E taku fakatasi mai eiloa i te Tusi Tapu a ta‵tau, i te Levitiko 19:28, telā e fai mai: “E se ‵tau mo koutou o fai ne ta‵tau i otou foitino.” Ne tuku atu ne te Atua te fakatonuga tenei ki te fenua o Isalaelu, telā ne ‵tu ‵kese ei latou mai tino i fenua i olotou tafa kolā ne fakamailoga olotou pa‵kili ki igoa io me ko fakailoga o olotou atua. (Teutelonome 14:2) E tiga eiloa e se ‵nofo a Kelisiano mai lalo o te Tulafono ne tuku atu ki te kau Isalaelu, e ‵tau eiloa o mafaufau ‵mafa tatou ki akoakoga tāua mai tua o te tulafono tenei.

E mata, e ‵tau o tā ne se Kelisiano se ta‵tau?

E mafai o fesoasoani atu a fuaiupu i te Tusi Tapu ke mafaufau faka‵lei koe ki te mataupu tenei:

• “Fāfine ke teuteu faka‵lei . . . ke fai faka‵lei eiloa olotou gatu.” (1 Timoteo 2:9, Tusi Tapu Tuvalu) E aoga eiloa a te akoakoga fakavae tenei ki fāfine mo tāgata. E ‵tau o āva tatou ki lagonaga o nisi tino kae e se ‵tau o fai ne tatou a faifaiga fia lavea.

• E ma‵nako a nisi tino ke fakatumau olotou iloga io me ko te lotou fia tu tokotasi, kae e taumafai a nisi tino ke tā olotou ta‵tau ke fakaasi atu te lotou pule ki olotou foitino. Kae fakamalosi atu te Tusi Tapu ki Kelisiano: “Ke ofo atu otou foitino ke fai mo taulaga ola, e tapu kae talia ne te Atua, se taviniga tapu mai te fakaaogaga o te malosi o otou mafaufau.” (Loma 12:1) Fakaaoga te “malosi o otou mafaufau” ke iloilo aka te pogai e manako ei koe ki se ta‵tau. Kafai ko te fia tautali atu fua ki se teuga io me ke fakaasi atu te potukau e ‵lago koe ki ei, masaua la me e mafai o se tumau ou lagonaga i lō te ta‵tau. A te iloiloga o ou lagonaga e mafai ei o fesoasoani atu ke fai ne koe se fakaikuga ‵lei.—Faataoto 4:7.

• “A palani a tino ga‵lue malosi e manuia eiloa, kae ko latou katoa kolā e fai fakava‵vave olotou mea e iku atu eiloa ki te mativa.” (Faataoto 21:5) A te fakaikuga ke tā se ta‵tau e masani o fai fakavave sāle, kae e mafai o leva a ikuga sē ‵lei ki va fakataugasoa mo te mauaga o se galuega ‵togi. Kae ko te ‵sologa o ta‵tau e mafai o ‵togi ‵mafa kae fakalogo‵mae. E fakaasi mai ne sukesukega ne fai—e pelā foki mo te gasolo aka o uke a pisinisi ‵solo ta‵tau—me e tokouke a tino ko sala‵mo me ne tā olotou ta‵tau.