A te loto alofa ne ‵fuli ki te “atamai ke fakaasi atu foki a lagonaga loto alofa ki te suā tino io me mafaufau pelā me tu atu koe i te tulaga o te tino tenā.” E fai mai a te tokitā atamai ko Rick Hanson, me i te “loto alofa se uiga telā ne fa‵nau mai mo tatou.”

MAFAUFAU KI TE MEA TENEI: Kaia ne fa‵nau mai ei tatou mo te uiga ko te loto alofa, se uiga se fakanafagina mai nisi uiga aka foki? E fakamatala mai te Tusi Tapu me ne faite ne te Atua a tino ki tena fakatusa. (Kenese 1:26) Ne faite eiloa tatou ki te fakatusa o te Atua me e mafai o fakaata atu ne tatou ana uiga kae fakaasi atu foki i se auala lasi a ana nisi uiga ‵lei. Tela la, kafai e fakamalosi aka ne te loto alofa a tino atafai ke fesoasoani atu ki nisi tino, e fakaata atu ne latou a te loto alofa o te ‵tou Mafuaga alofa atafai, ko Ieova te Atua.—Faataoto 14:31.

E isi se loto alofa o te Atua mō tatou kae e takalialia a ia māfai e lavea ne ia tatou e logo‵mae. E uiga ki tino Isalaelu mua kolā ne puapuaga i te ‵nofo pologa i Aikupito penā foki mo te ‵nofo atu i te koga lavaki mō tausaga e 40, e fai mai te Tusi Tapu: “I olotou puapuaga katoa ne puapuaga eiloa a ia.” (Isaia 63:9) Mafaufau la me ne lavea ‵lei ne te Atua a te lotou puapuaga. Ne lagona ne ia te lotou logo‵mae. Ne fai mai a ia, “E iloa ‵lei ne au te lotou logo‵mae.” (Esoto 3:7) “So se tino telā e fakapatele atu ki a koutou,” ko muna a te Atua, “ko fakapatele eiloa ki toku ‵kano mata.” (Sakalia 2:8) Kafai e fakalogo‵mae ne nisi tino a tatou, e logo‵mae foki a ia fakatasi mo tatou.

E fakatalitonu mai te Tusi Tapu me faitalia me taku fakamasei io me mafaufau me e se ‵tau o maua ne tatou te loto alofa o te Atua, kae e “sili atu te Atua i ‵tou loto kae e iloa ne ia a mea katoa.” (1 Ioane 3:19, 20) E iloa faka‵lei ne te Atua tatou i lō tatou eiloa. E malamalama katoatoa a ia i ‵tou fakanofonofoga, mafaufauga mo lagonaga. E fakaasi mai ne ia te loto alofa ki a tatou.

 E fakatalitonu mai te Tusi Tapu

• “Ko kalaga atu ei koe, kae ka tali mai a Ieova; ka tagi atu koe mō se fesoasoani, kae ka fai mai a ia, ‘Tenei au!’”—ISAIA 58:9.

• “‘Me iloa ‵lei ne au a mafaufauga e mafaufau ne au e uiga ki a koutou,’ ko te folafolaga a Ieova, ‘ko mafaufauga o te filemu, kae e se ko fakalavelave, ke tuku atu ki a koutou a aso mai mua mo se fakamoemoega. Kae ka ka‵laga mai koutou ki a au kae o‵mai o ‵talo ki a au, kae ka fakalogo atu au ki a koutou.’”—IELEMIA 29:11, 12.

• “E tausi ne koe oku loimata i loto i tau fagu ne faite ki pa‵kili o manu. E a, e se tusi a mea konā i loto i tau tusi?”—SALAMO 56:8.

E mata, a te iloa me i te Atua e loto alofa e fesoasoani mai ke fakafesagai atu tatou ki se fakalavelave? Ke mafau‵fau ki te tala o Maria:

“Ne mafaufau au i te olaga e faigata kae masei i te taimi ne logo‵mae malosi au i te galo atu o taku tamaliki tagata ko 18 ana tausaga telā ne maua ne te kenisa i tausaga e lua. Ne kaitaua au ki a Ieova me e se gasuesue o faka‵lei aka tou tagata!

“I se ono tausaga fakamuli ifo, ne fakalogologo mai se taugasoa i te fakapotopotoga mo te alofa i te taimi ne fakaasi atu ne au ki ei oku lagonaga me e se alofa mai a Ieova. Mai tua o te fakalogologoga ki a au mō se fia itula e aunoa mo se pati, ne siki mai ne ia se fuaiupu telā ne otia ei au. Ko te 1 Ioane 3:19, 20, telā e fai mai: ‘A te Atua e sili atu i ‵tou loto kae e iloa ne ia a mea katoa.’ Ne fakamatala mai ne ia me e malamalama a Ieova i ‵tou puapuaga.

“Kae e ui i ei, ne faigata ‵ki eiloa ke ave kea‵tea ne au te kaitaua! Kae ne faitau ne au te Salamo 94:19, telā e fai penei: ‘Kafai ko uke a mea e manavase au ki ei, e fakamafanafana kae fakafiafia ne koe au.’ Ne mafaufau au me i te fuaiupu tenā ne tusi eiloa mō au! Fakamuli ifo, ne maua ne au se fakamafanafanaga ke mafai o faipati atu ki a Ieova e uiga mo toku fakalavelave, mo te iloa me e fakalogologo kae e malamalama a ia i ei.”

Se fakamafanafanaga ke iloa atu me e malamalama kae atafai mai te Atua ki a tatou! Kae kaia la ko uke katoa i ei penei a logo‵maega? E a, e fai penei ona ko te mea e fakasala ne te Atua tatou ona ko ‵tou mea ‵se? E mata, ka fai eiloa ne te Atua se mea ke fakaseai atu ei a logo‵maega katoa? Ka faka‵mafa mai eiloa a mea konei i mataupu konei mai tua.