Ŵakaboni ŵa Yehova ŵakupharazgira ŵanthu wose uthenga wa mu Baibolo chifukwa ŵakutemwa Chiuta na ŵanthu, nanga ni awo pakwamba ŵakakana. (Mateyu 22:37-39) Tikutemwa Chiuta lekani tikupulikira dango ilo Mwana wake wakayowoya kuti tikwenera “kupeleka ukaboni wakukwana.” (Milimo 10:42; 1 Yohane 5:3) Kuti tifiske dango ili, tikwenera kupharazga uthenga wa Chiuta mwakuwerezgawerezga nga umo ntchimi za Chiuta zikachitiranga. (Yeremiya 25:4) Pakuti tikutemwa ŵanthu, tikuleka yayi kupharazga ‘makani ghawemi gha Ufumu’ uwo ni uthenga wakuponoska umoyo. Tikupharazgira ŵanthu wose nanga ni awo ŵakakana.—Mateyu 24:14.

 Kanandi para tawelerakoso ku nyumba za awo pakwamba ŵakatikana, tikusanga ŵanthu awo ŵakukhumba kupulika makani ghawemi. Wonani vifukwa vitatu ivyo tikuwelerakoso:

•   Ŵanthu ŵakusama.

•   Ŵanyake pa nyumba iyi ŵangatemwa kupulikako uthenga withu.

•   Ŵanthu ŵakusintha. Vinthu vingasintha mu charu kweniso pa umoyo wa munthu ndipo vingapangiska munthu kuti waŵe na “njara yauzimu” na kwamba kutemwa uthenga wa mu Baibolo. (Mateyu 5:3) Ŵanthu awo pakwamba ŵakakana nawo ŵangasintha nga umo wakachitira mpositole Paulosi.—1 Timote 1:13.

 Ndipouli, tikuchichizga munthu yayi kuti wapulike uthenga withu. (1 Petrosi 3:15) Tikugomezga kuti waliyose wakwenera kusankha yekha pa nkhani ya chisopa.—Dotoronome 30:19, 20.