E pelā me se vaega o olotou meaalofa ke ‵lago atu ki te tapuakiga tonu, ne fakatonu atu ki te kau Isalaelu i aso mua ke tuku atu te tasi-vae-sefulu, * o olotou mea e maua i te tausaga. Ne fai atu a te Atua ki a latou: “E se ‵tau eiloa o fakatamala koe o tuku atu te tasi-vae-sefulu o au fuataga katoa i tou fatoaga i tausaga takitasi.”—Teutelonome 14:22.

A te fakatonuga ki te tasi-vae-sefulu se vaega o te Tulafono Faka-Mose, se tulafono telā ne tuku atu ne te Atua ki te kau Isalaelu mua. E se ‵nofo a Kelisiano mai lalo i te Tulafono a Mose kae e se manakogina foki a te tasi-vae-sefulu mai i a latou. (Kolose 2:13, 14) I lō te fai penā, a Kelisiano taki tokotasi e tuku atu ne latou a meaalofa tupe e ‵tusa mo “te mea telā ko oti ne fakaiku aka i tena loto, ke se fai mo te fameo io me ko te faimālō, me i te Atua e alofa ki te tino telā e tuku atu ana mea mo te loto fiafia.”—2 Kolinito 9:7.

•  Tasi-Vae-Sefulu i te Tusi Tapu​—Te “Feagaiga Mua”

•  Tasi-Vae-Sefulu i te Tusi Tapu​—Te “Feagaiga Fou”

A te tasi-vae-sefulu e taku mai i nai taimi i vaega o te Tusi Tapu telā e lauiloa sāle e pelā me ko te Feagaiga Mua. A te ukega o taimi e fakasino atu ki se vaitaimi mai tua o te Tulafono (te Tulafono faka-Mose) telā ne tuku atu ki te kau Isalaelu e auala i a Mose. Kae ne fakasino atu ki ei i nai taimi mai mua atu i ei.

Mai Mua o te Tulafono Faka-Mose

A te tino muamua ne fakamau ki lalo telā ne ofo atu ne ia te tasi-vae-sefulu ko Apelamo (Apelaamo). (Kenese 14:18-20; Epelu 7:4) E foliga mai me i te tasi-vae-sefulu ne tuku atu ne Apelaamo se meaalofa telā ne fai fakatasi fua ne ia ki te tupu-faitaulaga o Salema. E seai se fakamaoniga i te Tusi Tapu me i a Apelaamo io me ko ana tama‵liki ne toe tuku atu ne latou a te tasi-vae-sefulu.

A te lua o tino ne taku mai i te Tusi Tapu telā ne ofo atu ne ia te tasi-vae-sefulu ko te mokopuna o Apelaamo ko Iakopo. Ne tauto atu a ia me kafai e fakamanuia atu te Atua ki a ia, ka tuku atu ne ia ki te Atua a “te tasi-vae-sefulu o mea katoa” e maua ne ia. (Kenese 28:20-22) E ‵tusa mo fakamatalaga a nisi tino ‵poto, kāti ne ‵togi atu ne Iakopo a te tasi-vae-sefulu tenei mai i taulaga o manu ne ofo atu ne ia. E tiga eiloa ne fai ne Iakopo a te tautoga tenei, ne seki fakamalosi atu a ia ki tena kāiga ke tuku atu foki ne latou a te tasi-vae-sefulu.

Mai Lalo i te Tulafono a Mose

Ne fakatonu atu ki te kau Isalaelu mua ke tuku atu a te tasi-vae-sefulu e pelā me se auala ke ‵lago atu ki olotou faifaiga fakalotu.

• A te tasi-vae-sefulu ne tuku atu ki tino ga‵lue tumau i faifaiga fakalotu—te kau Levi, e aofia i ei a faitaulaga—kolā e seai ne olotou laukele ke ‵toki ei olotou fatoaga. (Numela 18:20, 21) A te kau Levi kolā e se ne faitaulaga e maua ne latou a te tasi-vae-sefulu mai i tino kae e tuku fakameaalofa atu foki ne latou “se tasi-vae-sefulu o te tasi-vae-sefulu” ki faitaulaga.—Numela 18:26-29.

• E foliga mai me ne manakogina a te tasi-vae-sefulu i taki lua tausaga, telā ne aoga ki te kau Levi mo nisi matakāiga. (Teutelonome 14:22, 23) Ne fakaaoga ne kāiga Isalaelu a te fakatokaga tenei i ‵kaiga fia‵fia fakapito, mo nisi tausaga ke aoga tasi ki a latou mo tino ma‵tiva i te lotou tausiga.—Teutelonome 14:28, 29; 26:12.

Ne fakagalue aka pefea te tasi-vae-sefulu? Ne tuku fakaatea ne tino Isalaelu a te tasi-vae-sefulu o fuataga e maua ne latou i olotou laukele i tausaga katoa. (Levitiko 27:30) Kafai ne filifili aka ne latou ke tuku atu te tasi-vae-sefulu e auala i tupe i lō mea ne maua i te laukele, e ‵tau o fakaopoopo atu ki te aofaki tenā i se 20 pasene. (Levitiko 27:31) Ne fakatonu atu foki ki a latou ke tuku atu “te tasi-vae-sefulu o te lafu pulumakau mo te lafu mamoe.”—Levitiko 27:32.

