Ebyombeko nambere tuso’rokanira byetwa Ebyombeko by’Obukama. Kinu kihikire habwokuba enyegesa enkuru eziba omu nso’rokano zaitu zikwata ha Bukama bwa Ruhanga, kandi nugwo gwali omutwe omukuru gw’okutebeza kwa Yesu.—Luka 8:1.

Bikurakuraniza okuramya okw’amananu. Ab’oruganda nuho basigikira nibagenda kutebeza amakuru amarungi ag’Obukama. (Matayo 24:14) Ebyombeko by’Obukama tibinganaingana omu bukooto baitu byoona byombekwa omu mulingo oguheisa Ruhanga ekitiniisa. Ebirukukira obwingi biso’rokanirwamu ebitebe ebirukuhingura omu kimu. Omu myaka erabireho, Ebyombeko by’Obukama biingi muno byombekerwe (ebyombeko nka bitaano buli kiro) habw’enkurakurana ey’amaani ehikirweho omu bitebe byaitu. Kinu kisobokere kita?—Matayo 19:26.

Sente ez’okwombeka ziruga omu kuhayo okw’okwegondeza. Sente ezihairweyo zitwarwa ha ofiisi y’itaagi nukwo zisobole kukonyera ebitebe ebindi ebirukwetaaga kwombeka rundi kudabiriza Ebyombeko by’Obukama.

Ababyombeka behayo kukorra busa. Omu nsi nyingi, haliyo Ab’oruganda Abombeka Ebyombeko by’Obukama. Ab’oruganda banu bagenda omu bitebe eby’enyahukana, nibakonyera omu kwombeka n’okutendeka ab’oruganda abasangirweyo omu mulimo gw’okwombeka. Omu nsi ezindi, ab’oruganda bakomerwe kurolerra omulimo gw’okwombeka n’okudabiriza Ebyombeko by’Obukama. Ab’oruganda abarukukira obwingi abasagika omu mulimo ogw’okwombeka baba ab’omu kitebe n’obukiraaba ngu haroro ab’oruganda abasindikibwa kwombeka. Ab’oruganda abarukwombekerwa Ekyombeko ky’Obukama behayo omu bwingi kukonyera ha mulimo gw’okwombeka. Omulimo gunu gusoboire kugenda omu maiso habwokuba Yahwe aha abantu be omwoyo gwe ogubasobozesa kukora n’omutima gwabu gwona.—Zabuli 127:1; Abakolosai 3:23.

• Habwaki ebiikaro nambere turamiza Ruhanga byetwa Ebyombeko by’Obukama?

• Kiki ekitusobozesa kwombeka Ebyombeko by’Obukama okwehinguliriza ensi yoona?