Nkhababikira ku San Juan Chancalaito, tawuni yichoko ya Chiapas, ku Mexico. Ndise Ŵachol, mtundu wa Maya. Mu banja lakwithu tikaŵamo ŵana 12, ndipo ndine wachinkhondi. Apo nkhaŵa mwana, ine na ŵana ŵakwithu tikasambiranga Baibolo na Ŵakaboni ŵa Yehova. Kweni chachitima ntchakuti nkhalondezganga yayi ivyo nkhasambiranga.

 Apo nkhaŵa na vyaka 13, nkhamba kumwa munkhwala wakuzweteska wongo kweniso unkhungu. Nkhafumapo pa nyumba na kwamba kwendendeka waka. Apo nkhaŵa na vyaka 16, nkhamba kugwira ntchito ku munda uwo ŵakalimangako chamba. Nkhagwirako ntchito chaka chimoza. Usiku unyake apo tikanyamuranga chamba mu boti kuluta nacho kunyake, gulu linyake la vigeŵenga vya futi likatiwukira. Ine nkhadukira mu maji, na kukatumphukira ku mtunda. Kufuma apo nkhachimbilira ku United States.

 Ku United States, nkhalutilira kuguliska munkhwala wakuzweteska wongo, ndipo nkhajichemera masuzgo. Apo nkhaŵa na vyaka 19, ŵakanikaka ndipo wakanisanga na mulandu wa kwiba kweniso wakukhumba kukoma munthu ndipo ŵakaniphalira kuti nkhagwire jele. Mu jele, nkhajoyina gulu la vigeŵenga ndipo nkhachitanga nkhaza. Ivi vikapangiska kuti ŵanisamuskire ku jele la Lewisburg ku Pennsylvania, ilo chivikiliro chikaŵa chankhongono.

 Uku ndiko nkharo yane yikanangikirathu. Vikanisuzga yayi kumanyana na gulu la vigeŵenga apo nkhaŵa mu jele, chifukwa nkhaŵa kuti nili kale na matatuu gha gulu la vigeŵenga. Vinthu vikafikirathu paheni, nkhakhaliranga waka mbembe zuŵa lililose. Zuŵa linyake yikaŵako ya mtima bii mu jele. Tikatimbirananga visulo ivyo vikaŵa mwenemumo. Awo ŵakalonderanga jele ŵakachita kuponya matiyegasi kuti ŵalekeske mbembe. Kufuma apo, ŵakaniŵika mu selo ilo mukaŵa vigeŵenga vyakofya chomene. Pakuti nkhaŵa na mtima wakunjoŵe nkhatukanga waka waliyose, ndipo nkhakaŵanga yayi kuponya fayiti. Para natimba munthu, mbwee ine kumtima tututu. Nkhajiyimbangapo mulandu yayi chifukwa cha nkharo yane.

 Pakuti ŵakaniŵika mu selo la nekha, nkhafumangamo bweka yayi, ntheura nkhamba kuŵerenga Baibolo kuti nitayireko waka nyengo. Pamanyuma, mulinda wa jele wakanipa buku lakuti Mungathe Kukhala ndi Moyo Kosatha M’paradaiso pa Dziko Lapansi. a Nkhati naŵerenga buku ili, nkhamba kukumbuka vinthu vinandi ivyo nkhasambira na Ŵakaboni ŵa Yehova apo nkhaŵa mwana. Nkhamba kughanaghanira umo nkharo yane yikanangikira chifukwa cha uchigeŵenga. Nkhambaso kukumbuka banja lakwithu. Pa nyengo iyi, ŵadumbu ŵane ŵaŵiri ŵakaŵa kuti Mbakaboni ŵa Yehova, ntheura nkhati, ‘Ŵanyane aŵa ŵamukhala kwamuyirayira. Ine ke?’ Nkhawona kuti ntchiwemi kuti nisinthe nkharo yane.

