A TE sē fakamaoni o se tino avaga se mea fakafanoanoa ‵ki. E tonu, nisi tino a‵vaga ne mafai ne latou o fakamagalo a olotou avaga kolā ne seki fakamaoni ki a latou kae toe ati aka olotou fesokotakiga ‵pili. * Kae faitalia me ‵tala te avaga io me ikai, kae ko latou kolā ne iloa aka ne latou me ne seki fakamaoni olotou avaga ki a latou e logo‵mae ‵ki loa i olotou loto. E mafai pefea o kufaki ne latou olotou lagonaga logo‵mae konā?

Faitalia te logo‵mae i te loto, a avaga kolā ne seki fai ne latou a mea ‵se ne maua eiloa ne latou a fakamafanafanaga mai i te Tusi Tapu. Ne iloa aka ne latou me atafai atu eiloa te Atua ki olotou lagonaga logo‵mae.—Malaki 2:13-16.

“Kafai ko uke a mea e manavase au ki ei,e fakamafanafana kae fakafiafia ne koe au.”—Salamo 94:19.

“I te taimi ne faitau ne au te fuaiupu tenā, ne fakaataata ne au a Ieova e fakamafanafana ne ia toku logo‵mae, e pelā eiloa me se tamana alofa atafai,” ko pati a Bill.

“A koe e alofa tumau ki te tino telā e alofa tumau ki a koe.”—Salamo 18:25.

“A taku avaga tagata ne seki fakamaoni mai ki a au,” ko pati a Carmen, telā tena avaga ne amio penā mō se fia masina. “Kae ko au ne talitonu ki te fakamaoni o Ieova. E se mafai o fakafanoanoa ne ia au.”

“Ke mo a ma manava‵se ki so se mea, kae ke tuku atu a mea katoa kolā e ma‵nako koutou ki te Atua . . . e auala i otou talosaga; kae ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto.”—Filipi 4:6, 7.

“E faitau faeloa ne au te fuaiupu tenei fakafia taimi,” ko pati a Sasha. “I taimi e fai faeloa ne au aku ‵talo, e tuku mai eiloa ne te Atua a te filemu ki toku olaga.”

A latou konei ne fakamatala atu mai luga toeitiiti kae ‵fiu latou. Kae ko latou ne tali‵tonu eiloa ki a Ieova te Atua kae maua a fakamalosiga mai i a ia e auala i tena Muna. Ne fai mai a Bill, penei: “Ne aoga eiloa toku olaga ona ko toku fakatuanaki faitalia me ko sē aoga a mea katoa. E tiga eiloa e sasale au ‘i te vanu pouli kae ‵poko,’ ne fakatasi mai eiloa te Atua ki a au.”—Salamo 23:4.