Te Tusi i te Lua ki te Kau Kolinito 9:1-15
9 Nei la, e uiga ki te galuega mō tino tapu,+ e se manakogina malosi ke tusi atu au ki a koutou,
2 me e iloa ne au te otou loto fesoasoani telā ne faipati fakamatamata ei au ki Kelisiano i Maketonia, me ko tasi nei te tausaga ne toka ei te kau i Akaia, kae ko oti ne fakamalosi atu a te otou loto finafinau ki te tokoukega o latou.
3 Kae ko uga atu ne au a taina, ko te mea ke se fakaseaoga ei te motou fai‵pati fakamata‵mata e uiga ki a koutou, kae ke toka faka‵lei koutou, e pelā eiloa mo aku pati i a koutou e toka.
4 Me kafai e olo atu matou mo taina mai Maketonia kae e maua aka i a koutou e se toka, ko masiasi ei matou fakatasi mo koutou ona ko te motou loto tali‵tonu ki a koutou.
5 Tela la, ne mafaufau au me e ‵tau o fakamalosi atu ki taina ke olo muamua atu ki a koutou ke na fakatoka otou meaalofa kolā ne tauto mai koutou ki ei, ko te mea ke toka e pelā me se meaalofa ne tuku atu mo te kaimalie kae e sē se mea ne faimālō.
6 Kae e pelā mo te mea tenei, so se tino telā e mu‵tana ana mea ne ‵toki ka mu‵tana foki ana mea e tau, kae ko so se tino telā e uke ana mea ne ‵toki ka uke foki ana mea e tau.+
7 Ke fai ne tino taki tokotasi te mea telā ko oti ne fakaiku aka i tena loto, ke se fai mo te fameo io me ko te faimālō,+ me i te Atua e alofa ki te tino telā e tuku atu ana mea mo te loto fiafia.+
8 E se gata i ei, e mafai ne te Atua o fakalasi atu a tena alofa tauanoa ki a koutou, ko te mea ke lava faeloa otou mea i feitu katoa, kae ke uke otou mea mō te faiga o galuega ‵lei katoa.+
9 (E pelā eiloa mo pati i te tusi: “Ko oti ne tufa atu ne ia a mea ki tino e tokouke; ko oti ne tuku atu ne ia a mea ki tino ma‵tiva. E tumau eiloa tena amiotonu ki te se-gata-mai.”+
10 A te Atua telā e tuku atu ne ia a fuaga e uke ki te tino fai fatoaga mo falaoa ke ‵kai ki ei, ka tuku atu kae fakauke aka foki ne ia a fuaga ke ‵toki ne koutou kae ka fakauke aka ei a fuataga o te otou amiotonu.)
11 Ko mau‵mea koutou i mea katoa ona ko te otou kaima‵lie i feitu katoa, kae e auala i a matou ko fakaasi atu ei ne tino a te fakafetai ki te Atua;
12 me i te faiga o te galuega fesoasoani tenei ki tino katoa e se ko te faiga fua ke lava a mea e tausi ei a tino tapu+ kae ke mau‵mea foki i te avatuga o fakafetai e uke ki te Atua.
13 E auala i te fakamaoniga telā e tuku atu i te galuega fesoasoani tenei, e ‵viki atu latou ki te Atua me i a koutou e faka‵logo ki te tala ‵lei e uiga ki te Keliso, telā e folafola atu ne koutou ki tino katoa, kae ona ko te otou kaima‵lie i otou meaalofa ki a latou mo tino katoa.+
14 Kae fakatasi mo olotou ‵talo mō koutou, e fakaasi atu i ei a te lotou a‵lofa mō koutou ona ko te alofa tauanoa sē fuafuagina o te Atua tenā i luga i a koutou.
15 Ke fakafetai atu ki te Atua mō tena meaalofa faivasaga telā e se mafai o fakamatalagina.