Ŵakaboni ŵa Yehova ŵali kumalizga kuzenga maofesi ghanyake pa Watchtower Farms ku Wallkill, New York. Ntchito iyi yatora vyaka 6. Kwati kwakhala vyaka viŵiri kuti ntchito iyi yimare, pakakhumbikwira ŵanthu ŵanadi kuti ŵawovwirepo. Ivi vikapangiska kuti ŵasange nyumba zinyake za lenti kuti ŵanthu aŵa ŵakhalengemo. Ntheura ŵakasanga nyumba 25 mu chigaŵa ichi.

Kasi ŵeneko nyumba ŵakati wuli na Ŵakaboni ŵa Yehova awo ŵakachitanga lenti nyumba zawo?

• Mwanakazi munyake wakalemba kuti: “Tikakhalanga nawo makora ŵalenti ŵithu. Ine na mfumu tikakondwanga na ŵanthu aŵa chifukwa tikaŵa nawo paubwezi ndipo tikakolerananga chomene.”

• Mwanakazi munyake wakalemba kuti: Vikanozganga kukhala na ŵalenti ŵithu. Kuseri kwa nyumba yithu kuli kachiziŵa ka maji, ndipo ŵalenti ŵithu ŵakatemwanga kuskamba pa kachiziŵa aka. Ŵakachitanga vinthu mwantchindi ndipo ŵakaghanaghaniranga ŵanyawo. Tikakondwanga nawo chomene kweni sono pamaso pafipenge. Tiŵaluwenge yayi.”

• Landilodi munyake wakati: “Tikakondwanga chomene na ŵanthu aŵa. Nangauli ŵakaŵa ŵalenti, ŵakazgokaso ŵabwezi ŵithu.”

Ivyo ŵeneko nyumba ŵakalemba pa nkhani ya nyumba zawo za lenti izo mukakhalanga Ŵakaboni ŵa Yehova.

• “Ŵakalipiranga lenti pa nyengo yake, nyumba ŵakazipweleleranga ndipo ŵakazileka kuti zili makora.”

• Landilodi munyake wakati: “Tikuwonga chomene ŵa Watchtower chifukwa chakupwelelera makora nyumba zithu. Nkhamanyanga yayi kuti Ŵakaboni ŵa Yehova ŵangayitoweska nthena.”

• Mwanakazi munyake wakati: “Tikaŵapempha yayi kuti ŵapelekerethu ndalama yakunozgera vinthu ivyo vyanangika chifukwa tikamanyanga kuti Ŵakaboni ŵa Yehova mbakugomezgeka. Apo ŵakafumangamo, nyumba zithu ŵakazileka kuti zili makora chomene.”

• Pamanyuma pakuti Ŵakaboni ŵa Yehova ŵamunozgera nyumba yake ya lenti, mweneko wakati: “Kasi ningachita wuli kuti ŵanthu ŵinu ŵazakanigwilirengeko ntchito. Nyengo zose para mwalayizga kuzakanozga nyumba yane, mukachitanga ivyo mwalayizga kweniso panyengo yake. Ŵanthu ŵanyake ndimo ŵakuchitira yayi.”

• Kwati kwakhala kanyengo kachoko waka kuti Ŵakaboni ŵa Yehova ŵafumemo mu nyumba yinyake iyo ŵakapanganga lenti, landilodi wakalemba kuti: “Usange mukukhumba kulutilira kukhalamo, ningamukhiziraniko ndalama ya lenti.”

• Munyake wakati: “Usange mwaŵi ungasangika tingatemwa kuti ŵa Watchtower ŵachiteso lenti nyumba yithu.”