Ke fakaiku aka a te tasi-vae-sefulu o olotou manu, ne ‵tau o fili ne te kau Isalaelu so se manu i te sefulu mai i manu kolā e ulu mai ki tua mo te lulu. Ne fai mai te Tulafono me ne seki mafai o iloilo io me sui ne latou a manu konei, io me e ‵fuli ki tupe. (Levitiko 27:32, 33) Kae ko te lua o taimi e fai ei te tasi-vae-sefulu telā e fakaaoga ki ‵kaiga fia‵fia, e mafai o ‵fuli ki tupe. Ne ‵lei a te fakatokaga tenei mō tino Isalaelu kolā ne ‵tau o faima‵laga ke ‵kau atu ki ‵kaiga fia‵fia konei.—Teutelonome 14:25, 26.

Ko taimi fea ne ‵tau o tuku atu ne te kau Isalaelu a te tasi-vae-sefulu? Ne tuku atu ne te kau Isalaelu a te tasi-vae-sefulu i tausaga katoa. (Teutelonome 14:22) Kae ne taofi aka a te fakatokaga tenei i taki fitu tausaga katoa. A te tausaga tenā ko te sapati, io me ko te tausaga o malōlōga, telā ne seki ‵tau o ga‵lue a te kau Isalaelu i te ‵tokiga o olotou fatoaga. (Levitiko 25:4, 5) E ‵tusa mo te fakanofonofoga fakapito tenei, e seai se tasi-vae-sefulu e ‵tau o tuku atu i te taimi o te taukai. I taki tolu mo taki ono tausaga o te fitu tausaga o te Sapati, ne ‵tau o fakaaoga fakatasi ne te kau Isalaelu mo tino ma‵tiva mo te kau Levi a te tasi-vae-sefulu telā e tuku atu i te lua o taimi.—Teutelonome 14:28, 29.

Se a te fakasalaga māfai e se tuku atu a te tasi-vae-sefulu? E seai se fakasalaga ne taku mai i te Tulafono faka-Mose māfai e se tuku atu te tasi-vae-sefulu. A te tasi-vae-sefulu se tiute tāua ‵ki. Ne ‵tau o fakaasi atu ne te kau Isalaelu i mua o te Atua, me ko oti ne tuku atu ne latou te tasi-vae-sefulu kae akai atu mō tena fakamanuiaga, ona ko te faiga ne latou te mea tenā. (Teutelonome 26:12-15) Ne kilo atu te Atua ki te taofiga o te tasi-vae-sefulu e pelā me ko kaisoa ne koe ana mea.—Malaki 3:8, 9.

E mata, ne fai a te tasi-vae-sefulu mo fai se amoga ‵mafa ‵ki? Ikai. Ne tauto atu te Atua ki te fenua me kafai e tuku atu ne latou te tasi-vae-sefulu, ka ‵ligi mai ne ia ana fakamanuiaga ki luga i a latou kae ka seai se mea e ma‵tiva latou i ei. (Malaki 3:10) I te suā feitu, ne logo‵mae te fenua māfai e se tuku atu ne latou te tasi-vae-sefulu. Ne galo atu i a latou te fakamanuiaga a te Atua kae ne seki maua ne latou a mea aoga mai i galuega a faitaulaga mo te kau Levi kolā ko se tausi atu latou ki ei.—Neemia 13:10; Malaki 3:7.

I te taimi koi ola ei a Iesu i te lalolagi, koi manakogina a te tasi-vae-sefulu mō tino tapuaki a te Atua. Kae ko te fakatokaga tenei ne oti atu mai tua o te mate o Iesu.

I aso o Iesu

I te Feagaiga Fou, ne fakaasi mai i te Tusi Tapu me ne tumau eiloa te kau Isalaelu i te tukuatuga o te tasi-vae-sefulu i te taimi ne nofo mai ei a Iesu i te lalolagi. Ne iloa ne ia me i te tasi-vae-sefulu se tiute o latou, kae ne taku fakamasei ne ia a takitaki lotu kolā ne faimalo ne latou a tino ke tuku atu te tasi-vae-sefulu kae “fakaseaoga ne [latou] a vaega tāua o te Tulafono, e pelā mo fakamasinoga ‵tonu, te alofa fakamagalo mo te fakamaoni.”—Mataio 23:23.

Mai tua o te mate o Iesu

Ne seki toe manakogina te tasi-vae-sefulu mai tua o te mate o Iesu. A te mate o Iesu e pelā me se taulaga ne ‵solo, io me ne fakagata atu ei a te Tulafono Faka-Mose, e aofia i ei te ‘fakatonuga ke ‵tae a te tasi-vae-sefulu.’—Epelu 7:5, 18; Efeso 2:13-15; Kolose 2:13, 14.