APRIL 23, 2024
RUSSIA

Nkhuwonga chomene kuti Nkhuteŵetera Yehova

JULANI

Khoti la Pervomayskiy ku Izhevsk chigaŵa cha Udmurtian sonosono apa lipelekenge chigamuro chake pa mulandu wa mubali Yevgeniy Stefanidin na Aleksandr Votyakov. Uyo wakwimira boma pa milandu wandayowoye chilango icho ŵabali aŵa ŵangapika.

Vyakukhwaskana na ŵanthu aŵa

Yevgeniy Stefanidin

Chaka chakubabikira: 1989 (Izhevsk)

Mbiri yake: Wakugwira ntchito yakuguliska vinthu

Yevgeniy wakalelekera mumbumba ya Ŵakaboni ŵa Yehova. Apo wakaŵa na vyaka 10, ŵabuya ŵake ŵakatayika. Nkhani ya chiwuka ndiyo yikamupangiska kuti wasambire vyakukhwaskana na Yehova. Wakabatizika mu 2006.

Wakatorana na Marina mu 2011. Ŵali na mwana yumoza mwanakazi

Yevgeniy ŵakamusanga na kansa mu 2022

Ivyo Wakayowoya

Kasi ntchivichi icho chamovwirani kuti mulutilire kuwona vinthu mwakwenelera panyengo yakusuzga iyi?

Para nafwasa na kughanaghanirapo vinthu viwemi ivyo vyanichitikira, nkhuŵa wakukondwa chomene. Nyengo zose nkhujikumbuskaso kuti Yehova wazomerezga waka kuti nisuzgike kweni ndiyo yayi wapangiska. Sonosono apa wawuskengepo vinthu vyose vyambura urunji ivyo vikuchitikira ŵateŵeti ŵake ŵakugomezgeka. Ntchakuzirwaso chomene kulutilira kuŵa paubwezi wakukhora na Yehova kweniso ŵabali na ŵadumbu. Mudumbu munyake wakaniphalirapo kuti: “Para mukumwemwetera tikukhozgeka chomene. Kuwona kuti mukulutilira kuŵa ŵakukondwa nangauli mukusangana na masuzgo agha, vikunovwira kuti nileke kuchita wofi kweniso niŵe wachikanga.” Nkhuwonga chomene kuti nili mu mbumba ya Yehova.

Aleksandr Votyakov

Chaka chakubabikira: 1973 (Izhevsk)

Mbiri yake: Wakugwira ntchito ya vyakuzengazenga

Wakatorana na Liliya mu 1995

Wakakopeka chomene kuwona umo muwoli wake wakasinthira wati waŵa yumoza wa Ŵakaboni ŵa Yehova. Aleksandr wakabatizika mu 2006

Ivyo Wakayowoya

Kasi mwasambirako vichi ku ivyo vyamuchitikirani?

Nasambira kugomezga chomene Yehova kweniso kuzirwa kwa kuleka kukayika kuti wanovwirenge. Nkhakhala pa jele la pa nyumba kwa myezi pafupifupi 6 ndipo nkhaleka dankha kugwira ntchito. Panyengo yeneyiyi muwoli wane wakalwara chomene. Kweni tikajiwonera tekha umo Yehova wakatovwiliranga. Ŵabali na ŵadumbu ŵakatipweleleranga na kutipa ivyo tikakhumbikwiranga. Ŵabali ŵithu ŵakuthupi ŵakazizwa chomene kuwona umo ŵabali na ŵadumbu ŵakatipweleleranga. Kuwona umo Yehova wanovwilira, kwanipangiska kuti niwongenge chomene mwaŵi wakuŵa muteŵeti wake.

Nga ni Aleksandr na Yevgeniy, tikuwona kuti ni mwaŵi wapadera chomene ‘kuteŵetera Yehova kwambura wofi’ mazuŵa ghithu ghose—Luka 1:74, 75.

Nyengo

April 14, 2021

Ŵapolisi ŵakasecha nyumba ya Yevgeniy
December 13, 2022

Ŵakajulira mulandu Aleksandr na Yevgeniy
December 14, 2022

Ŵapolisi ŵakasecha nyumba zawo. Aleksandr wakatumizgika ku jele lakulindilirako mulandu. Yevgeniy wakakanizgika kuti waleke kwenda kuya ku vigaŵa vinyake
December 15, 2022

Aleksandr wakafumiskika mujele lakulindilirako mulandu ndipo wakaŵikika pa jele la panyumba
June 9, 2023

Aleksandr wakafwatulika pa jele la panyumba ndipo wakakanizgika kuti waleke kwenda kuluta ku vigaŵa vinyake
August 17, 2023

Ŵakamba kutegherezga mulandu wake

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI