Ed na muwoli wake Jennie, kakwamba ŵakayezga kupharazgira ŵanthu pa foni mu 2010. a Jennie wakuti: “Nkhawutemwa yayi upharazgi uwu, ndipo nkhaphalira mfumu wane kuti ‘Upharazgi uwu nizamuwuchitaso cha!’” Ed nayo wakaŵa na maghanoghano ghakuyana waka. Wakuti: “Nkhatemwanga yayi kuŵayimbira ŵanthu awo ŵakaniguliskanga vinthu, ndipo nkhakhumbanga yayi kuti niŵapharazgirenge pa foni.”

 Apo muliri wa COVID-19 ukambanga, Ŵakaboni ŵa Yehova ŵakaleka kupharazgira ŵanthu nyumba na nyumba. Kweni kulongora kuti ŵakupulikira ivyo Yesu wakayowoya vyakuti ŵapharazgenge makani ghawemi, ŵakalutilira kupharazga, kweni chomene ŵakagwiliskiranga ntchito makalata na upharazgi wa pa foni. (Mateyu 24:14; 28:19, 20) Kweniso, maungano gha Mpingo, kusazgapo maungano ghakunozgekera uteŵeti, ghakachitikanga kwizira pa videoconference. Pamanyuma pa maungano agha, Ed wakachita chikanga kupharazgiraso munthu pa foni, nangauli chikaŵa chakusuzga kuchita nthena. Kasi wakajipulika wuli apo wakaŵa pafupi kwimba foni kakwamba? Ed wakati: “Nkhachita wofi chomene mwakuti nkhalomba kuti Chiuta wanovwire. Pamanyuma, nkhayimba foni. Panyengo iyi ndipo nkhasangana na Tyrone.” b

 Tyrone na muwoli wake Edith, ŵakukhala ku dera la ku mizi ku Kentucky, U.S.A. Tyrone wali na vyaka 83, ndipo wakulaŵiska makora yayi. Ndipouli Tyrone wakazomera kusambira Baibolo na Ed. Para wakuŵerenga, wakugwiliskira ntchito magilasi agho ghakukuzga vilembo kuti viwonekenge vikuruvikuru ndipo nyengo zose wakasambiranga Baibolo na Ed pa foni.

 Pakajumpha mwezi umoza, ndipo wose ŵaŵiri Tyrone na Edith ŵakamba kuwungana na mpingo. Kweni pakuti ŵalije Intaneti, ŵakachitanga maungano kwizira pa foni. Kasi ntchivichi chikamupangiska Edith kuti wanweke na unenesko?

 Pa nyengo iyo Ed na Jennie ŵakasambira Baibolo na Tyrone, ŵakapulikanga apo Edith wakamuphaliranga mazgoro mfumu wake na kumovwira kusanga malemba mu Baibolo. Kweni wakaŵa wakunweka viŵi yayi kuti wasambirenge Baibolo. Jennie wakuti: “Mazgu gha Edith ghakapulikikwanga ghachitima kulongora kuti wakakhuŵara na chinthu chinyake, kweni ine na Ed tikamanya yayi chifukwa chake.”

 Zuŵa linyake Jennie wakamufumba Edith. Ndipo pa nyengo yakwenelera wakamupempha Ed kuti wayowoyepo pa foni. Iyo wakati: “A Tyrone, nkhupulika mazgu gha muwoli winu chapasipasi, ka vingachitika nthena kuti ŵaŵerengeko lemba panji kuyowoyapo?”

 Nati nayima dankha kuyowoya, Edith wakayowoya pa foni. Mwapasipasi iyo wakati: “Nkhakhumbanga kuyowoya namwe.” Ndipo pamanyuma wakati: “Ndine Kaboni wa Yehova. Kweni naŵa wakulopwa kwa vyaka 40.”

 Jennie wakazizikika chomene, ndipo wakati: “Ndimwe mudumbu na!” Ndipo wose ŵakamba kulira.

 Mwaluŵiro, Ed wakamupa burosha Edith lakuti Welerani kwa Yehova. Pa masabata ghakulondezgapo, Ed na Jennie ŵakamba kuwona kuti Edith wasintha. Ed wakuti: “Pakwamba mazgu ghake ghakapulikikwanga ghachitima chomene. Kweni sono mazgu ghake ghakupulikikwa kuti ngwakukondwa.” Pasono Edith wakuchita makora chomene mwauzimu ndipo ni mupharazgi wakukondwa wa makani ghawemi. Mfumu wake wakabatizika kuŵa Kaboni wa Yehova mu July 2022.

 Para Ed wakukumbuka vya umo wakawoneranga upharazgi wa pa foni, wakukumbukaso chidumbirano icho wakaŵa nacho na Tyrone. Ed wakati wamuŵazgira lemba la Yohane 6:44 wakamuphalira kuti Yehova ndiyo wakuguzira ŵanthu mu unenesko, Tyrone wakakolerana na fundo iyi ndipo wakati: “Nkhalindiliranga kuti munimbirenge.” Jennie nayo ngwakukondwa kuti iyo na mfumu wake ŵakachita chikanga kuchita upharazgi wa pa foni. Iyo wakuti: “Para tikuyezga kuchita vyose ivyo tingafiska pakuteŵetera Yehova, iyo wakutitumbika.”