Utesi: Chiuta ndiyo wakambiska zuŵa la Sabata chifukwa wakapumura pa zuŵa la 7.

 Unenesko: Baibolo likuti: “Ntheura Chiuta wakatumbika zuŵa la chinkhonde na chiŵiri ndipo wakalipatura, pakuti pa zuŵa leneilo wakapumula ku mlimo wakhe uwo wakachita wa kulenga.” (Genizesi 2:3, Mazgu gha Chiuta mu Kang’anamuliro Kaphya) Vesi ili likulongora waka ivyo Chiuta wakachita pa zuŵa la 7, likaŵa dango ilo wakapeleka ku ŵanthu yayi. Nakuti palije mu Baibolo apo pakuyowoya kuti ŵanthu ŵakasunganga Sabata pambere Mozesi wandaŵeko.

 Utesi: Ŵaisrayeli ŵakasunganga Sabata pambere ŵandambe kulondezga Dango la Mozesi.

 Unenesko: Mozesi wakaphalira Ŵaisrayeli kuti: “Yehova Chiuta withu wakachita nase phangano mu Horebu,” kufupi na Phiri la Sinayi. Ndipo phangano ilo wakachita nawo likasazgangapo kusunga Sabata. (Dotoronome 5:2, 12) Ivyo Ŵaisrayeli ŵakachitanga na Sabata vikulongora kuti dango ili likaŵa lachilendo kwa iwo. Kasi viŵenge kuti iwo ŵakalondezganga kale dango ili apo ŵakaŵa ku Eguputo, mphanyi chikaŵa chakupulikikwa kuti ŵasungenge Sabata na chilato chakuti ŵakumbukenge umo Chiuta ŵakaŵaponoskera ku Eguputo? (Dotoronome 5:15) Chifukwa wuli ŵakaphalirika kuti ŵangakayoranga mana pa zuŵa la 7 yayi? (Ekisodo 16:25-30) Ndipo chifukwa wuli ŵakamanya yayi chakuchita na munthu wakwamba uyo wakaswa dango lakusunga Sabata?​—Maŵazgo 15:32-36.

 Utesi: Kusunga Sabata ni phangano lamuyirayira, ntheura ŵanthu ŵakwenera kulilondezga.

 Unenesko: Mabaibolo ghanyake ghakuti Sabata ni “pangano la mtatakuya.” (Ekisodo 31:16, Tumbuka Bible) Ndipouli, lizgu la Chihebere ilo lili kung’anamulika kuti “mtatakuya” lingang’anamuraso “kukhaliska” m’malo mwa muyirayira. Mwachiyelezgero, Baibolo likugwiliskiraso ntchito lizgu lenelili pakuyowoya za Usembe wa Israyeli, uwo ukamara vyaka pafupifupi 2,000 ivyo vyajumpha.​—Ekisodo 40:15; Ŵahebere 7:11, 12.

 Utesi: Ŵakhristu ŵakwenera kusunga Sabata chifukwa Yesu wakasunganga Sabata.

 Unenesko: Yesu wakasunganga Sabata chifukwa wakaŵa Muyuda, ntheura wakeneranga kulondezga Dango la Mozesi ilo likatenge Muyuda waliyose wakwenera kusunga Sabata. (Ŵagalatiya 4:4) Kweni Yesu wati wafwa phangano la Dango, kusazgapo dango la Sabata likaleka kugwira ntchito.​—Ŵakolose 2:13, 14.

 Utesi: Mpositole Paulosi pakuŵa Mkhristu wakasunganga Sabata.

 Unenesko: Paulosi wakanjiranga mu masunagoge pa zuŵa la sabata, kweni wakanjirangamo na chilato chakuti wasunge sabata pamoza na Ŵayuda yayi. (Milimo 13:14; 17:1-3; 18:4) Pakuti dango la ku malo agha likazomerezganga munthu kuluta mu masunagoge kukapharazgira ŵanthu, Paulosi nayo wakalutanga mu masunagoge na chilato chakuti wakapharazgire ŵanthu awo ŵiza kuzakasopa. (Milimo 13:15, 32) Nakuti Paulosi wakapharazganga “zuŵa lililose,” pa zuwa la Sabata pera yayi.​—Milimo 17:17.

 Utesi: Sabata ya Ŵakhristu mpha Sabata.

 Unenesko: Mu Baibolo mulije dango ilo likuti Ŵakhristu ŵapaturenge zuŵa la Sabata na chilato chakuti ŵapumurenge na kusopa. Mu nyengo ya Ŵakhristu ŵakwambilira, pa zuŵa la Sabata ŵanthu ŵakagwiranga ntchito nga umo ghakuŵira mazuŵa ghose. Buku linyake likuti: “Kwambira cha m’ma 300 C.E., ŵanthu ŵakamba kupatura zuŵa la Sabata kuŵa lapadera, Constantine fumu ya Ŵaroma, uyo wakasopanga Chiuta yayi, wati wadumura kuti ŵanthu ŵaleke kugwira ntchito zinyake pa Sabata.” a—The International Standard Bible Encyclopedia.

 Ni nkhani wuli za mu Baibolo izo zikulongora nga kuti zuŵa la Sabata likaŵa lapadera? Baibolo likuti mpositole Paulosi wakarya chakurya pamoza na Ŵakhristu ŵanyake “pa zuŵa lakwamba la sabata,” apo pakaŵa pa Sabata, nakuti chikaŵa chakupulikikwa chifukwa zuŵa lakulondezgapo wakaŵa kuti wakuwukapo. (Milimo 20:7) Mwakuyana waka, mipingo yinyake yikaphalirika kuti yiŵikenge padera vyakupeleka vyakovwilira Ŵakhristu ŵanyawo, pa “zuŵa lakwamba lililose la sabata,” apo pakaŵangaso pa Sabata, kweni fundo iyi yikaŵa sachizgo waka. Nakuti vyakupeleka ivi ŵakalutanga navyo ku malo ghakusoperako yayi, kweni ŵakasunganga ŵekha ku nyumba zawo.​—1 Ŵakorinte 16:1, 2.