Nkhakulira ku Rmaysh kufupi na mphaka ya caru ca Israel na Lebanon. Pa nyengo iyo, kukaŵa nkhondo ya pawenenawene. Mabomba agho ŵakawundiranga pasi ghakaphulikanga ndipo ŵanthu ŵambura cifukwa ŵakadumukanga malundi na mawoko. Umoyo ukaŵa wakusuzga ndipo ucigeŵenga na nkhaza vikaŵa palipose.

Banja lakwithu likasopanga chalichi lakucemeka Maronite ilo lili mu gulu la machalichi gha Katolika. Tikaŵapo ŵana 12, ndipo adada ŵakatangwanikanga na kupenja mcere. Ndipo amama ŵakawoneseskanga kuti tose tikuluta ku chalichi. Pamasinda, nkhawona kuti chalichi nalo likutondeka kovwira ŵanthu ŵakusuzgika.

Apo nkhaŵa na vyaka vyapakati pa 13 na 19, nkhamba kutemwa maseŵero ghakuchayana ghakucemeka khumfu. Nkhafwilirapo kusambira khumfu ndipo nkhaŵa kaswiri pakuponya vibakera na mafayiti, kweniso vinthu vinyake vyakutimbirana. Nkhamanyanga kuti, ‘nkhondo ningayimazga yayi, kweni ŵanthu ŵankhaza ningamarana nawo.’ Lekani para nawona waka ŵanthu ŵaŵiri ŵakutimbana ine nkhanjilirangapo. Nkhakaŵanga yayi kuthukira ndipo nkhakwiyanga pa tunthu tucoko comene. Apo nkhalimbananga na kumazga vinthu vyambura urunji na nkhaza, ŵanthu ŵakaniwopanga comene kumwera kose kwa Lebanon.

Mu 1980, nkhanjira gulu ilo likacitanga maseŵera gha khumfu ku Beirut. Nangauli mabomba ghakaphulikanga zuŵa lililose, vifalasi (vikhokho vya mpholopolo) navyo vikaŵa limbwalimbwa, kweni nkhalutanga nipera kukasambira. Nkharyanga comene, kugona na kucita vinthu nga ni Bruce Lee, uyo wakaŵa kaswiri wa khumfu. Nkhatolera umo wakameteranga, umo wakenderanga, kweniso umo wakacemerezgeranga pakucita khumfu. Nkhamwemweteranga yayi.

Nkhakhumbanga kuti nizakaŵe kaswiri wa khumfu ku China. Kweni zuŵa linyake namise apo nkhayezgeleranga khumfu kunozgekera ulendo wa ku China, nkhapulika ŵanthu ŵakugogoda.  Munyane munyake wakiza na Ŵakaboni ŵa Yehova ŵaŵiri. Nkhaŵa kuti navwara malaya ghane ghakucitira khumfu, uku thukuta lili geregere. Nkhaŵaphalira kuti, “Nkhumanyapo cilicose yayi cakukhwaskana na Baibolo.” Ndipo nkhamanyanga yayi kuti umoyo wane usinthenge kufuma panyengo iyi.

Ŵakaboni aŵa ŵakanilongora mu Baibolo kuti ŵanthu ŵangamazga yayi vinthu vyambura urunji na nkhaza. Ŵakalongosora kuti Satana ndiyo wakucitiska masuzgo agha. (Uvumbuzi 12:12) Nkhakondwa comene na Ŵakaboni aŵa, cifukwa ŵakaŵa ŵamtende kweniso ŵakagomezganga ivyo ŵakayowoyanga. Ŵakaniphaliraso kuti Ciuta wali na zina. (Salmo 83:18) Ŵakaniŵazgiraso lemba la 1 Timote 4:8, ilo likuti: “Kujizgoŵezga maseŵero ghakukhozga thupi kuli na candulo cicoko waka, kweni kusopa Ciuta mwakujipeleka kukwandulira vyose, pakuti kuli na layizgo la umoyo wa sono na uwo ukwiza.” Mazgu agha ndigho ghakamba kusintha umoyo wane.

Kweni cacitima nchakuti Ŵakaboni aŵa ŵakaleka kwiza kunyumba, cifukwa ŵabali ŵane ŵakaŵakanizga. Nkhaleka khumfu ndipo nkhamba kusambira Baibolo panekha. Mukuru wane na munung’una wane ŵakakolerananga navyo yayi. Kweni nkhaŵikapo mtima kuti nisange Ŵakaboni ŵa Yehova kuti nisambirenge Baibolo.

Nkhapenja Ŵakaboni ŵa Yehova, kweni nkhaŵasanga yayi. Pa nyengo iyo, nkhaŵa na citima cikuru comene cifukwa ca nyifwa ya adada, kweniso masoka ghanyake agho ghakacitika pa banja lakwithu. Nkhamba nchito ku kamupani ya vyakuzengazenga. Ndipo zuŵa linyake Adel, uyo tikagwiranga lumoza nchito wakanifumba cifukwa ico nkhaŵira wacitima. Iyo wakamba kuniphalira kuti ŵakufwa ŵazamuwuka. Kaboni uyu wakanitemwa comene. Wakasambira nane Baibolo mwakuzikira kwa myezi 9.

Apo nkhasambiranga Baibolo, nkhamanya kuti nkheneranga kusintha vinthu vinyake vikuru. Cikaŵa cipusu yayi. Kanandi nkhakhuŵaranga na kukwiya luŵiro. Kweni mu Baibolo nkhasambira umo ningacitira kuti nileke kukwiya luŵiro kweniso kuti nijikolenge. Mwaciyelezgero, pa Mateyu 5:44 Yesu wakati “Lutilirani kutemwa ŵalwani ŵinu na kulombera awo ŵakumutambuzgani.” Ndipo lemba la Ŵaroma 12:19, likucenjezga kuti: “Mungawezgeranga nduzga mwekha cara, . . . pakuti kuli kulembeka: ‘“Nduzga ni zane; nizamuwezgera,” wakuti Yehova.’” (Ŵaroma 12:19) Mwapacokopacoko, Malemba agha na ghanyake ghakanovwira kuti niŵe wamtende.

Nangauli ŵamubanja lakwithu ŵakanisuskanga comene apo nkhasambiranga na Ŵakaboni ŵa Yehova, kweni pasono ŵakuŵacindika comene. Nakuti munung’una wane nayo ni Kaboni wa Yehova. Kweniso amama ŵakaphaliranga ŵanji vya cipulikano cithu m’paka apo ŵakafwira.

Pasono ine na muwoli wane Anita, tikupharazgira lumoza nyengo zose. Kwambira mu 2000, ine na Anita tikukhala mu msumba wa Eskilstuna, Sweden, uko tikusambizga ŵanthu Baibolo mu Chiarabu.

Vicali kuniŵinya para nkhuwona kuti ŵanthu wakusuzgika cifukwa ca vinthu vyambura urunji kweniso nkhaza. Ndipouli, nili wakukondwa kweniso wamtende pakuti nkhumanya cifukwa ico paliri masuzgo ghanandi kweniso kuti sonosono apa, Ciuta wawuskengepo masuzgo ghose.—Salmo 37:29.