Eklesiasta 7:1-29
7 Vito lerinene ra antswa ku ri ni mafurha lamanene,+ ni siku ra ku fa ra antswa ku ri ni siku ra ku velekiwa.
2 Swa antswa ku ya endlwini ya xirilo ku ri ni ku ya enkhubyeni,+ hikuva kwalaho hi laha vanhu hinkwavo va nga ta helela kona naswona lava hanyaka va fanele va swi tsundzuka sweswo.
3 Swa antswa ku va ni gome ku ri ni ku hleka,+ hikuva xikandza lexi nga ni gome xi endla mbilu yi antswa.+
4 Mbilu ya lavo tlhariha yi le ndlwini ya xirilo, kambe mbilu ya swiphukuphuku yi le ndlwini ya ku tsaka.+
5 Swa antswa ku yingisa lowo tlhariha a ku tshinya+ ku ri ni ku yingisela risimu ra swiphukuphuku.
6 Hikuva loko xiphukuphuku xi hleka, swi fana ni mpfumawulo wa mitwa leyi tshwaka ehansi ka poto;+ leswi na swona a swi pfuni nchumu.
7 Kambe ku tshikileriwa ku nga pengisa munhu wo tlhariha naswona mbilu ya munhu ya onhaka loko a pfumela ku xaviwa.+
8 Makumu ya mhaka ma antswa ku ri ni masungulo ya yona. Swa antswa ku lehisa mbilu ku ri ni ku tikukumuxa.+
9 U nga hatliseli ku hlundzuka,+ hikuva i swiphukuphuku leswi endlaka tano.+
10 U nga vuli u ku, “Hikwalaho ka yini mikarhi ya khale a yi antswa ku tlula ya sweswi?” hikuva loko u vutisa sweswo a wu kombisi vutlhari.+
11 Vutlhari ni ndzhaka i swinene naswona swa pfuna eka lava hanyaka.
12 Hikuva vutlhari i xisirhelelo+ ku fana nileswi mali yi nga xisirhelelo,+ kambe vutivi byi pfuna hi leswi: Vutlhari byi hlayisa vutomi bya n’wini wa byona.+
13 Ehleketisisa hi ntirho wa Xikwembu xa ntiyiso, hikuva i mani la nga ololoxaka leswi xi swi gombonyokiseke?+
14 Hi siku lerinene na wena endla leswinene,+ kambe hi siku ra khombo, tsundzuka leswaku masiku wolawo hinkwawo ma endliwe hi Xikwembu,+ leswaku vanhu va nga swi tivi leswi nga ta va humelela enkarhini lowu taka.+
15 Ndzi vone swilo hinkwaswo hi nkarhi lowu nga pfuniki nchumu wa ku hanya ka mina,+ ndzi vone munhu la lulameke a lova hambileswi a a lulamile,+ ndzi vona ni munhu wo homboloka a hanya nkarhi wo leha ni vubihi byakwe.+
16 U nga vi la lulameke ku tlula mpimo,+ kumbe u vonaka u tlharihe ku tlula mpimo.+ Hikwalaho ka yini u fanele u tidlaya?+
17 U nga vi wo homboloka ku tlula mpimo kumbe u va xiphukuphuku.+ Hikwalaho ka yini u fanele u fa ku nga si va nkarhi wa wena?+
18 Swa antswa ku yingisa xitsundzuxo lexi kambe u nga rivali lexin’wana;+ hikuva loyi a chavaka Xikwembu u ta swi yingisa haswimbirhi.
19 Vutlhari byi endla munhu wo tlhariha a va ni matimba swinene ku tlula vavanuna va khume emutini.+
20 Hikuva a nga kona munhu la lulameke emisaveni loyi a endlaka leswinene ntsena naswona a nga dyohiki.+
21 Nakambe, u nga tekeli enhlokweni hinkwaswo leswi vanhu va swi vulaka;+ hikuva u nga twa nandza wa wena a ku rhukana;
22 phela u swi tiva kahle embilwini ya wena leswaku na wena u rhukane van’wana.+
23 Hinkwaswo leswi ndzi swi kambele hi vutlhari, kutani ndzi te: “Ndzi ta va ni vutlhari.” Kambe ndzi tsandzekile.
24 Leswi swi veke kona swi le kule swinene naswona swi dzike ngopfu. I mani la nga swi twisisaka?+
25 Ndzi kongomise mbilu ya mina leswaku yi tiva ni ku kambisisa ni ku lavisisa vutlhari ni lexi vangaka leswaku swilo swi endleka, ni ku twisisa leswaku vuphukuphuku i vuhomboloki ni ku penga i vuphunta.+
26 Kutani ndzi kume leswi: Wansati loyi a fanaka ni nete ya vahloti u ni khombo swinene ku tlula ni rifu, loyi mbilu yakwe yi fanaka ni tinkoka* naswona mavoko yakwe ma fanaka ni tinketana ta le khotsweni. Loyi a tsakisaka Xikwembu xa ntiyiso u ta n’wi balekela wansati yoloye,+ kambe mudyohi u ta phaseka.+
27 “Waswivo, hi leswi leswi ndzi swi kumeke,” ku vula muhlengeleti.+ “Ndzi kambisise swilo swo hambanahambana leswaku ndzi fikelela xiboho,
28 kambe leswi a ndzi tshamela ku swi lavisisa a ndzi swi kumanga. Ndzi kume wanuna un’we eka vanhu va gidi, kambe eka vanhu volavo a ndzi n’wi kumanga wansati.
29 Ndzi kume leswi ntsena: Xikwembu xa ntiyiso xi endle vanhu va lulamile,+ kambe vona va tilukele makungu yo tala.”+
Tinhlamuselo ta le hansi
^ Kumbe “tinete.” Ku nga tinete to phasa tihlampfi.
