E FESILI MAI A TALAVOU
Kaia e ‵Tau ei mo Au o ‵Talo?
E ‵tusa mo se sukesukega ne fai, e ‵tusa mo te 80 pasene o talavou i Amelika e ‵talo sāle, kae se āfa fua mai i a latou konā e ‵talo i aso takitasi. E se tioa eiloa o mafau‵fau a nisi o latou penei: ‘E mata, e fai fua ne ‵talo ke ‵lei oku lagonaga, io me isi aka foki se mea tāua mai i ei?’
Se a te ‵talo?
A te ‵talo ko te auala e fesokotaki atu ei ki te Mafuaga o mea katoa. Mafaufau ki te uiga o te mea tenā! A Ieova ko te ‵toe tino maluga i tino katoa, kae “e se ‵mao [a ia] mai i a tatou taki tokotasi.” (Galuega 17:27) A te ‵tonuga loa, e maua i te Tusi Tapu a te ‵kamiga gali tenei: “Fakapilipili atu ki te Atua, kae ka fakapilipili mai a ia ki a koutou.”—Iakopo 4:8.
E mafai pefea o fakapilipili atu koe ki te Atua?
Te auala e tasi ko te ‵talo—tenā te auala e faipati ei koe ki te Atua.
A te suā auala ko te sukesuke ki te Tusi Tapu—tenā te auala e “faipati” atu ei te Atua ki a koe.
A te vaegā fesokotakiga tenei—‵talo mo te sukesuke ki te Tusi Tapu—ka fesoasoani atu ke ati aka ne koe se va fakataugasoa ‵pili mo te Atua.
“A te faipati ki a Ieova, telā ko te fesokotaki atu ki te ‵Toe Tino Maluga, se tauliaga tafasili i te gali e tasi telā e mafai o maua ne tino.”—Jeremy.
“A te fakaasi atu o oku lagonaga ‵tonu ki a Ieova e auala i ‵talo, e fai ei ke pili malosi atu au ki a ia.”—Miranda.
E mata, e fakalogologo mai te Atua?
Faitalia me talitonu koe ki te Atua—io me ‵talo koe ki a ia—e mafai o faigata ke talia ne koe te manatu me e fakalogologo mai eiloa a ia. Kae ui ei, e taku ne te Tusi Tapu a Ieova me ko te “Tino e Lagona ne ia a ‵talo.” (Salamo 65:2) E ‵kami foki ne ia koe ke ‵pei atu ou “manavasega katoa ki luga i a ia.” Kaia? “Me e atafai a ia ki a koutou.”—1 Petelu 5:7.
Mafaufau ki te mea tenei: E mata, e fakaaoga ne koe a taimi ke faipati sāle atu ki ou taugasoa ‵pili? E mafai foki o faipati atu koe penā ki te Atua. Kalaga atu ki a ia i taimi katoa e auala i ‵talo, kae ke fakaaoga ne koe tena igoa, ko Ieova. (Salamo 86:5-7; 88:9) E tonu, e ‵kami koe ne te Tusi Tapu ke “‵talo i taimi katoa.”—1 Tesalonia 5:17.
“A te ‵talo ko te auala e fesokotaki atu ei au ki toku Tamana i te lagi, ko te taimi e fakaasi atu ei ne au a mea katoa i toku loto.”—Moises.
“E faipati au ki a Ieova e uiga ki mea ‵loto, e pelā loa mo au ma faipati ki toku mātua io me se taugasoa pili.”—Karen.
Ne a mea e mafai o ‵talo au ki ei?
E fai mai te Tusi Tapu: “Tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga.”—Filipi 4:6.
E mata, e fakauiga i ei me se mea ‵lei ke ‵talo atu e uiga mō ou fakalavelave? Ao! E fai mai te Tusi Tapu: “‵Pei atu tau amoga ki a Ieova, kae ka tausi ne ia koe.”—Salamo 55:22.
E tonu, e ‵tau foki o faipati atu koe i au ‵talo ki te Atua e uiga ki nisi mea, kae e se ko ou fakalavelave fua. “E se mafai o gali te mā va fakataugasoa māfai e fakamolemole atu fua au ki a Ieova ke fesoasoani mai,” ko pati a se talavou fafine e igoa ki a Chantelle. “E mafaufau au me i te fakaasiatuga o te loto fakafetai ko te mea muamua e ‵tau o fai kae e ‵tau o uke atu a mea e loto fakafetai au ki ei.”
Mafaufau ki te mea tenei: Ne a mea e loto fakafetai koe ki ei i tou olaga? E mata, e mafai o mafaufau koe ki mea e tolu ke fakafetai atu ki a Ieova i te aso nei?
“Ke oko foki loa ki se mea foliki, pelā me se pulalakau telā ne gali ki a koe, e mafai o fakamalosi aka ei tatou ke ‵talo o fakafetai atu ki a Ieova.”—Anita.
“Mafaufau ‵loto ki se meane faite ne te Atua telā ne gali ki a koe io me se fuaiupu i te Tusi Tapu telā ne otia malosi tou loto i ei, ko fakafetai atu ei ki a Ieova mō te mea tenā.”—Brian.