I Vamani Lava Yaka eTilweni?

TLANGA

Nhlamulo ya Bibele

Xikwembu xi hlawula Vakreste vo karhi vo tshembeka, lava loko va fa va pfuxeriwaka ku ya hanya etilweni. (1 Petro 1:3, 4) Loko va hlawuriwile, va fanele va ya emahlweni va tiyisa ripfumelo ra vona ni ku tikhoma kahle leswaku va nga soleki ivi va nga yi kumi ndzhaka ya vona ya ku hanya etilweni.—Vaefesa 5:5; Vafilipiya 3:12-14.

Lava yaka etilweni va ya endla yini?

Va ta va tihosi tlhelo vaprista swin’we na Yesu ku ringana malembe ya 1 000. (Nhlavutelo 5:9, 10; 20:6) Va ta vumba “matilo lamantshwa” kumbe mfumo wa le tilweni lowu nga ta fuma “misava leyintshwa” kumbe vanhu. Tihosi leti ti nga ta fuma ti ri etilweni ti ta pfuna vanhu leswaku va tlhela va va lava lulameke hilaha Xikwembu a xi swi lave hakona.—Esaya 65:17; 2 Petro 3:13.

I vanhu vangani lava nga pfuxeriwa ku ya etilweni?

Bibele yi vula leswaku vanhu va 144 000 va ta pfuxeriwa ku ya hanya etilweni. (Nhlavutelo 7:4) Eka xivono lexi nga tsariwa eka Nhlavutelo 14:1-3, muapostola Yohane u vone “Xinyimpfana xi yime eNtshaveni ya Siyoni, xi ri ni lava 144 000.” Eka xivono xexo, “Xinyimpfana” xi yimela Yesu la pfuxiweke. (Yohane 1:29; 1 Petro 1:19) “Ntshava ya Siyoni” yi yimela xikhundlha lexi tlakukeke xa Yesu ni xa lava 144 000 lava nga ta fuma na yena etilweni.—Pisalema 2:6; Vaheveru 12:22.

“Lava vitaniweke, lava hlawuriweke” leswaku va fuma na Kreste eMfun’weni wa Xikwembu va vuriwa “ntlhambinyana.” (Nhlavutelo 17:14; Luka 12:32) Leswi swi kombisa leswaku i vanhu vatsongo loko va pimanisiwa ni nhlayo leyi heleleke ya tinyimpfu ta Yesu.—Yohane 10:16.

Swilo leswi nga riki ntiyiso hi lava yaka etilweni

Mavunwa: Vanhu hinkwavo vo lulama va ya etilweni.

Ntiyiso: Xikwembu xi tshembisa leswaku vanhu vo tala vo lulama va ta hanya hilaha ku nga heriki emisaveni.—Pisalema 37:11, 29, 34.

Yesu u te: “A ku na munhu loyi a nga tshama a tlhandlukela etilweni.” (Yohane 3:13) U kombise leswaku vanhu vo lulama lava nga fa a si ta emisaveni vo fana na Abrahama, Muxe, Yobo na Davhida a va yanga etilweni. (Mitirho 2:29, 34) Kambe a va tshemba leswaku va ta pfuxiwa va hanya laha misaveni.—Yobo 14:13-15.
Lava nga ta ya etilweni hi vona va nga ta ‘sungula va pfuxiwa.’ (Nhlavutelo 20:6) Leswi swi vula leswaku ku ta va ni ku pfuxiwa kun’wana. Ku ta pfuxiwa lava nga ta hanya laha misaveni.
Bibele yi dyondzisa leswaku “rifu a ri nge he vi kona” loko ku fuma Mfumo wa Xikwembu. (Nhlavutelo 21:3, 4) Xitshembiso xexo xi vulavula hi laha misaveni hikuva etilweni a ku si tshama ku va na rifu.

Mavunwa: Munhu wo tihlawulela loko a lava ku hanya etilweni kumbe emisaveni.

Ntiyiso: Xikwembu hi xona xi hlawulaka leswaku i Vakreste vahi vo tshembeka lava nga ta “kuma hakelo ya ku vitaneriwa etilweni” leswi vulaka leswaku va ta hanya etilweni. (Vafilipiya 3:14) Xikwembu a xi hlawuli munhu hi leswi a navelaka ku ya etilweni.—Matewu 20:20-23.

Mavunwa: Vambuyangwana hi vona va nga ta hanya hilaha ku nga heriki emisaveni hi ku va a va faneleki ku ya etilweni.

Ntiyiso: Xikwembu xi vitana lava nga ta hanya hilaha ku nga heriki laha misaveni “vanhu va mina,” “vanhu va mina lava ndzi va hlawuleke” ni “vanhu lava katekisiweke hi Yehovha.” (Esaya 65:21-23) Va ta va ni nkateko wo va leswi Xikwembu a xi lava leswaku vanhu va va swona ku sukela eku sunguleni, va ta hanya hilaha ku nga heriki kona kwala misaveni eparadeyisini va nga ri na xidyoho.—Genesa 1:28; Pisalema 115:16; Esaya 45:18.

Mavunwa: Nomboro ya 144 000 leyi boxiwaka eka Nhlavutelo i yo fanekisela.

Ntiyiso: Hambileswi buku ya Nhlavutelo yi nga ni tinomboro to fanekisela, tinomboro tin’wana i ta ntiyiso. Hi xikombiso yi vulavula hi “mavito ya 12 ya vaapostola va 12 va Xinyimpfana.” (Nhlavutelo 21:14) Xiya xikombiso lexi kombisaka leswaku nomboro ya 144 000 a hi yo fanekisela.

Nhlavutelo 7:4 yi vulavula hi “nhlayo ya lava funghiweke, [kumbe lava ku nga tiyisekisiwa leswaku va ta hanya etilweni leswaku i] 144 000.” Tindzimana leti landzelaka vhese leyi, ti vulavula hi ntlawa wa vumbirhi ku nga: “ntshungu lowukulu, lowu a ku nga ri na munhu la kotaka ku wu hlaya.” Lava “ntshungu lowukulu” na vona va ponisiwa hi Xikwembu. (Nhlavutelo 7:9, 10) Loko nhlayo ya 144 000 yi ri yo fanekisela naswona yi kombetela eka ntlawa lowu nhlayo ya kona yi nga tivekiki, a swi nga ta koteka ku hambanisa mitlawa yoleyo yimbirhi. a

Kasi xin’wana lava 144 000 va hlamuseriwa va ri lava “xaviwe[ke] evanhwini leswaku va va ntshovelo wo sungula.” (Nhlavutelo 14:4) Xiga lexi nge “ntshovelo wo sungula” xi vula nhlayo yitsongo ya vanhu lava hlawuriweke. Xi kombetela eka lava nga ta fuma na Kreste etilweni va fuma vanhu emisaveni lava nhlayo ya vona yi nga tiviwiki.—Nhlavutelo 5:10.

a Hilaha ku fanaka Profesa Robert L. Thomas u tsale leswi hi nhlayo ya 144 000 leyi ku vulavuriwaka ha yona eka Nhlavutelo 7:4: “I nhlayo ya xiviri loko yi pimanisiwa ni leyi nga eka 7:9. Loko yi nga ri ya xiviri swi vula leswaku tinhlayo hinkwato leti nga eka buku ya Nhlavutelo a hi fanelanga hi ti teka ti ri ta xiviri.”—Nhlavutelo 1-7: An Exegetical Commentary, tluka 474.