Yohane 1:1-51
1 Eku sunguleni Rito+ a a ri kona, Rito a a ri ni Xikwembu+ naswona Rito a a ri xikwembu.+
2 A a ri ni Xikwembu ku sukela eku sunguleni.
3 Xikwembu xi tirhise yena+ ku vumba swilo hinkwaswo naswona handle ka yena ku hava xilo ni xin’we lexi veke kona.
4 Xi tlhele xi tirhisa yena ku tumbuluxa vutomi naswona vutomi byi ve ku vonakala eka vanhu.+
5 Ku vonakala ku voningela munyama,+ kambe munyama a wu swi kotanga ku funengeta ku vonakala.
6 Ku te wanuna loyi a a rhumiwe ku va muyimeri wa Xikwembu; vito rakwe a ku ri Yohane.+
7 Wanuna loyi u tile tanihi mbhoni, a nyikela vumbhoni mayelana ni ku vonakala,+ leswaku vanhu va mixaka hinkwayo va ta va ni ripfumelo hikwalaho ka yena.
8 A a nga ri ku vonakala koloko,+ kambe a a fanele ku nyikela vumbhoni hi ku vonakala koloko.
9 Ku vonakala ka ntiyiso loku voningelaka vanhu va tinxaka hinkwato a ku ri kusuhi ni ku ta emisaveni.+
10 U tile emisaveni+ naswona Xikwembu xi tirhise yena ku yi vumba,+ kambe misava a yi n’wi tivanga.
11 U te ekaya ka vona, kambe vanhu va ka vona a va n’wi amukelanga.
12 Hambiswiritano, lava n’wi amukeleke u va nyike mfanelo yo va vana va Xikwembu+ hikuva va ve ni ripfumelo evitweni rakwe.+
13 A va velekiwanga hi nyama ni ngati kumbe hi ku rhandza ka munhu, kambe va velekiwe hi Xikwembu.+
14 Rito u ve munhu*+ kutani a tshama na hina, naswona hi vone ku vangama kakwe, ku vangama loku fanelaka n’wana loyi a tswariweke a ri swakwe+ eka tata wakwe; naswona a a ri ni musa lowukulu wa Xikwembu ni ntiyiso.
15 (Yohane u nyikele vumbhoni ha yena, kutani a huwelela a ku: “Loyi hi yena loyi a ndzi vulavula ha yena loko ndzi ku, ‘Loyi a taka endzhaku ka mina i nkulu, hikuva u ve kona ndzi nga si va kona.’”)+
16 Hikwalaho ka leswi a a ri ni musa lowukulu ni ntiyiso, na hina hi nyikiwe musa lowukulu.
17 Xikwembu xi hi nyike Nawu hi ku tirhisa Muxe,+ kambe xi hi nyike musa+ lowukulu ni ntiyiso hi ku tirhisa Yesu Kreste.+
18 A ku na munhu loyi a tshameke a vona Xikwembu;+ kambe xikwembu lexi ku nga N’wana loyi a tswariweke a ri swakwe+ loyi a tshameke etlhelo* ka Tata wakwe+ u hi hlamusele leswaku Xikwembu i mani.+
19 Lebyi i vumbhoni lebyi Yohane a byi nyikeleke loko Vayuda va rhuma vaprista ni Valevhi lava humaka eYerusalema, ku ya n’wi vutisa va ku: “Hi wena mani?”+
20 U va byele ntiyiso a ku: “A hi mina Kreste.”
21 Hiloko va n’wi vutisa va ku: “Hi wena mani? Xana hi wena Eliya?”+ A va hlamula a ku: “A ndzi yena.” “Xana u Muprofeta?”+ A tlhela a va hlamula a ku: “E-e!”
22 Hiloko va ku: “Hi wena mani? Hi byele leswaku hi ta kota ku ya hlamusela lava hi rhumeke. Xana u nga tihlamuserisa ku yini?”
23 Hiloko a ku: “Ndzi rito ra un’wana loyi a huwelelaka emananga a ku, ‘Basisani ndlela ya Yehovha,’*+ hilaha muprofeta Esaya a vuleke hakona.”+
