Nicolas na Céline va langutane ni tlhontlho wun’wana. Loko rhavi ra le Furwa ri va nyike xiavelo xo rhurhela evandlheni lerintshwa, va xi amukerile. Va ri: “Eku sunguleni a hi tsakile kambe hi ku famba ka nkarhi hi sungule ku tsundzuka vanghana va hina. A hi nga si va tolovela kahle vamakwerhu va le vandlheni lerintshwa.” a Hambileswi swi tikaka kambe i yini leswi u nga swi endlaka leswaku u tolovela vandlha lerintshwa? Van’wana va nga endla yini ku pfuna lava rhurheleke evandlheni lerintshwa? Mi nga khutazana hi ndlela yihi ni vamakwerhu evandlheni leri u rhurheleke eka rona?

SWILO SWA MUNE LESWI NGA KU PFUNAKA U TOLOVELA VANDLHA LERINTSHWA

1. Titshege hi Yehovha. (Ps. 37:5) Loko nuna wa Kazumi wa le Japani a kuma ntirho endhawini yin’wana, va rhurhile evandlheni leri va hlanganyeleke eka rona malembe ya kwalomu ka 20. Xana Kazumi u swi kotise ku yini ku “andlala ndlela ya[kwe] eka Yehovha”? U ri: “Ndzi byele Yehovha leswi a swi ndzi chavisa, swi ndzi vilerisa ni hi xivundza lexi a ndzi ri na xona. Mikarhi hinkwayo loko ndzi khongela, a a ndzi nyika matimba lawa a ndzi ma lava.”

I yini leswi nga ku pfunaka u titshega hi Yehovha? Ku fana ni leswi ximilana lexi byariweke xi lavaka ku cheletiwa leswaku xi kula, swi tano na hi ripfumelo ra hina, hi fanele hi tiwundla leswaku ri kula. Nicolas loyi ku vulavuriweke ha yena eku sunguleni, u kume leswaku ku anakanyisisa hi vavanuna lava titsoneke swo tala leswaku va endla ku rhandza ka Xikwembu vo fana na Abrahama, Yesu na Pawulo swi n’wi pfune a tshemba leswaku Yehovha  u ta n’wi seketela. Ku va ni dyondzo ya munhu hi yexe ya Bibele nkarhi ni nkarhi swi ta ku pfuna u tolovela ku cinca loku nga kona evuton’wini bya wena, u tlhela u khutaza vamakwerhu evandlheni lerintshwa.

2. Papalata ku langutela leswaku swilo swi endliwa ku fana ni le vandlheni ra wena ra khale. (Ekl. 7:10) Jules u vone ku hambana lokukulu ka mindhavuko loko a rhurhela eUnited States a suka eBenin. U ri: “A ndzi titwa ndzi boheka ku byela un’wana ni un’wana loyi a ndzi hlangana na yena hi ta vutomi bya mina.” Hikwalaho ka leswi sweswo a a nga swi tolovelanga, u sungule ku papalata vamakwerhu. Hambiswiritano, endzhaku ka loko a va tive ku antswa, u cince langutelo rakwe. U ri: “Sweswi ndza swi xiya leswaku vanhu ha fana swi nga ri na mhaka leswaku hi tshama kwihi. Ho va ni maendlelo yo hambana ya swilo. I swa nkoka ku amukela vanhu hi ndlela leyi va nga hayona.” Hikwalaho, papalata ku ringanisa vamakwerhu ni va le vandlheni ra wena ra khale. Anne-Lise loyi ku nga makwerhu wa xisati la nga phayona u swi veka hi ndlela leyi: “A ndzi rhurhelanga ku kuma swilo leswi ndzi swi siyeke endzhaku. Ndzi rhurhele ku dyondza swilo leswintshwa.”

