Ne faite ne te Atua ‵tou foitino i se auala fakaofoofogia telā e mafai o faka‵lei ne ia i a ia eiloa a pa‵kiaga. Kafai tatou e pa‵kia, ma‵fole io me ‵pu i se mea, “e isi eiloa se auala e galue i ei te foitino ki te faka‵leiga o koga pa‵kia ‵lasi io me fo‵liki.” (Johns Hopkins Medicine) Ka gasuesue fakavave se vaega i te foitino ke fakagata aka a te toto, faka‵lasi aka a uaua kolā e fano i ei te toto, faka‵lei te pakiaga, kae fakamalosi aka a sela o te foitino.

MAFAUFAU KI TE MEA TENEI: Kafai ne faite ne te ‵tou Mafuaga a ‵tou foitino ke mafai o faka‵lei ne ia i a ia eiloa a pa‵kiaga, e mata, e se mafai o loto tali‵tonu tatou ki tena folafolaga ke fesoasoani mai o faka‵lei tatou mai ‵tou pa‵kiaga i mea tau lagonaga? “E faka‵lei aka ne ia a tino loto mafatia,” ko pati a te faisalamo. “E fusi ne ia olotou pa‵kiaga.” (Salamo 147:3) Kafai e logo‵mae koe i mea tau lagonaga io me ko te loto mafatia, e mafai pefea o mautinoa i a koe me ka faka‵lei aka ne Ieova a ou pa‵kiaga—i te taimi nei penā foki mo aso mai mua?

E tauto mai te Atua: “Sa mataku, me i a au e fakatasi atu ki a koe. Sa manavase, me i a au ko tou Atua. Ka fakamalosi ne au a koe, ao, ka fesoasoani atu au ki a koe.” (Isaia 41:10) A te tino telā e iloa ne ia me e atafai atu a Ieova ki a ia e maua ne ia te filemu o te mafaufau mo te malosi ke fakafesagai atu ki fakalavelave kese‵kese. Ne taku ne te apositolo ko Paulo a te lagonaga tokagamalie tenei ki te “filemu o te Atua telā e sili fakafia atu i mea katoa kolā e malamalama i ei a tino.” Ne toe fakaopoopo mai a Paulo, penei: “Me e maua ne au te malosi i mea katoa e auala i a ia telā ne tuku mai ne ia te ‵mana ki a au.”—Filipi 4:4-7, 9, 13.

E fesoasoani mai te Tusi Tapu ke ati aka ne tatou te fakatuanaki ki folafolaga a Ieova mō te olaga i aso mai mua mō tino katoa. E pelā me se fakaakoakoga, e fakaasi mai i te Fakaasiga 21:4, 5 (e siki mai i te suā itulau) a mea kolā ka fai ne ia mo te pogai e ‵tau ei o tali‵tonu tatou me ka fai ne ia a mea konā:

• “Ka ‵solo kea‵tea ne ia a loimata katoa” mai mata o tino. Ka fakaseai ne Ieova a ‵tou logo‵maega katoa mo te manavase, ke oko foki eiloa ki manava‵sega kolā e foliga mai me e se tāua ki nisi tino.

• Kafai ko “sagasaga i luga i te nofogaaliki” ‵malu i te lagi, ka fakaaoga ne te Tupu Malosi Katoatoa telā ne faite ne ia a mea katoa a tena ‵mana mo tena malosi pule ke faka‵lei aka a logo‵maega kae tuku mai ne ia te fesoasoani telā e ma‵nako tatou ki ei.

• E fakatalitonu mai a Ieova me i ana folafolaga e “fakamaoni kae ‵tonu.” Ko tena uiga, e fakaaoga ne ia tena igoa mo tena tulaga e pelā me ko te Atua tonu ke fakataunu ei ana folafolaga.

