Enya. Baibolo ni buku ilo lili na ulongozgi wa vinjeru, ndipo likuzgora mafumbo ghose ghakuzirwa agho mungaŵa nawo. Lingamovwirani kuti mujipulikenge makora kweniso kuti mukondwenge. Wonani mafumbo ghanyake agho Baibolo likuzgora.

1.   Kasi Mlengi waliko nadi? Baibolo likuti Chiuta ‘wakalenga vinthu vyose.’ (Chivumbuzi 4:11) Pakuti Chiuta ndiyo wakatilenga, wakumanya ivyo tingachita kuti tiŵe ŵakukondwa kweniso ŵakukhorwa.

2.   Kasi Chiuta wakunipwelelera nadi? M’malo mwakutitaya panji kutileka waka tekha, Baibolo likuti: “[Chiuta] wali kutali yayi na waliyose wa ise.” (Milimo 17:27) Chiuta wakumanya ivyo vikumuchitikirani ndipo wakukhumba kumovwirani kuti mukondwenge.—Yesaya 48:17, 18; 1 Petrosi 5:7.

3.   Kasi kumanya Chiuta kunganovwira wuli kuti nikondwenge? Chiuta wali kutilenga na “njara yauzimu.” Waliyose wakubabika na njara yakukhumba kumanya chifukwa icho tiliri na umoyo. (Mateyu 5:3) Tikukhumbaso kumanya uyo wakatilenga na kuŵa nayo paubwezi. Chiuta wakukondwa para mukuŵikapo mtima kusambira vya iyo kuti mumumanye makora. Baibolo likuti: “Sendelerani kwa Chiuta, ndipo iyo wasendelerenge kwa imwe.”—Yakobe 4:8.

 Ŵanthu ŵanandi ŵasanga kuti kuŵa paubwezi na Chiuta kwaŵawovwira kuŵa ŵakukhorwa na umoyo kweniso kuti ŵakondwenge. Nangauli mungasangana na masuzgo, kweni ulongozgi wa vinjeru wa mu Baibolo ungamovwirani kuti:

•   Mukondwenge mu banja linu.

•   Muŵe pa mtende na ŵanyinu.

•   Mumalane na masuzgo ghakupambanapambana nga kufipa mtima, kusuzgika maghanoghano pa nkhani ya ndalama, na matenda ghambura kukonda munkhwala.

 Matchalitchi ghanandi ghakulondezga yayi ivyo Baibolo likusambizga. Kweni chisopa chaunenesko, nyengo zose chikulondezga ivyo Baibolo likusambizga ndipo chingamovwirani kuti mumanye makora Chiuta.