Vakulu na vona va fanele va papalata ku ringanisa vandlha leri va humaka eka rona ni leri va nga eka rona sweswi. Ku endla swilo hi ndlela leyi hambaneke, a swi vuli swona leswaku ndlela yoleyo yi hoxile. I vutlhari ku rhanga u tiva swiyimo swa vandlha ra wena lerintshwa u nga si vula swiringanyeto swa wena. (Ekl. 3:​1, 7b) I swinene ku vekela vamakwerhu xikombiso lexinene ku ri ni ku va sindzisa leswaku va endla swilo hi ndlela ya wena.—2 Kor. 1:24.

3. Katseka eka mitirho leyi endliwaka evandlheni. (Filp. 1:27) Ku rhurha swi lava nkarhi wo tala ni matimba kambe i swa nkoka ku ya etidyondzweni hi xiviri loko swi koteka to ho suka. Phela loko vamakwerhu evandlheni ra wena lerintshwa va nga ku voni kumbe va ku vona hi xiwelo, a swi nge va oloveli ku ku seketela. Lucinda loyi a rhurheleke edorobeni lerikulu laha Afrika Dzonga ni tintombhi takwe timbirhi u ri: “Un’wana u ndzi tsundzuxe leswaku ndzi katseka hilaha ku heleleke eka mitirho leyi endliwaka evandlheni, ku tirha ni vamakwerhu ensin’wini ni ku hlamula etidyondzweni. Hi tlhele hi pfumela leswaku vamakwerhu va tirhisa kaya ra hina ku khoma nhlengeletano ya nsimu.”

‘Ku tirha hi vun’we’ ni vamakwerhu entirhweni wa Xikwembu evandlheni ra wena lerintshwa i ndlela leyinene yo tiyisa “ripfumelo leri vaka kona hikwalaho ka mahungu lamanene.” Vakulu va khutaze Anne-Lise, loyi hi buleke ha yena leswaku a ringeta ku tirha nsimu ni vamakwerhu hinkwavo. Xana ku endleke yini? U ri: “Ndzi hatle ndzi swi xiya leswaku sweswo swi ndzi pfuna ndzi hatla ndzi tolovela vandlha.” Loko u va kona loko ku basisiwa ni loko ku lunghisiwa Holo ya Mfumo, u kombisa leswaku a wa ha ri muendzi. Loko u ya u endla mitirho leyi endliwaka evandlheni, vamakwerhu va ta hatla va ku amukela naswona u ta titwa se u ri ekaya.

 4. Endla vanghana. (2 Kor. 6:​11-13) Ku kombisa leswaku u ni mhaka ni vanhu van’wana i ndlela ya kahle yo endla vanghana kutani tinyike nkarhi lowu eneleke tidyondzo ti nga si sungula niloko ti huma leswaku u va tiva kahle vamakwerhu. Tikarhatele ku tiva mavito ya vona. Ku tsundzuka mavito ya vamakwerhu ni ku tlhela u ngheneka swi ta endla van’wana va kota ku ku tshinelela naswona hi ndlela yoleyo u ta tikumela vanghana.

Ematshan’weni yo karhateka ngopfu hi ku lava ku amukeriwa, pfumelela vamakwerhu va tiva munhu loyi u nga yena hakunene. Endla hilaha Lucinda a vulaka hakona, “Sweswi hi ni vanghana hikwalaho ka leswi hi rhangeke hi va rhamba ekaya ra hina.”

“AMUKELANANI”

Van’wana swa va chavisa ku ya eHolweni ya Mfumo leyi taleke hi vanhu lava nga va tiviki. U nga endla yini leswaku lava ha ku fikaka evandlheni ra n’wina va titwa va amukelekile? Muapostola Pawulo u te: “Amukelanani tanihi leswi Kreste na yena a mi amukeleke.” (Rhom. 15:7) Vakulu va nga tekelela xikombiso xa Kreste hi ku pfuna lava ha ku fikaka va titwa va amukelekile. (Vona bokisi leri nge, “ Leswi Nga Ku Pfunaka Swi Ku Fambela Kahle Loko U Rhurhela eVandlheni Lerintshwa.”) Hambiswiritano, hinkwavo evandlheni ku katsa ni vana va nga endla swo karhi leswaku va va vanghana va lava ha ku fikaka.

