Baibolo likuyowoyapo mwakudunjika yayi pa nkhani izi. Kweni lili na fundo izo zikulongora umo Chiuta wakuwonera nkhani izi. Mavesi agho ghali musi umu ghakulongora kuti nkhwananga kuwonelera vinthu vyakuwuska khumbo la kugonana:

•   “Ntheura zgorani viŵaro vya thupi linu vya pa charu chapasi kuŵa vyakufwa ku uzaghali, ukazuzi, makhumbiro ghakugonana kwambura kujikora.” (Ŵakolose 3:5) Vithuzithuzi vya ŵanthu awo ŵali bengende, vikuwuska waka makhumbiro gha kugonana. Ntheura munthu uyo wakuwonelera vinthu ivi ni mukazuzi kwa Chiuta.

•   “Waliyose uyo wakulutilira kulaŵiska mwanakazi na kuŵa nayo na khumbiro, wachita nayo kale uleŵi mu mtima wake.” (Mateyu 5:28) Munthu uyo wakuwonelera vithuzithuzi vyakuwuska khumbo lakugonana, paumaliro wangachita uzaghali.

•   “Uzaghali na ukazuzi wa mtundu uliwose panji uryezi vileke nanga nkhuzunulika pakati pinu.” (Ŵaefeso 5:3) Usange Baibolo likuti tileke kuzunura nkhani za kugonana, kuli wuli kuwonelera panji kuŵerenga?

•   “Milimo ya thupi yikuwonekera, ndipo ni uzaghali, ukazuzi, . . . na vinyake vyanthena. Pa vinthu ivi nkhumuchenjezgeranithu, nga umo nkhamuchenjezgerani kale, kuti awo ŵakuchita vinthu ivi ŵazamuhara yayi Ufumu wa Chiuta.” (Ŵagalatiya 5:19-21) Wose awo ŵakuwonelera vithuzithuzi vyauzeleza, kuyowoya panji kulemberana vyakugonana pa Intaneti panji pa foni, mbakazuzi kwa Chiuta. Usange tingachitako vinthu ivi, ubwezi withu na Chiuta unganangika.