Kufuma pa January 29 m’paka March 11, 2024, ŵabali na ŵadumbu ŵakujumpha 11,000 ŵa ku South Africa ŵakachitako upharazgi wapadera ku ŵanthu ŵa chiyowoyero cha Chixhosa ku Eastern Cape Province. Ku chigaŵa ichi kuli ŵanthu ŵakukwana 7 miliyoni, ndipo ŵanandi mwa ŵanthu aŵa ŵakuyowoya Chixhosa. Ntheura ŵanthu ŵakujumpha 2,700 ŵakapempha kuti ŵasambirenge nawo Baibolo.

Pa upharazgi wapadera uwu, ŵadumbu ŵaŵiri ŵakakumana na mwanakazi munyake uyo mudumbu wake wakafwa pa ngozi ndipo masabata ghaŵiri ghakaŵa kuti ghajumphapo. Apo mwanakazi uyu wakaŵalongosoleranga uku wakuthiska masozi, ŵadumbu aŵa ŵakamukhozga mwakuŵerenga nayo Chivumbuzi 21:3, 4. Mwanakazi uyu wakaŵa wakukhumbisiska kumanya ivyo Baibolo likulayizga pa nkhani ya nyifwa na masuzgo, ndipo wakafumba uko tikuwungana kweniso nyengo yake. Kweniso ŵadumbu aŵa ŵakamba kusambira nayo Baibolo.

Mudumbu Zukiswa wakamba kusambira na mwanakazi munyake uyo wakasuzgikanga chomene na nyamakazi. Chifukwa cha nthenda iyi, vikamusuzganga kuti waphikire chakurya ŵana ŵake. Mwakuti pa zuŵa ili wakafipanga mtima kuti ŵaryenge yayi chifukwa wakaŵa kuti wangakwaniska yayi kuphika. M’malo mwake Mudumbu Zukiswa wakajipeleka kuŵanozgera chakurya apo mudumbu uyo ŵakaŵira lumoza wakapharazgira mwanakazi uyu uthenga wa mu Baibolo. Mwanakazi uyu wakakhwaskika chomene na chitemwa icho ŵakamulongora ndipo mwakukondwa wakaphalirako ŵabwezi ŵake ŵanandi ivyo ŵakamuchitira. Pamanyuma, wakamba kusambira Baibolo na Ŵakaboni ŵa Yehova.

Apo ŵabali ŵaŵiri ŵakapharazganga nyumba na nyumba mu tawuni ya Gqeberha, ŵakasangana na mwanalume munyake wakudumuka kalundi. Iyo wakayowoya kuti kwa nyengo yitali wakujifumbanga chifukwa icho Chiuta wakuzomerezgera Satana kuti ndiyo walamulirenge charu uku Chiuta ndiyo wakalenga ŵanthu. (1 Yohane 5:19) Ŵabali ŵakazgora mafumbo ghake mwakugwiliskira ntchito Baibolo. Pamanyuma pakuti ŵawoneska vidiyo ya mutu wakuti, Chifukwa Wuli Chiuta Walekelera Uheni na Suzgo?, mwanalume uyu pamoza na muwoli wake ŵakazomera kusambira Baibolo.

Yumoza mwa ŵadumbu ŵithu awo ŵakapharazganga ku Gqeberha, wakafumba mwanakazi munyake usange wangatemwa kuŵerenga lemba la Salimo 37:29. Wati waŵerenga mu Baibolo lake, mwanakazi uyu wakayowoya kuti wakapulikiska yayi ivyo lemba ili likuyowoya. Pamanyuma mudumbu wakamuŵerengera vesi ili mu Baibolo la Malemba Ghakupatulika mu Mang’anamuliro gha Charu Chiphya mu Chixhosa. Mwanakazi uyu wakayowoya kuti: “Chixhosa icho chili mu Baibolo ili chikupulikikwa makora chomene. Napulikiska makora kuluska ivyo nanguŵerenga mu Baibolo lane!” Pasono wakukondwa kuti wakusambira Baibolo mwakukhazikika.

Tili ŵakukondwa chomene kuti ŵanthu ŵanandi awo ŵakuyowoya Chixhosa ku South Africa ŵakuzomera uthenga wakupa chigomezgo uwo “Chiuta wa chisangulusko chose” wakupeleka kwizira mu Mazgu ghake, Baibolo.—2 Ŵakorinte 1:3.