24 Vanhu lava a va ri eku vutiseni a va rhumiwe hi Vafarisi.
25 Hiloko va n’wi vutisa va ku: “Hikwalaho ka yini u khuvula vanhu loko u nga ri Kreste, Eliya kumbe Muprofeta?”
26 Yohane a va hlamula, a ku: “Mina ndzi khuvula hi mati. Exikarhi ka n’wina ku yime munhu loyi mi nga n’wi tiviki,
27 loyi a taka endzhaku ka mina, naswona a ndzi faneleki ku tshunxa tintambu ta maphaxani yakwe.”+
28 Timhaka leti ti endleke eBetaniya entsungeni wa Yordani, laha Yohane a a khuvula vanhu kona.+
29 Hi siku leri landzelaka a vona Yesu a ta eka yena, ivi a ku: “Vonani Xinyimpfana+ xa Xikwembu lexi susaka xidyoho+ emisaveni!+
30 Hi yena loyi a ndzi vula yena, loko ndzi ku: ‘Wanuna loyi a nga ta ta endzhaku ka mina i nkulu, hikuva u ve kona ndzi nga si va kona.’+
31 Na mina a ndzi nga n’wi tivi, kambe ndzi khuvula vanhu hi mati leswaku a ta tiveka eIsrayele.”+
32 Yohane a tlhela a nyikela vumbhoni, a ku: “Ndzi vone moya lowo kwetsima wu xika ku fana ni tuva wu huma etilweni, wu fika wu tshama ehenhla ka yena.+
33 Na mina a ndzi nga n’wi tivi, kambe Loyi a ndzi rhumeke ku khuvula vanhu hi mati u te: ‘Loyi u nga ta vona moya lowo kwetsima wu ehla ivi wu fika wu tshama ehenhla ka yena,+ hi yena loyi a khuvulaka hi moya lowo kwetsima.’+
34 Kutani ndzi swi vonile, naswona ndzi nyikele vumbhoni bya leswaku loyi i N’wana wa Xikwembu.”+
35 Hi siku leri landzelaka, Yohane a tlhela a yima kwalaho ni vadyondzisiwa vakwe vambirhi,
36 kutani loko a vona Yesu a ri karhi a hundza, a ku: “Vonani Xinyimpfana+ xa Xikwembu!”
37 Loko vadyondzisiwa volavo va n’wi twa a vula sweswo, va landzela Yesu.
38 Yesu a hundzuluka, kutani a va vona va n’wi landzela, hiloko a ku: “Mi lava yini?” Vona va ku: “Rabi, (leri loko ri hundzuluxeriwa ri vulaka, “Mudyondzisi”), xana u tshama kwihi?”
39 A va hlamula a ku: “A hi fambeni mi ya ku vona.” Hiloko va famba va ya vona laha a tshama kona, ivi va tshama na yena siku rero; a ku ri kwalomu ka awara ya vukhume.*
40 Andriya,+ makwavo wa Simoni Petro a a ri un’wana wa lavambirhi lava tweke leswi Yohane a swi vuleke, ivi va landzela Yesu.
41 U rhange hi ku ya lava makwavo Simoni, kutani a ku eka yena: “Hi kume Mesiya”+ (leri loko ri hundzuluxeriwa ri vulaka, “Kreste”),
42 hiloko a famba na yena eka Yesu. Kutani Yesu a n’wi languta a ku: “Hi wena Simoni+ n’wana wa Yohane; u ta vuriwa Khefasi” (leri loko ri hundzuluxeriwa ku nga “Petro”).+
43 Hi siku leri landzelaka, Yesu a a lava ku ya eGaleliya. Hiloko a hlangana na Filipi+ kutani a ku: “Vana mulandzeri wa mina.”
44 Filipi a a huma eBetsayida, laha Andriya na Petro va humaka kona.
45 Filipi a kuma Nathaniyele,+ kutani a ku: “Hi kume Yesu n’wana wa Yosefa,+ loyi a humaka eNazareta. Loyi ku vulavuriwaka hi yena eka Nawu wa Muxe ni le ka leswi tsariweke hi Vaprofeta.”
46 Kambe Nathaniyele a ku: “Xana ku nga huma nchumu lowunene eNazareta?” Filipi a n’wi hlamula a ku: “Tana u ta vona.”
47 Yesu a vona Nathaniyele a ri karhi a ta kutani a ku: “Vonani Muisrayele loyi a nga riki na vukanganyisi.”+
48 Nathaniyele a ku: “U ndzi tivisa ku yini?” Yesu a n’wi hlamula a ku: “Ndzi ku vone ehansi ka nkuwa, Filipi a nga si ku vitana.”
49 Nathaniyele a ku: “Rabi, wena u N’wana wa Xikwembu, u Hosi ya Israyele.”+
50 Yesu a n’wi hlamula a ku: “Xana u tshemba hileswi ndzi ku byeleke leswaku ndzi ku vone ehansi ka nkuwa? U ta vona swilo leswikulu ku tlula leswi.”
51 A tlhela a ku: “Hakunene ndzi tiyisile ndzi ri eka n’wina, mi ta vona matilo ma pfuleka kutani tintsumi ta Xikwembu ti ta eka N’wana wa munhu ti huma hi le matilweni, ti tlhela ti tlhandlukela kona.”+
Tinhlamuselo ta le hansi
^ Hi Xigriki, “nyama.”
^ I ndhawu leyi kombaka leswaku munhu wa rhandzeka.
^ Vona Xiengetelo A5.
^ Ku nga kwalomu ka awara ya 4:00 nindzhenga.
