Virginia, uyo njumoza wa Ŵakaboni ŵa Yehova, wakulwara nthenda ya kufwa viŵaro (locked-in syndrome). Viŵaro vya thupi lake vikugwiraso ntchito nga ni kale yayi. Wakulaŵiska na kupulika, kujura na kujara maso, kweniso wangendeska pachoko waka mutu. Ndipouli, wakutondeka kuyowoya na kurya. Nyengo yinyake kumasinda uku, nayo wakaŵa munthu wa nkhongono zake. Kweni mulenji unyake mu 1997, wakamba kupulika kugwaza na kuŵinya chomene ku nkhonyoro. Mfumu wake wakachimbilira nayo ku chipatala, ndipouli mise yeneyira wakakomoka. Wakawuka pati pajumpha masabata ghaŵiri, ndipo apo wakawukanga wakaŵa kuti wali mu chipinda chinyake icho wakapokeranga wovwiri wapadera, viŵaro vya thupi lake vikafwa kweniso ŵakamuŵika ku mashini ghakovwira kuti wathutenge makora. Kwa mazuŵa ghachoko waka, wakakumbukanga chilichose yayi, ndipo wakamanyangaso yayi kuti iyo ni njani.

 Virginia wakulongosora ivyo vikachitika pamanyuma pake. “Pachoko na pachoko mahara ghakamba kuweleramo. Nkhalombanga chomene kufumira pasi pa mtima. Nkhakhumbanga yayi kufwa na kuleka mwana wane munyamata uyo wakaŵa muchoko. Kuti nilutilire kuŵa wachikanga, nkhayezgayezganga kukumbuka mavesi ghanandi gha mu Baibolo.

 “Paumaliro, madokotala ghakanifumiskako ku chipinda icho nkhapokeranga wovwiri wapadera. Nkhakhala mu vipatala vyakupambanapambana na ku malo ghanyake gha kupwelelerako ŵalwari, ndipo pati pajumpha myezi 6, ŵakanifumiska na kunituma kunyumba. Thupi lane likagwirangaso ntchito yayi, ndipo nkhakhumbanga kovwirika pa chilichose. Chitima chikanikora chomene! Nkhajiwonanga kuti ndine wambura ntchito kwa Yehova kweniso ku ŵanji. Nkhafipangaso mtima kuti nipwelelerenge wuli mwana wane.

 “Nkhamba kuŵerenga nkhani zakulongosora vya Ŵakaboni awo nawo ŵakasangana na suzgo lanthena ilo nili nalo ndipo nkhazizwa chomene na ivyo ŵakamuchitiranga Yehova. Ivi vikanipangiska kuti niŵikepo mtima kuŵa na maghanoghano ghakwenelera na kuchita ivyo ningafiska. Apo nkhaŵa kuti nindambe kulwara, nkhaŵa na nyengo yichoko yakuchitira vinthu vyauzimu. Pasono nkhuŵa na nyengo zuŵa lose la msuma kweniso zuŵa lililose. Ntheura m’malo mwa kutaya chigomezgo, nkhaŵika mtima pa kuchita chilichose kuti nikondweske Yehova.

 “Nkhasambira kugwiliskira ntchito kompyuta. Nkhulemba mazgu na pulogiramu yinyake iyo yikumanya ivyo nkhukhumba kulemba pakuwona waka ivyo nachita na mutu wane. Nangauli kuchita nthena nkhwakuvuska, kweni tekinoloje yikunovwira kuti nisambirenge Baibolo na kuphalirako ŵanyane ivyo nkhugomezga kwizira mu makalata na imelu. Kuti niyowoyeskane na ŵanthu awo nili nawo pafupi, nili na kabolodi ako kali na vilembo vya alufabeti. Munthu uyo wali nane pafupi, wakulongoranga pa vilembo ivi chimoza na chimoza. Para walongora icho ine nkhukhumba yayi, nkhujura chomene maso ghane; kweni para walongora icho nkhukhumba, nkhujara maso ghane. Tikuchita nthena pera m’paka tipange mazgu na masentesi. Pasono ŵadumbu ŵanyake awo ŵakutemwa kwiza kuzakaniwona, ŵazgoka nkhwantha pa kulongora vilembo vya mazgu agho nkhukhumba kuyowoya. Nyengo zinyake para ŵalongora vilembo vyakubudika, tikuwona kuti ni nkhani yikuru yayi, tikusekanga waka.

 “Nkhukondwa chomene para nkhuchita vinthu lumoza na mpingo withu. Nyengo zose nkhujoyina ku maungano gha mpingo, ndipo pasono nkhuchita nthena kwizira pa pulogiramu yinyake iyo tikuyowoyeskana na ŵabali na ŵadumbu maso na maso (videoconferencing). Nkhulemba mazgoro ghane, ndipo munyake wakuniŵazgiranga para tafika pa chigaŵa cha mafumbo na mazgoro. Nkhujoyinangaso ku kagulu kithu ka uteŵeti kuti tiwonelere lumoza pulogiramu ya mwezi uliwose ya JW Broadcasting. a

 “Nasuzgika na nthenda ya kufwa viŵaro iyi kwa vyaka 23 sono. Nyengo zinyake chitima chikunikora. Kweni kuti nijipulikeko makora, nkhulomba, kuchezga na ŵabali na ŵadumbu, na kulutilira kuchita vinthu vyauzimu. Nakuti chifukwa cha wovwiri wa ŵabali na ŵadumbu ku mpingo, nachita upayiniya wakanyengo kwa vyaka vyakujumpha 6. Nayezgayezga kuŵa chiyelezgero chiwemi ku mwana wane, Alessandro, uyo pasono wali kutora ndipo ni mulara mu mpingo. Wose na muwoli wake, ŵakuchita upayiniya wanyengozose.

 “Nyengo zose nkhughanaghanirapo pa vinthu ivyo nizamuchita kunthazi mu paradiso. Chinthu chakwamba icho nkhukhumba kuzakachita, ndicho kuyowoya vya Yehova na mazgu ghane. Nkhukhumba kuti nizakende mumphepete mwa mlonga na kuwona umo malo ghake ghaliri ghakutowa. Pakuti pasono pajumpha vyaka 20 nkhurya chakurya kwizira mu chubu, nizamukondwa chomene kutonthola vipambi vya maapulo mu khuni na kurya nekha. Nakuti nkhukhazgaso kuzakaphika na kurya vyakurya vya kwithu ku Italy pamoza na pizza!

 “‘Chigomezgo cha chiponosko’ chanovwira kuti nivikilire maghanoghano ghane. (1 Ŵatesalonika 5:8) Para nkhujiwona kuti nili mu charu chiphya, nkhulutilira kuŵa wakukondwa nangauli nkhusuzgikira muthupi, ndipo nkhugomezga kuti suzgo ili limarenge sonosono apa. Nakuti, nkhukhazga kuzakakondwa na ‘umoyo wanadi’ uwo Yehova watilayizga kwizira mu Ufumu wake.”—1 Timote 6:19; Mateyu 6:9, 10.