“Nkhumulekerani mtende, nkhumupani mtende wane. Nkhuwupeleka nga umo charu chikuwupelekera chara. Mitima yinu yingakweŵekanga chara nesi kusuzgika chifukwa cha wofi.”—Yohane 14:27, Mang’anamuliro gha Charu Chiphya.

 “Nkumusidirani mtende; mtende wane nkumupani: kuti umo caru cikupira ndimo nkumupirani cara. Ungakweŵekanga mtima winu, nanga nkopa.”—Yohane 14:27, Tumbuka Bible.

 Na mazgu agha, Yesu wakasimikizgiranga ŵapositole ŵake kuti ŵaleke kufipa mtima chomene para ŵasangana na masuzgo. Nga ndiyo, nawo ŵangaŵa na mtende wa mu mtima na wovwiri wa Chiuta.

 Kasi ni mtende wuli uwo Yesu wakalekera, panji kupeleka ku ŵapositole ŵake? Yesu wakaŵapa mtende wake, kung’anamura mtende uwo iyo wakaŵa nawo. Mtende uwu ukung’anamura kuti pakaŵavya masuzgo panji mphindano yayi. (Yohane 15:20; 16:33) Nangauli Yesu wakasangana na vinthu vyambura urunji ndipo paumaliro wakakomeka, kweni wakaŵa na mtende wa mu mtima. (Luka 23:27, 28, 32-34; 1 Petrosi 2:23) Iyo wakaŵa na mtende wa mu mtima chifukwa wakamanyanga kuti Adada ŵake a Yehova a ŵakumutemwa kweniso ŵakukondwa nayo.—Mateyu 3:16, 17.

 Yesu wakaŵapa mtende ŵapositole ŵake mwa kuŵasimikizgira kuti iyo na Adada ŵake ŵakuŵatemwa kweniso kukondwa nawo. (Yohane 14:23; 15:9, 10; Ŵaroma 5:1) Mtende uwu, uwo ukajintha pa chipulikano chawo mwa Yesu uyo ni mwana Chiuta, ukaŵawovwira kuti ŵaleke kufipa mtima chomene na masuzgo ghawo. (Yohane 14:1) Nangauli Yesu wakaŵa kuti waŵengeso nawo lumoza yayi mwakuthupi, kweni wakalayizga kuti mzimu utuŵa wa Chiuta uŵawovwirenge kuti ŵaŵe ŵakukhwima kweniso kuŵa na mtende wa mu mtima. (Yohane 14:25-27) Ŵalondezgi ŵa Yesu ŵangalimbana nagho mwachikanga masuzgo agho ŵasangana nagho pakumanya kuti Yehova wakukondwa nawo kweniso wakuŵawovwira.—Ŵahebere 13:6.

 Apo Yesu wakaŵa pano pasi, ŵanthu ŵakatemwanga kukhumbirana mtende para ŵakutawuzgana. (Mateyu 10:12) Kweni Yesu wakaŵakhumbira waka mtende yayi ŵapositole ŵake, wakachita kuŵapa. Nakuti mtende uwo Yesu wakaŵapa ukupambana chomene na mtende uliwose uwo charu b chingapeleka. Charu chingapeleka mtende kwizira mu ubwezi, usambazi, kumanyikwa, panji udindo. Kweni mtende wa Yesu ukuthemba umo vinthu viliri pa umoyo wa munthu yayi. Ni mtende wambura kumara wa mu mtima.

 Yesu wakayowoya mazgu agha ku ŵapositole ŵake ŵakugomezgeka pa usiku wakuti namachero wafwenge. Pa usiku wura, wakaŵaphalira kuti kwakhala pachoko waka kuti waleke kuŵa nawo mwakuthupi. (Yohane 13:33, 36) Ivi vikaŵapa chitima chomene ŵapositole. (Yohane 16:6) Ntheura Yesu wakaŵakhozga, na kuŵaphalira chifukwa icho ŵakwenera yayi kufipa mtima na ivyo vingachitika para iyo waluta.

 Mazgu gha Yesu ghangaŵakhozgaso Ŵakhristu mazuŵa ghano. Nase tingaŵa na mtende. (2 Ŵatesalonika 3:16) Para taŵa ŵasambiri ŵa Yesu, tikumanya kuti iyo na Adada ŵake a Yehova ŵakutitemwa kweniso kukondwa nase. (Ŵakolose 3:15; 1 Yohane 4:16) Ntheura tikwenera yayi kufipa mtima chomene. Chifukwa wuli? Chifukwa tili na Chiuta.—Salimo 118:6; Ŵafilipi 4:6, 7; 2 Petrosi 1:2.

 Wonelerani vidiyo yifupi iyi kuti muwone mwakudumura ivyo vili mu buku la Yohane.