 Kweni nkhamanya kuti panekha ningasintha yayi. Ntheura nkhalomba dankha kwa Yehova kuti wanovwire. Kufuma apo, nkhalembera kalata ofesi ya Ŵakaboni ŵa Yehova ku United States kupempha kuti nisambirenge Baibolo. Ofesi yikaphalira mpingo uwo ukaŵa pafupi na uko nkhaŵa kuti ukumane nane. Pa nyengo iyi, ŵakanizomerezganga yayi kukumana na ŵanthu awo mbabali ŵane yayi, ntheura Kaboni uyo ŵakamutuma wakamba waka kunilembera makalata ghakunikhozga kweniso kunitumira mabuku ghakulongosora Baibolo. Ivi vikanikhozga chomene ndipo vikanovwira kuti nisinthe.

 Nkhasankha kuleka kukolerana na vigeŵenga. Mulongozgi wa gulu ili nayo wakaŵa mu selo la yekha, ntheura ulendo unyake ŵakati ŵatifumiska kuti tikasangwepo, nkhakumana nayo ndipo nkhamuphalira kuti nkhukhumba kuŵa Kaboni ŵa Yehova. Nkhazizwa chomene apo wakaniphalira kuti: “Usange ukukhumba nadi, palije suzgo. Ine ningalimbana na Chiuta yayi. Kweni para wakhumba waka kufumamo mu gulu lithu, manya kuti ukujichemera masuzgo.”

 Pakati pajumpha vyaka viŵiri, ŵalinda ŵa jele ŵakamba kuwona kuti nasintha nkharo yane. Ntheura ŵakasintha umo ŵakachitiranga nane pakwamba. Mwachiyelezgero, ŵakaleka kunikaka simbi para ŵakukanilinda kuti nkhageze. Yumoza wa ŵalinda wakanikhozga ndipo wakaniphalira kuti nilutilire kusintha. Kwati kwakhala chaka chimoza kuti nifume, ŵakanisamuskira ku jele linyake uko chivikiliro chikaŵa chichoko kuyelezgera na uko nkhaŵa pakwamba. Mu 2004, nati nagwira jele vyaka 10, ŵakanifumiska na kunituma kwithu ku Mexico pa basi yawo.

 Nkhati nafika waka ku Mexico, nkhaluta ku Nyumba ya Ufumu ya Ŵakaboni ŵa Yehova. Zuŵa lakwamba ku maungano nkhavwara yunifomu ya ku jele, chifukwa ndigho ghekha ghakaŵa malaya ghawemi agho nkhaŵa nagho. Nangauli nkhawonekanga makora yayi, kweni Ŵakaboni ŵakanipokelera makora. Nati nawona lusungu ulo ŵakanilongora, nkhajipulika kuti nili nadi pakati pa Ŵakhristu ŵaunenesko. (Yohane 13:35) Zuŵa lenelira, ŵalara ŵakapanga ndondomeko yakuti nambe kusambira Baibolo. Pakati pajumpha chaka chimoza kufuma apo nkhambira kusambira Baibolo, nkhabatizika pa September 3, 2005, na kuŵa Kaboni wa Yehova.

 Mu January 2007, nkhamba kumalira maora 70 pakupharazga na kusambizga ŵanthu Baibolo. Mu 2011, nkhanjira Sukulu ya Kusambizga Baibolo ya Ŵabali Ŵambura Kutora (sukulu iyi sono yikumanyikwa kuti Sukulu ya Ŵapharazgi ŵa Ufumu). Sukulu iyi yikanovwira chomene kuti nifiske milimo yakupambanapambana mu mpingo.

 Mu 2013, nkhatora Pilar, mwanakazi uyo nkhumutemwa chomene. Apo nkhamuphaliranga ivyo nkhachitanga kale wakazizwa chomene ndipo wakagomezga yayi. Nakuti nindawelereposo ku nkharo yane yakale. Ine na muwoli wane tikuwona kuti umo nili kusinthira, mbukaboni wakuti Baibolo likusintha nadi umoyo wa munthu.—Ŵaroma 12:2.

 Nkhuwona kuti pa Luka 19:10, Yesu wakanenanga ine. Iyo wakati: “[Nkhiza] kuzakapenja na kuponoska icho chikazgeŵa.” Sono niliso wakuzgeŵa yayi, ndipo nili kuleka mbembe. Baibolo lanovwira kuti niŵe na umoyo uwemi, niŵe pamtende na ŵanthu, ndipo chakuzirwa chomene nili pa ubwezi uwemi na Yehova, Mlengi.