Kasi namwe mukuwona kuti ntchakusuzga kupambaniska pakati pa unenesko na utesi? Mazuŵa ghano ŵanthu ŵanandi ŵakugomezga waka vinthu kuyana na umo ŵakuwonera kweniso umo ŵakughanaghanira m’malo mwakuwona dankha usange fundo zake ni zaunenesko panji yayi. Mazuŵa ghano pa charu chose chapasi, ŵanthu ŵanandi ŵakugomezga kuti palije icho ntchaunenesko.

 Fundo iyi njachilendo yayi. Vyaka 2,000 ivyo vyajumpha, Kazembe Wachiroma Pontiyo Pilato, mwauchenjezi wakafumba Yesu kuti: “Kasi unenesko ni vichi?” (Yohane 18:38) Nangauli Pilato wakalindilira kuti Yesu wazgore dankha yayi, kweni fumbo lake likaŵa lakuzirwa chomene. Baibolo likupereka zgoro lakukhorweska, ndipo lingamovwirani kumanya uwo mbunenesko na uwo mbutesi apo ŵanthu ŵanandi mu charu ichi ŵakutondeka kupambaniska unenesko na utesi.

Kasi unenesko uliko nadi?

 Enya. Baibolo likugwiliskira ntchito lizgu lakuti “unenesko” kuti lilongosore fundo iyo njanadi panji iyo yili na maukaboni kweniso kuti liyowoye icho ntchakwenelera nadi. Likusambizga kuti Yehova a Chiuta ni Mweneko wa unenesko wose, ndipo likumuchema kuti “Chiuta waunenesko.” (Salimo 31:5) Mu Baibolo muli unenesko wakufuma kwa Chiuta, ndipo likuyaniska unenesko uwu na ungweru, chifukwa ungweru ungatilongozga kuti tende makora mu charu cha chisi ichi.—Salimo 43:3; Yohane 17:17.

Kasi mungawusanga wuli unenesko?

 Chiuta wakukhumba yayi kuti tigomezgerengemo waka bweka unenesko wa mu Baibolo kwambura kuwumanya makora. Kweni wakutipempha kuti tisandenge mwakugwiliskira ntchito nkhongono zithu za kughanaghana m’malo mwakuchita waka vinthu umo tikuwonera. (Ŵaroma 12:1) Wakukhumba kuti timumanyenge makora na kumutemwa na ‘maghanoghano ghithu ghose,’ ndipo wakutichiska kuti patekha tikhorwenge kuti ivyo tikusambira mu Baibolo mbunenesko nadi.—Mateyu 22:37, 38; Milimo 17:11.

Kasi utesi ukamba wuli?

 Baibolo likuyowoya kuti utesi ukamba na mulwani wa Chiuta, Satana Dyabulosi, uyo Baibolo likumuchema kuti “wiske wa utesi.” (Yohane 8:44) Wakayowoyera utesi Chiuta ku ŵanthu ŵakwamba. (Genizesi 3:1-6, 13, 17-19; 5:5) Kufuma waka nyengo yira, Satana wakulutilira kuthandazga utesi na kubisa unenesko wakuyowoya vya Chiuta.—Chivumbuzi 12:9.

Chifukwa wuli utesi uli palipose mazuŵa ghano?

 Mu nyengo yithu yino, iyo Baibolo likuyichema kuti “mazuŵa ghaumaliro,” Satana wakulutilira kupuluska ŵanthu kuluska kumanyuma kose uku. Kanandi ŵanthu ŵakutemwa kuteta na chilato chakuti ŵapuluske ŵanyawo na kuŵalyera masuku pa mutu. (2 Timote 3:1, 13) Mazuŵa ghano utesi wathandazgikaso chomene mu visopa. Nga umo Baibolo likuyowoyera vya munyengo yithu iyi, ŵanthu “ŵazamujiwunjikira ŵasambizgi kuti ŵapulike ivyo vikukondweska makutu ghawo,” ndipo “ŵazamuleka kutegherezga ku unenesko.”—2 Timote 4:3, 4.

Chifukwa wuli unenesko ngwakuzirwa?

 Unenesko ukovwira kuti ŵanthu ŵagomezganenge yumoza na munyake. Usange palije kugomezgana, ubwezi pakuŵavya ndipo ŵanthu ŵakuleka kukolerana. Baibolo likuyowoya kuti Chiuta wakukhumba kuti kusopa kwithu kujinthenge pa unenesko. Likuyowoya kuti: “Awo ŵakumusopa [Chiuta] ŵakwenera kumusopa mu mzimu na mu unenesko.” (Yohane 4:24) Kuti mumanye umo unenesko wa mu Baibolo ungamovwilirani kumanya visopa vyautesi kweniso kuti muleke kwendera utesi uwo visopa vikusambizga, ŵazgani nkhani za mutu wakuti “Mautesi Agho Ghakutondeska Ŵanthu Kutemwa Chiuta.”

Chifukwa wuli Chiuta wakukhumba kuti nimanye unenesko?

 Chiuta wakukhumba kuti muzakaponoskeke, ndipo kuti muzakapone, mukwenera kusambira unenesko wakukhwaskana na iyo. (1 Timote 2:4) Usange musambirenge fundo za Chiuta pa nkhani ya icho ntchakwenelera kweniso icho ntchamburakwenelera, na kulondezga ivyo mukusambira, muŵenge nayo paubwezi. (Salimo 15:1, 2) Chiuta wakatuma Yesu pa charu chapasi kuti wawovwire ŵanthu kumanya unenesko. Chiuta wakukhumba kuti titegherezgenge ku visambizgo vya Yesu.—Mateyu 17:5; Yohane 18:37.

Kasi Chiuta wazamumazga utesi?

 Enya. Chiuta wakutinkha chomene para ŵanthu ŵanyake ŵakupusika ŵanyawo kuti ŵaŵalyere masuku pamutu. Wakulayizga kuzakaparanya wose awo ŵakulutilira kuteta pa charu . (Salimo 5:6) Para Chiuta wazakachita ivi, wazamufiska ivyo wali kulayizga, vyakuti: “Milomo yaunenesko yikhalilirenge muyirayira.”—Zintharika 12:19.