APRIL 8, 2024
RUSSIA

Yehova Wakuŵapwelelera Apo Ŵali Mujele Kulindilira Kuti Milandu Yawo Yeruzgike

JULANI

Khoti la Msumba wa Novocherkassk ku Chigaŵa cha Rostov sonosono apa lipelekenge chigamuro chake pa mulandu wa mudumbu Lyubov Galitsyna, mubali Garegin Khachaturyan na Gevorg Yeritsyan. Uyo wakwimira boma pa milandu wandayowoye chilango icho ŵanthu aŵa ŵangapika.

Vyakukhwaskana na ŵanthu aŵa

Lyubov Galitsyna

Chaka chakubabikira: 1959 (Plastunovskaya, ku chigaŵa cha Krasnodar)

Mbiri yake: Ŵakaŵa mechanical engineer

Wakanweka kusambira Baibolo wati wamanya layizgo lakuti tizamukhala umoyo wambura kulwara kweniso nyifwa. Wakabatizika nakuŵa yumoza wa Ŵakaboni ŵa Yehova mu 1995

Mfumu wake wakatayika mu 2015

Ivyo Wakayowoya

Kasi Yehova wamovwirani wuli kwa chaka na myezi yinayi iyo mwaŵira mujele apo mukulindizga kuti mulandu winu weruzgike?

Kukhala mujele lumoza na ŵanthu awo ŵakugwiliskira ntchito munkhwala wakuzweteska wongo, ŵankhungu na ŵanyake awo ŵali na milandu yakupambanapambana chikaŵa chinthu chakusuzga chomene. Kanandi pakawukanga masuzgo. Nyengo zinyake nkhalombanga kwa Yehova usiku wose, kuti wanovwire umo ningachitira na suzgo ili. Nkhakhala na ŵanthu ŵakupambanapambana ŵakujumpha 25 mujele ilo ŵakanijalira. Na wovwiri wa Yehova nkhafiska kuchita nawo vinthu makora waka ŵanthu wose aŵa. Wakanovwiraso kuti panyengo iyi nimanye vinthu vinyake ivyo nkhakhumbikwiranga kusintha. Nkhuwonga chomene kuti panyengo iyi nkhaŵa na mwaŵi wakusazgirako mikhaliro yinyake ya Chikhristu.

Garegin Khachaturyan a

Chaka chakubabikira: 1967 (Azerbaijan)

Mbiri yake: Ŵakaŵa kalipentala. Wakasamira ku Russia mu 1995 wati wakhala ku Poland na Germany

Wakakhorwa kuti Baibolo likuneneska para likuyowoya vinthu ndipo wakawona kuzirwa kwa kulondezga fundo zake. Wakabatizika mu 1994

Wakatorana na Kseniya mu 2008. Ŵali na mwana yumoza mwanalume

Ivyo wakayowoya Kseniya muwoli wa Garegin

Kasi ntchivichi icho chikovwira imwe na mfumu winu kuti muzizipizgenge?

Garegin ulendo unyake wakanilembera kuti: “Nkhuwonga chomene Yehova chifukwa cha wovwiri uwo wakunipa. Makalata agho nkhupokera kufuma ku ŵabwezi ŵane ŵa ku mpingo ghakunikhozga chomene mwauzimu. Kweniso kumanya kuti ŵakukupwelelera vikunovwira kuti nikhazikikenge maghanoghano. Pasono nkhujipulika kuti nili pafupi chomene na Yehova kuluska kumanyuma kose uku.” Nane nkhukolerana nayo Garegin. Tose tikujipulika kuti tili pafupi chomene na Yehova, ndipo nase tikujiwonera tekha umo wakutovwilira pa umoyo withu.

Tili na chigomezgo chose kuti nanga ŵakususka ŵangatiwukira, Yehova walutilirenge kutumbika ŵateŵeti ŵake ŵakugomezgeka ndipo ‘wazgorenge vinthu vyose kuŵa viwemi.’—Genizesi 50:20.

Nyengo

August 11, 2022

Ŵakajulira mulandu Lyubov, Garegin, na Gevorg. Ŵakasecha nyumba zawo. Garegin na Gevorg ŵakaŵikika ku malo ghakulindilirako mulandu.
August 12, 2022

Garegin na Gevorg ŵakaŵikika mujele kulindilira kuti mulandu wawo weruzgike
August 16, 2022

Lyubov wakaŵikika ku malo ghakulindilirako mulandu
August 17, 2022

Lyubov wakasamuskikira ku jele la ŵanthu awo ŵakulindilira kuti milandu yawo yeruzgike
September 20, 2023

Ŵakamba kutegherezga mulandu wake
December 25, 2023

Lyubov wakafumiskika mujele la awo ŵakulindilira kuti milandu yawo yeruzgike ndipo wakaŵikika pa jele la panyumba

a Panyengo iyo nkhani iyi yikalembekanga, mubali Khachaturyan na Yeritsyan ŵakaŵa mujele la awo ŵakulindilira kuti milandu yawo yeruzgike ndipo chikaŵa chakusuzga kuti ŵayowoyepo.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI