Yesu atakafiire, akagamba ngu: “N’enjiri enu eyobukama eritebezebwa omu nsi zona, okuba kaiso hali amahanga gona; nubwo empero erihika.” (Matayo 24:14) Omulimo gunu ogukaba gwina kukorwa omu nsi yoona, gw’akuhikiriziibwe guta? Kyakusobokere nituhondera ekyokurorraho Yesu eki y’ateireho obwakaba akyaali omu nsi.—Luka 8:1.

Tulengaho kuhikirra abantu omu maka gaabu. Yesu akatendeka abageswa be kutebeza amakuru amarungi nju ha nju. (Matayo 10:11-13; Engeso 5:42; 20:20) Abatebezi abo ab’ekyasa eky’okubanza baali bahairwe ekicweka ky’okutebezamu. (Matayo 10:5, 6; 2 Abakolinso 10:13) Omu mulingo nugwo gumu, okutebeza kwaitu kutekaniziibwe kurungi, kandi buli kitebe kihairwe ekicweka kyakyo eky’okutebezamu. Kinu kitusobozesa kuhikiriza ekiragiro kya Yesu y’ahaire, “okutebeza abantu, n’okuba bakaiso.”—Engeso 10:42.

Tugenda hoona nambere turukusobora kusanga abantu. Yesu akataho ekyokurorraho n’atebeza omu biikaro byoona nka ha byambu by’enyaanja, rundi ha iziba. (Marako 4:1; Yohana 4:5-15) Naitwe tubaza n’abantu ha bukwenda kuruga omu Baibuli hoona nambere tuba tubasangire, gamba nk’omu nguudo, nambere bakorra, omu biikaro by’okuhumurramu, rundi ha simu. Omugisa obu gweyoleka, tuha obukaiso abatahi baitu, abatukora nabo, abatusoma nabo, n’abanyabuzale baitu. Habwokuba ab’oruganda bakozere kyoona ekirukusoboka, kikonyiire abantu baingi muno kuhu’ra amakuru amarungi agarukuleta kujunwa.—Zabuli 96:2.

Osobora kutekereza ha muntu weena ou wakugondeze kugambiraho amakuru amarungi agarukukwata ha Bukama bwa Ruhanga, n’omulingo garukusobora kumugasiramu? Gambira abandi obukwenda bunu oburukuleta okunihira, otabwesigaliza.

• Makuru ki amarungi againa kutebezebwa?

• Abakaiso ba Yahwe bahondera bata ekyokurorraho kya Yesu nibatebeza?