵foki atu a Juan mo Maite ki Bilbao kae ne āsi atu ki a au. Ko se faka‵tau eiloa i toku fiafia ke toe fetaui matou! Ne iloa ei ne au me ne seki puli eiloa au i a Ieova, kae ne toe kamata taku akoga. Ne lasi eiloa te kufaki o Juan mo Maite i a au, me e fakafokifoki atu faeloa ne au a fesili mau ei. Ne manako au ke fakalogologo faeloa ki fakamatalaga ‵tonu i te Tusi Tapu ko te mea ke fakaseai atu oku lagonaga ki oku talitonuga mua. Ne manako foki au ke toka ‵lei o fakamatala atu a munatonu i te Tusi Tapu ki oku taugasoa mo kāiga.

A te aso ne papatiso ei au​—kae ko 87 oku tausaga​—ko te ‵toe taimi fakafiafia eiloa i toku olaga. Ne fai te papatisga fakatasi mo se fono o te fenua a Molimau a Ieova. Ne fai ne se toeaina Kelisiano se lāuga telā e fakavae ki te Tusi Tapu kae ne fai ‵tonu mai eiloa ki a matou kolā ka papatiso. Ne otia toku loto i te lāuga, telā ne tagi ei au. Ne fakalogologo au ki ei e pelā eiloa me ko Ieova telā e faipati mai ki a au. I te otiga o taku papatisoga, e lau i te fia o Molimau ne o‵mai o fakamālō mai ki a au​—faitalia me ne seki fetaui aka eiloa matou mo te tokoukega o latou!

Ne iloa faeloa ne au me i a Iesu Keliso ko “te auala.” (Ioane 14:6) Kae ko taku sukesukega ki te Tusi Tapu ne fai eiloa ke iloa ne au a Ieova, ko te tino telā e takitaki ne Iesu a tatou ki ei. Nei la, ko mafai o ‵talo atu au ki te Atua e pelā me se Tamana mo se Taugasoa pele. A te faitau ki te tusi ko te Draw Close to Jehovah * ko te kamataga o te ‵fuliga o toku olaga. Ne faitau muamua eiloa ne au i se po fua e tasi! Ne otia toku loto ke iloa atu me ko oko eiloa i te lasi o te alofa fakamagalo o Ieova.

I te ‵toe kilo atu ki te vaitaimi leva ne ‵sala atu ei ki muna‵tonu fakalotu, ne mafaufau au ki pati a Iesu: “Tumau i te fakamolemole atu, kae ka tuku atu ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala atu ki a koutou.” (Mataio 7:7) Nei la, ko oti ne maua ne au a tali kolā ne manako malosi au ki ei, e aumai i ei a te fiafia lasi ke fakaasi ki nisi tino.

I te taimi ko 90 ei oku tausaga, ne lagona ei ne au toku foliki i te feitu faka-te-agaga. I fakatasiga katoa e kau atu ki ei i te Kingdom Hall, e fai eiloa pelā me se taimi fakapito​—ke maua ei a te malamalama tāua mo te ‵kau fakatasi mo oku taina mo tuagane pele. E olioli eiloa au ke toe fai au mo fai se faiakoga i te lalolagi Palataiso telā ko oti ne folafola mai. (Fakaasiga 21:3, 4) Kae e olioli malosi foki eiloa au ke fetaui mo tino pele kolā ko oti ne ‵mate ke toe ‵foki mai ki te ola kae ke maua se avanoaga ke akoako atu a muna‵tonu i te Tusi Tapu ki a latou. (Galu. 24:15) Ko oko eiloa i toku manako malosi ke fakamatala atu ki a latou a te meaalofa tāua ne tuku mai ne Ieova i te taimi ko lōmatua ei au!