KINGSLEY wakaŵa wachibulumutira. Apo wakayowoyanga nkhani yake yakwamba ya kuŵazga Baibolo mu Sukulu ya Uteŵeti wa Chiuta, ŵakachita kumupamantha paphewa kuti wambepo. Wakazunuranga mazgu mwakupulikikwa makora kweniso kwambura kujwanthira. Pakuŵazga wakalaŵiskanga pa Baibolo yayi. Kasi wakakwaniska wuli?

Kingsley wakakhalanga ku Sri Lanka. Kweniso wakapulikanga mwakusuzgikira. Wakendanga pa njinga ya ŵanthu ŵakupendera. Kasi wakasambira wuli unenesko? Kasi vikenda wuli kuti wambe kuyowoya nkhani mu Sukulu ya Uteŵeti wa Chiuta? Lekani nimuphalirani.

Nati namupharazgira Kingsley kakwamba, nkhakondwa chomene kuti wakakhumbanga kusambira Baibolo. Wakaŵa kuti wasambirapo kale na Ŵakaboni ŵakupambanapambana. Iyo wakaŵa na buku la Cimanyisko Ceneico Cikurongozgera ku Umoyo Wamuyirayira. * Buku ili likaŵa la ŵanthu ŵambura kuwona (Braille). Wakazomera kuti tambeso kusambira Baibolo. Kweni pakaŵa masuzgo ghaŵiri.

Lakwamba: Kingsley wakakhalanga ku malo ghakusungirako ŵachekuru na ŵakupendera. Ku malo agha kukaŵanga ŵanthu ŵanandi ndipo kukaŵanga chiwawa chomene. Pakuti Kingsley wakasuzgikiranga kupulika, nkhakwezganga chomene mazgu kuti wapulike. Waliyose wakapulikanga ivyo tikasambiranga sabata yiliyose.

 Lachiŵiri: Tikasambiranga vinthu vinandi yayi chifukwa wakaluwanga luŵiro. Kweni wakalimbikiranga chomene ndipo wakanozgekeranga mwakukwana. Wakaŵazganga mwakuwerezgawerezga ndime kweniso mavesi mu Baibolo lake la ŵanthu ŵambura kuwona. Ntheura wakasungiliranga mazgoro pamtima. Ivi vikawovwira kuti sambiro liŵenge lakunozga chomene. Pakusambira, tikakhalanga pasi uku takhwinyata malundi. Tikasambiranga kaŵiri pa Sabata. Tikasambiranga kwa maora ghaŵiri.

Kingsley wakatemwanga chomene kuluta ku Nyumba ya Ufumu nangauli chikaŵa chipusu yayi. Nyengo yiliyose wakakhumbikwiranga kumunyamura kuti wakwere panji kukhira njinga, galimoto kweniso pakunjira na pakufuma mu Nyumba ya Ufumu. Ŵabali ŵakasinthananga kovwira mubali uyu, ndipo ŵakawonanga kuti ni mwaŵi wapadera. Kingsley wakakhalanga pafupi na vyakukuzgira mazgu. Wakategherezganga chomene na kuzgorapo.

Pakati pajumpha nyengo, Kingsley wakalembeska mu Sukulu ya Uteŵeti wa Chiuta. Kwati kwakhala masabata ghaŵiri kuti wakadumbe nkhani yake yakuŵazga Baibolo, nkhamufumba usange wakunozgekera. Iyo wakazgora mwankhongono kuti: “Enya mubali. Nayezgelera maulendo ghakukwana 30.” Nkhamuwonga chomene ndipo nkhamupempha kuti nipulike umo wamuŵazgira. Wakajura na kuŵika minwe pa Baibolo lake na kwamba kuŵazga. Nkhazizwa chomene kuti wakendeskanga yayi minwe yake umo wakuchitira nyengo zose. Wakasungilira pamtima mavesi ghose.

Ndipo nkhagomezga yayi kuti wangasunga pamtima mavesi ghose. Nkhamulaŵiska na kuthiska masozi chifukwa cha chimwemwe. Nkhamufumba kuti: “Pakuti wayezgelera maulendo 30 pera, kasi wakwaniska wuli kusunga pamtima mavesi ghose?” Wakanizgora kuti: “Nayezgelera maulendo 30 pera yayi. Kweni zuŵa lililose nkhuyezgelera maulendo 30.” Kingsley wakakhalanga pa mphasa yake na kuŵerenga mwakuwerezgawerezga kwa mwezi wose ndipo wakasunga mavesi ghose pamtima.

Zuŵa lakuti Kingsley wadumbe nkhani yake ku Nyumba ya Ufumu likakwana. Wati wamara kuŵazga, ŵabali na ŵadumbu ŵakakuŵa mapi nyengo yitali. Ndipo ŵanandi ŵakakondwa na kuthiska masozi pakuwona umo wakaŵazgira. Mudumbu munyake uyo wakaleka kuyowoya nkhani mu Sukulu ya Uteŵeti wa Chiuta chifukwa cha kopa, wakalembeskaso. Iyo wakajifumba kuti: “Usange Kingsley Wakukwaniska, Ine Ningatondekerachi?”

Kingsley wakabatizika pa Seputembala 6, 2008, kuŵa Kaboni wa Yehova. Iyo wakalutilira kuteŵetera Yehova mwakugomezgeka m’paka pa Meyi 13, 2014, apo wakafwira. Iyo wakagomezganga kuti mu Paradiso wazamuŵa na umoyo uwemi na kuteŵetera Yehova kwambura suzgo lililose la mu thupi. (Yes. 35:5, 6).—Yakuyowoyeka na Paul McManus.