Pa Upharazgi wakumanyikwa makora wa pa Phiri, Yesu wakayowoya kuti: “Vinthu vyose ivyo mukukhumba kuti ŵanthu ŵamuchitiraninge, ndivyo namwe muŵachitirenge.” (Mateyu 7:12; Luka 6:31) Pakulongosora ng’anamuro la mazgu agho Yesu wakayowoya, buku linyake likayowoya kuti: “Ŵanyinu muŵachitirenge vinthu ivyo imwe mungatemwa kuti nawo ŵamuchitirani.”—Encyclopedia of Philosophy.

•  Kasi dango lakuti muchitenge ivyo mukukhumba kuti ŵanyinu ŵamuchitiraninge likung’anamurachi?

•  Chifukwa wuli dango ili ndakukhumbikwa?

•  Kasi dango ili likung’anamura waka ivyo ŵanyithu ŵakukhumba kutichitira?

•  Kasi mungalondezga wuli dango ili?

 Dango ili likutichiska kuti tichitirenge ŵanyithu vinthu ivyo tingakhumba kuti ŵanyithu nawo ŵatichitire. Mwachiyelezgero, taŵanthu ŵanandi tikukondwa para ŵanyithu ŵakutichindika, ŵakutilongora lusungu, kweniso ŵakutitemwa. Ntheura nase, ‘ndivyo tiŵachitirenge’ ŵanyithu.—Luka 6:31.

 Dango lakuti muchitenge ivyo mukukhumba kuti ŵanyinu ŵamuchitiraninge likugwira ntchito palipose. Mwachiyelezgero, lingawovwira kuti . . .

•   Nthengwa yiŵe yakukhora.—Ŵaefeso 5:28, 33.

•   Ŵapapi ŵalere makora ŵana ŵawo.—Ŵaefeso 6:4.

•   Tiŵe paubwezi uwemi na ŵanyithu, tikhalenge makora na ŵazengezgani ŵithu, kweniso awo tikugwira nawo ntchito.—Zintharika 3:27, 28; Ŵakolose 3:13.

 Dango lakuti muchitenge ivyo mukukhumba kuti ŵanyinu ŵamuchitiraninge likuyana waka na fundo zinandi izo zikusangika mu Chipangano Chakale. Ivyo Yesu wakayowoya “ndicho ni ng’anamuro la Dango [mabuku 5 ghakwambilira gha mu Baibolo] na ivyo Ntchimi [mabuku agho ghakuyowoya vyauchimi] zikalemba.” (Mateyu 7:12) Tingayowoyaso kuti, mazgu ghakuti muchitenge ivyo mukukhumba kuti ŵanyinu ŵamuchitiraninge ghali na fundo yakuzirwa chomene iyo yili mu Chipangano Chakale. Fundo yake njakuti: utemwenge mzengezgani wako.—Ŵaroma 13:8-10.

 Yayi. Fundo yikuru mu dango ili njakuti tichitirenge ŵanyithu vinthu viwemi. Pakupeleka dango ili, Yesu wakayowoyanga za umo tikwenera kuchitira na ŵanthu wose kusazgapo na ŵalwani ŵithu wuwo. (Luka 6:27-31, 35) Ntheura dango lakuti muchitenge ivyo mukukhumba kuti ŵanyinu ŵamuchitiraninge likutichiska kuti tichitirenge viwemi ŵanthu wose.

1.  1. Muwonenge umo vinthu viliri ku ŵanthu. Muwonenge umo vinthu viliri ku ŵanthu awo muli nawo pafupi. Mwachiyelezgero, panyake mungawona munthu munyake uyo wakusuzgika kunyamara katundu, mungapulika kuti muzengezgani winu ŵamugoneka mu chipatala, panji mungawona munthu uyo mukugwira nayo ntchito kuti wagongowa panji wakukhuŵara. Para ‘mukulaŵiska pa ivyo imwe mukukhumba pera yayi,’ muyezgeyezgenge kusanga nthowa ya umo mungaŵayowoyeskera panji kuŵawovwilira.—Ŵafilipi 2:4.

2.  2. Muŵenge ŵalusungu. Mujitorenge kuti ivyo vyachitikira ŵanyinu ndivyo vyachitikira imwe. Kasi mungajipulika wuli usange imwe muŵenge kuti ndimwe mwasangana na suzgo ilo? (Ŵaroma 12:15) Para mukuyezgayezga kujipulika nga umo ŵanji ŵakujipulikira, vingamovwirani kuti muchitepo kanthu kuti muŵawovwire.

3.  3. Muŵenge ŵakunozgeka kusintha vinthu. Kumbukani kuti taŵanthu tikupambana. Ivyo ŵanthu ŵanyake ŵangakhumba kuti muŵachitire vingapambana na umo imwe mungakhumbira kuti ŵamuchitirani. Ntheura, nyengo zose mukwenera kuyezgayezga kuchita vinthu ivyo ŵanyinu ŵangatemwa kuti muŵachitirenge.—1 Ŵakorinte 10:24.