Ku amukela van’wana swi katsa ku va komba malwandla ni ku tlhela hi va pfuna hi leswi lavekaka. Hi xikombiso, makwerhu un’wana wa xisati u tinyike nkarhi leswaku a komba makwerhu la ha ku fikaka tikhona ta doroba ni ndlela leyi swa ku famba swa mani na mani swi tirhaka hayona. Makwerhu wa xisati la pfuniweke u khumbekile swinene hileswi makwerhu a swi endleke naswona swi n’wi pfunile leswaku a tolovela.

KU RHURHA SWI NGA KU PFUNA U ENDLA NHLUVUKO

Njiya loko yi kula yi dzuvula xikhumba xa yona ko tala yi nga si sungula ku haha. Hilaha ku fanaka,  loko u rhurhela evandlheni lerintshwa, u fanele u tshika ku vilela hinkwako loku nga ha ku sivelaka ku endla swo tala entirhweni wa Yehovha. Nicolas na Céline va ri: “Ku rhurha swi nga ku dyondzisa swo tala. Ku tolovela vanhu vantshwa ni ndhawu yintshwa swi hi pfune leswaku hi va ni vumunhu lebyintshwa lebyinene.” Jean-Charles, loyi a boxiweke eku sunguleni u hlamusela ndlela leyi ku rhurha swi pfuneke ndyangu wakwe, u ri: “Ku rhurha swi pfune vana va hina va endla nhluvuko evandlheni lerintshwa. Endzhaku ka tin’hweti ti nga ri tingani, n’wana wa hina wa nhwanyana u sungule ku endla swiavelo eka tinhlengeletano ta vandlha ta le xikarhi ka vhiki kasi n’wana wa hina wa jaha u ve muhuweleri la nga khuvuriwangiki.”

Ku vuriwa yini loko swiyimo swa wena swi nga ku pfumeleli leswaku u rhurhela endhawini yin’wana, ku nga ha va laha ku nga ni xilaveko lexikulu? Swi nga va njhani u sungula hi vuntshwa laha u nga kona kutani u tirhisa swin’wana swa swiringanyeto leswi ku buriweke ha swona laha henhla? Titshege hi Yehovha loko u ri karhi u katseka hi ku helela eka mitirho leyi endliwaka evandlheni hi ku va u tirha ni van’wana ensin’wini, u endla vanghana lavantshwa u tlhela u tiyisa vuxaka ni lava se va nga vanghana va wena. Xana u nga pfuna lava ha ku fikaka kumbe lava lavaka ku pfuniwa hi leswi va swi pfumalaka? Tanihi leswi rirhandzu ku nga mfungho wa Vakreste va ntiyiso, ku endla tano swi ta ku pfuna leswaku vuxaka bya wena na Yehovha byi ya byi kula. (Yoh. 13:35) U nga tiyiseka leswaku “Xikwembu xi tsakisiwa ngopfu hi magandzelo yo tano.”—Hev. 13:16.

Hambileswi swi nga oloviki ku rhurha, Vakreste vo tala va swi kotile ku tolovela vandlha lerintshwa, na wena u nga swi kota! Anne-Lise u ri: “Ku cinca vandlha swi ndzi pfune ndzi tolovela ni vamakwerhu van’wana.” Sweswi Kazumi wa tiyiseka leswaku ku rhurha “ku nga ku pfuna u vona tindlela leti Yehovha a ku pfunaka hatona leti u nga si tshamaka u ti vona.” Ku vuriwa yini hi Jules? U ri: “Vanghana lava se ndzi nga na vona va ndzi pfuna ndzi titwa ndzi ri ekaya. Se ndzi ri toloverile vandlha ra mina lerintshwa lerova swi nga ndzi tikela ku ri sukela loko ndzo boheka ku rhurha.”