Osman na muwoli wake kweniso mwana wawo msungwana ŵakapharazganga pa kashelufu kamatayala kufupi na malaro ghanyake ku Chile. Nyengo yeneyiyo, pakafika ŵanthu ŵanandi ŵa nyifwa, uku ŵakwimba zisumu mwakukwezga. Ŵanyake mwa ŵanthu aŵa ŵakawonanga nga kuti Osman ni muliska wa ku tchalitchi kwawo, ntheura ŵakiza pafupi, ŵakamuvumbatira, na kuchemerezga kuti, “Yewo chomene mwafika panyengo yake ŵaliska, tamulindiliraninge!”

 Osman wakayezga kuŵalongosolera ŵanthu aŵa kuti iyo ni muliska yayi, kweni ŵakapulika yayi chifukwa cha vyongo. Pati pajumpha maminiti ghachoko waka ŵanthu ŵati ŵaluta ku malaro, ŵachoko waka ŵakizaso na kumuphalira kuti, “Ŵaliska, tikulindilira imwe ku malaro uku.”

 Chongo chikati chachepako, Osman wakaŵalongosolera kuti iyo wakaŵa njani kweniso chifukwa icho wakaŵira para. Ŵanthu aŵa ŵakakwenyelera na muliska wawo chifukwa cha kutondeka kwiza, ndipo ŵakapempha Osman kuti, “Kasi mungiza na kuyowoyapo mazgu ghachoko waka ghakufuma mu Baibolo ku wumba?” Osman wakazomera.

 Apo ŵakalutanga ku dindi, Osman wakaŵafumba vya munthu wakufwa yura ndipo wakaghanaghanira malemba ghachoko waka agho wangakaŵaphalirako. Ŵati ŵafika pa dindi, wakajiphara ku mzinda ndipo wakalongosora kuti pakuŵa yumoza wa Ŵakaboni ŵa Yehova, wakuchitako ntchito ya kupharazgira ŵanthu makani ghawemi.

 Kufuma apo, wakaŵazga Chivumbuzi 21:3, 4 na Yohane 5:28, 29, ndipo wakalongosora kuti likaŵa khumbo la Chiuta yayi kuti taŵanthu tifwenge. Wakayowoya kuti sonosono apa Chiuta wazamuwuska awo ŵali kufwa, ndipo ŵazamuŵa na mwaŵi wakukhala kwamuyirayira pa charu chapasi. Osman wakati wamalizga kuyowoya, ŵanthu ŵanandi ŵakamuvumbatira na kumuwonga chifukwa cha “uthenga wa Yehova wa makani ghawemi.” Iyo wakaweleraso uko wakapharazganga pa kashelufu kamatayala.

 Ŵati ŵamara kusunga nyifwa, ŵanthu ŵanyake ŵakafika pa kashelufu kamatayala ndipo ŵakafumba Osman na banja lake mafumbo ghakukhwaskana na Baibolo. Wakadumbiskana nawo nyengo yitali, ndipo ŵakatorapo pafupifupi mabuku ghose agho ghakaŵa pa kashelufu.