“‘Ka ‵solo kea‵tea ne ia a loimata katoa mai i olotou mata, kae ka se toe ai se mate, ka se toe ai foki se fanoanoa, se tagi io me se ‵mae. Ko palele atu a mea mua.’ Kae ko te Atua telā e sagasaga i luga i te nofogaaliki, ne fai mai: ‘Kiloke! Ko faka‵fou ne au a mea katoa.’ Ne fai mai foki a ia: ‘Tusi ki lalo, me i pati konei e fakamaoni kae ‵tonu.’”—Fakaasiga 21:4, 5.

E fakaasi mai i mea i te iunivesi mo te Tusi Tapu a uiga mo faifaiga a te ‵tou Tamana faka-te-lagi. E tiga eiloa e fai a mea ne faite e pelā me se ‵kamiga tonu ke iloa ne tatou te Atua e pelā me se Taugasoa pili, kae e toe fakalauefa mai foki i te Tusi Tapu a te ‵kamiga tenā, penei: “Fakapilipili atu ki te Atua, kae ka fakapilipili mai a ia ki a koutou.” (Iakopo 4:8) E fai mai te Galuega 17:27: “A ia e se ‵mao mai i a tatou taki tokotasi.”

I te taimi e taumafai ei koe o tauloto e uiga ki te Atua, ka momea aka eiloa tou loto talitonu me “e atafai a ia ki a [koe].” (1 Petelu 5:7) Ne a mea aoga e mafai o maua ne tatou mai te tali‵tonu ki a Ieova?

Mafaufau ki te tala o Toru, mai Tiapani. Ne puti aka a ia ne se mātua Kelisiano, kae ne aofia eiloa tou tagata i se potukau amio fakasaua ko te yakuza, te kau o te Mafia i Tiapani. Ne fai mai a ia, “Ne talitonu au me ne takalialia mai te Atua, kae ne mafaufau au me i te ‵mate atu o tino, maise loa a latou kolā e pele ki a au, se fakasalaga o oku.” E fai ‵tonu mai a Toru, me ne fai a ia e pelā me se “tino sē alofa kae sē atafai” i te lalolagi masei tenei. Ne toe fai mai a ia e uiga ki tena manakoga, “Ne manako eiloa au o mate foliki i te otiga ne tamate ne au se tino telā e takutakua atu i a au kae ke fai ei ke takutakua toku igoa.”

Kae i te taimi ne suke‵suke ei a Toru mo tena avaga ko Hannah ki te Tusi Tapu, ne fai ne Toru a ‵fuliga ‵lasi  i tena olaga e penā foki mo tena kilokiloga. “Ne lavea faka‵lei ne au a ‵fuliga ne fai ne taku avaga,” ko pati a Hannah. Nei la, e fai mai a Toru mo te mautinoa penei: “E isi se Atua telā e atafai malosi mai ki a tatou taki tokotasi. E se manako a ia ke mate so se tino, kae e toka a ia o fakamagalo a latou kolā e sala‵mo tonu ki olotou mea ‵se ne fai. E fakalogologo mai a ia ki mea kolā e se mafai o fai ne tatou ki se isi tino kae na ko ia fua me seai se tino e mafai o malamalama i ei. I se taimi pili mai mua nei, ka fakaseai atu ne Ieova a fakalavelave katoa, logo‵maega mo te loto mafatia. Ke oko foki ki te taimi nei, koi fesoasoani mai eiloa a ia ki a tatou i auala seki fakamoemoegina. E atafai kae faka‵sao ne ia tatou māfai e loto vāi‵vai.”—Salamo 136:23.

E pelā mo te tala o Toru, a te iloa atu me e mafai kae ko pili foki o fakaseai atu ne te Atua a fakalavelave katoa kae ‵solo kea‵tea ne ia loimata katoa, e tuku mai eiloa ki a tatou se fakamoemoega kae fesoasoani mai foki ke ola tatou i se olaga gali i te taimi nei. Ao, e mafai eiloa o maua ne koe a mea aoga mai te alofa atafai o te Atua i loto foki loa i se vaegā lalolagi telā e ‵fonu i logo‵maega.